ប្រទេសក្រិកត្រូវជ្រើសរើសឲ្យបានលឿនថា នៅឬចេញ ពីតំបន់អឺរ៉ូ
សេណារីយោ ក្រិក ប្រទេសជាសមាជិកមួយ ដើរចេញពីតំបន់អឺរ៉ូ ហាក់ដូចជាត្រូវបានលើកឡើងកាន់តែច្បាស់ទៅៗ ជាលើកទីមួយ។ ល្ងាចមិញ នៅទីក្រុងកាន ប្រទេសបារាំង មុនពេលជំនួបកំពូលហ្សេ-២០ បើកជាផ្លូវការ លោកប្រធានាធិបតីបារាំង និងលោកស្រីប្រមុខរដ្ឋាភិបាលអាល្លឺម៉ង់ បានកោះហៅលោកនាយករដ្ឋមន្ត្រីក្រិក ហ្សក ប៉ាប៉ង់ដ្រេអ៊ូ ដែលមានជំហរមិនច្បាស់លាស់ មកព្រមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ជាជំនួបក្រៅផ្លូវការ ដែលប៉ារីស និងប៊ែរឡាំង បានគំរាមនិងដាក់កំហិតដល់ប្រទេសក្រិក ឲ្យបង្ហាញពីជំហរច្បាស់លាស់ និង ឲ្យបានលឿនបំផុត អំពីចេតនាចង់ ឬមិនចង់ចេញពីតំបន់អឺរ៉ូ។ ជាការឆ្លើយតប លោកនាយករដ្ឋមន្ត្រីក្រិកបានសម្រេចប្រកាសលើកពេលធ្វើប្រជាមតិ មកថ្ងៃទី៤ធ្នូវិញ។ ប៉ុន្តែ នៅព្រឹកមិញនេះ រដ្ឋមន្ត្រីក្រសួងហិរញ្ញវត្ថុក្រិកបានសម្តែងការប្រឆាំងនឹងការធ្វើប្រជាមតិស្តីពីការចង់ដកខ្លួនពីតំបន់អឺរ៉ូ។
ការរារែកដែលធ្វើឲ្យតំបន់អឺរ៉ូទាំងមូលជួបនឹងភាពច្របូកច្របល់ ត្រូវតែបញ្ចប់ ! ប្រទេសក្រិកត្រូវជ្រើសរើសឲ្យបានច្បាស់លាស់ និងលឿនបំផុត ថា “ចង់នៅចាយប្រាក់អឺរ៉ូទៀត ឬក៏ទេ !” នេះជាសារដ៏ម៉ាត់ប្រៃរបស់ប្រមុខរដ្ឋបារាំង លោក នីកូឡា សាកូហ្ស៊ី (Nicolas Sarkozy) និងប្រមុខរដ្ឋាភិបាល អាល្លឺម៉ង់លោកស្រី អង់ហ្គឺឡា មែរគែល (Angela Merkel) ទៅកាន់នាយករដ្ឋមន្ត្រីក្រិក។
ប្រសិនបើក្រិក ដើរចេញពីអឺរ៉ូមែន វាអាចបង្កឲ្យស្ថានភាពក្នុងតំបន់ធ្លាក់ធ្ងន់ធ្ងរកាន់តែខ្លាំង ប៉ុន្តែប៉ារីស និងប៊ែរឡាំង គោរពសេចក្តីសម្រេចចិត្តរបស់ប្រជាពលរដ្ឋក្រិក ហើយមិនបោះបង់អឺរ៉ូចោលជាដាច់ខាត។ នេះជាការប្រកាសបញ្ជាក់របស់លោកស្រីប្រមុខរដ្ឋាភិបាលអាល្លឺម៉ង់។
ប្រទេសជាសមាជិកសហភាពអឺរ៉ុប បានជួយស្រោចស្រង់ក្រិកអស់រយៈពេល១៨ខែមកហើយ តែក្រិកខ្លួនឯង អល់អែកពុំព្រមធ្វើកំណែទម្រង់ចាំបាច់ ដើម្បីស្តារកំណើនសេដ្ឋកិច្ចជាតិទេ។ ដូច្នេះ សម្រាប់បារាំង និងអាល្លឺម៉ង់ ទង្វើរបស់ក្រិកបែបនេះមិនអាចអនុគ្រោះបានទៀតឡើយ ព្រោះវាអាចនឹងធ្វើឲ្យប្រាក់អឺរ៉ូ ស្គាល់អស្ថិរភាព។
បើនៅតែមានមន្ទិល មិនដឹងពីលទ្ធផលនៃប្រជាមតិ និងគ្មានការអនុម័តផែនការត្បិតត្បៀតប្រឆាំងនឹងវិបត្តិបំណុលជាតិទេ សហភាពអឺរ៉ុបនឹងមិនផ្តល់ប្រាក់ជំនួយ ដល់ក្រិក សូម្បីតែមួយសេនក៏គ្មានដែរ។ នេះជាការព្រមានរបស់លោក នីកូឡា សាកូហ្ស៊ី ព្រោះបើជាសមាជិកអឺរ៉ូ ត្រូវគោរពនិងអនុវត្តវិន័យរបស់តំបន់។
លោកនាយករដ្ឋមន្ត្រីក្រិក កំពុងស្ថិតក្នុងស្ថានភាពលំបាក ជាងពេលណាៗទាំងអស់ ព្រោះហិបរដ្ឋនឹងត្រូវរលីងស្អាតក្នុងរយៈពេលមួយខែទៀតនេះ ឯកញ្ចប់ប្រាក់កម្ចី៨ពាន់លានអឺរ៉ូ ក្នុងក្របខ័ណ្ឌផែនការសង្គ្រោះក្រិក១១០ពាន់លាន ត្រូវអឺរ៉ុបផ្អាប់ទុកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ