គម្លាតយោធារីកធំរវាងចិនដីគោកនិងចិនតៃវ៉ាន់
ចុះផ្សាយនៅថ្ងៃ៖
ស្តាប់ - ០៥:២៩
កាលពីម្សិលមិញ ថ្ងៃទី១៦សីហា ក្រសួងការពារជាតិរបស់សហរដ្ឋអាមេរិកបានចេញផ្សាយរបាយការណ៍មួយ គូសបញ្ជាក់ជាអាទិ៍ថា ចិនដីគោកកំពុងតែបង្កើនអានុភាពយោធារបស់ខ្លួនឲ្យកាន់តែខ្លាំង នៅចំពោះមុខកោះតៃវ៉ាន់។ មន្ទីរបញ្ចកោណអាមេរិកបានទាំងអះអាងបន្ថែមថា ថ្នាក់ដឹកនាំចិនបានពង្រីកដែនប្រមាញ់របស់ខ្លួន ដោយលែងចាត់ទុកតៃវ៉ាន់ ថាជាផ្ទាំងស៊ីបតែមួយរបស់ខ្លួន ដូចមុនទៀតហើយ។
របាយការណ៍ដែលមន្ទីរបញ្ចកោណបានតុបតែងឡើងសម្រាប់សភាអាមេរិក ពិនិត្យមើលទៅលើទិន្ន័យផ្សេងៗ ដូចជាឃ្លាំងអាវុធ ផែនការយោធានានា និងទំហំនៃប្រាក់ចំណាយរបស់ចិនដីគោកនៅលើវិស័យការពារជាតិ ក្នុងឆ្នាំ២០០៩កន្លងទៅនេះ រួចហើយសាកល្បងបកស្រាយយុទ្ធសាស្រ្តនិងមហិច្ឆតាយោធារបស់ថ្នាក់ដឹកនាំទីក្រុងប៉េកាំង។
យោងទៅតាមមន្ទីរបញ្ចកោណ ជាសរុប ចិនបានចាយប្រាក់ជាង១៥ម៉ឺនលានដុល្លារសម្រាប់វិស័យយោធា នៅក្នុងឆ្នាំ២០០៩។ តាមពិតទៅ ១៥ម៉ឺនលានដុល្លារមិនទាន់ជាច្រើនណាស់ណាទេ បើប្រៀបធៀបទៅនឹងថវិកាយោធារបស់អាមេរិក ដែលបានកើនទៅដល់៧០ម៉ឺនលានដុល្លារ នៅក្នុងឆ្នាំ២០០៩ដូចគ្នា។ ក៏ប៉ុន្តែ ចូរកុំភ្លេចថា នៅឆ្នាំ២០០៤ ចិនបានចាយតែ២ម៉ឺន៥ពាន់លានដុល្លារតែប៉ុណ្ណោះសម្រាប់វិស័យយោធា បានន័យថាកញ្ចប់ថវិកាយោធារបស់មហាយក្សអាស៊ីមួយនេះ បានកើនឡើងដល់ទៅ៦ដងឯណោះ ក្នុងអំឡុងពេលតែ៥ឆ្នាំប៉ុណ្ណោះ។
របាយការណ៍ដដែលរបស់មន្ទីរបញ្ចកោណអាមេរិក បានគូសបញ្ជាក់ទៀតថា មកទល់ឆ្នាំ២០០៩កន្លងទៅនេះ ផែនការនវូបនីយកម្មយោធារបស់ចិនបានផ្តោតទៅលើការកាត់បន្ថយចំនួនកងទ័ព ជាពិសេសកងទ័ពជើងទឹកនិងជើងអាកាស តែកែច្នៃឬផ្លាស់ប្តូរនាវាចម្បាំងនិងបរិក្ខារនានា ព្រមទាំងពង្រឹងប្រព័ន្ធការពារដែនអាកាសរបស់ប្រទេស។ មិនតែប៉ុណ្ណោះ យោងទៅតាមរបាយការណ៍ ចិនក៏បាននិងកំពុងបន្តដំឡើងកាំជ្រួចមីស៊ីលបាញ់បានឆ្ងាយ បាញ់បានចម្ងាយពី៨០០០ ទៅ១ ២០០០គ.ម។
របាយការណ៍របស់មន្ទីរបញ្ចកោណអះអាងថា “ជញ្ជីងនៃតុល្យភាពយោធា រវាងត្រើយខាងណេះ និងត្រើយខាងណោះនៃដៃសមុទ្រFormose បន្តផ្អៀងខ្លាំងឡើងៗទៅខាងចិនដីគោក»។ សម្រាប់ក្រសួងការពារជាតិអាមេរិក ទាំងនេះស្តែងឲ្យឃើញថា ចិនដីគោកត្រៀមលក្ខណៈជាស្រេចដើម្បីធ្វើសង្គ្រាម ក្នុងករណីណាដែលមានអធិករណ៍ធំដុំកើតឡើងជាមួយកោះតៃវ៉ាន់។ សូមបញ្ជាក់ត្រង់នេះបន្តិចថា របាយការណ៍នេះរបស់មន្ទីរបញ្ចកោណត្រូវបានសរសេរហើយ តាំងពីមុនខែមករាឆ្នាំ២០១០ បានន័យថាមុនពេលដែលអាមេរិកបានប្រកាសលក់ទៅឲ្យតៃវ៉ាន់ទៅទៀត នូវកាំជ្រួចមីស៊ីលPatriot នាវារាវរកគ្រាប់មីនក្នុងទឹក និងឧទ្ធម្ភាគចក្រBlack Hawk។ ម្ល៉ោះហើយ គេអាចនិយាយថា តាមរយៈការលក់អាវុធ គិតជាទឹកប្រាក់ប្រមាណ៦ពាន់៤រយលានដុល្លារទៅឲ្យតៃវ៉ាន់នៅឆ្នាំ២០១០នេះ អាមេរិកប្រហែលជាមានបំណងកាត់បន្ថយគម្លាតយោធាធំខ្លាំងពេក រវាងចិនដីគោកនិងកោះតៃវ៉ាន់។
ចិនពង្រីកដែនប្រមាញ់របស់ខ្លួនទៅដល់កោះGuam របស់អាមេរិក
របាយការណ៍របស់មន្ទីរបញ្ចកោណបាននិយាយបកស្រាយឆ្ងាយជាងហ្នឹងទៅទៀត។ ចំពោះក្រសួងការពារជាតិអាមេរិក ពីអំណើះតទៅ តៃវ៉ាន់មិនមែនជាផ្ទាំងស៊ីបតែមួយរបស់ចិនដីគោកដូចមុនទៀតទេ។
មកទល់ពេលនេះ អាវុធដែលចិនមាន បានកំណត់ព្រំដែនសកម្មភាពយោធារបស់ថ្នាក់ដឹកនាំចិន ត្រឹមកោះតៃវ៉ាន់ដែលនៅជិតបង្កើយ ត្រឹមកោះOkinawa របស់ប្រទេសជប៉ុននៅប៉ែកខាងកើត និងនៅត្រឹមប៉ែកខាងត្បូងនៃសមុទ្រចិន ជិតប្រទេសវៀតណាមតែប៉ុណ្ណោះ។ ក្រសួងការពារជាតិអាមេរិកអះអាងថា ពីអំណើះតទៅ ថ្នាក់ដឹកនាំចិនដែលកំពុងអនុវត្តផែនការដំឡើងមីស៊ីលបាញ់បានឆ្ងាយ បានពង្រីកដែនអំណាចនិងដែនប្រមាញ់របស់ខ្លួន ទៅដល់កោះGuam ដែលជាដែនដីរបស់អាមេរិកនៅក្នុងមហាសមុទ្រប៉ាស៊ីហ្វិក ទៅដល់Honshu ដែលជាកោះធំជាងគេនៃទីប្រជុំកោះរបស់ប្រទេសជប៉ុន និងទៅដល់ទឹកដីហ្វីលីព្វីនទៀតផង។
អ្នកណាក៏ដឹងដែរថា ចិនជាមហាអំណាចសេដ្ឋកិច្ចពិភពលោកដែលបានវ៉ាឈ្នះឬក៏ជិតវ៉ាឈ្នះជប៉ុន ដែលជាមហាអំណាចសេដ្ឋកិច្ចពិភពលោកទី២។
ទោះបីជាថ្នាក់ដឹកនាំចិនបន្តអះអាងថា ប្រទេសខ្លួនចង់លេចត្រដែតឡើងដោយសន្តិវិធីនៅលើឆាកអន្តរជាតិក៏ដោយ ក៏គេត្រូវយល់ដែរថា ចិនមិនមែនជប៉ុនទេ។ ខុសពីជប៉ុន ចិនជាសមាជិកអចិន្ត្រៃយ៍នៃអង្គការសហប្រជាជាតិ។ ខុសពីជប៉ុន ចិនជាមហាអំណាចនុយក្លេអ៊ែរ។ និយាយបែបផ្សេង លក្ខន្តិកៈរបស់ប្រទេសចិននៅលើលោក គឺមិនខុសគ្នាពីអាមេរិក រុស្ស៊ី បារាំងនិងអង់គ្លេសទេ។ ម្ល៉ោះហើយ ចិនក៏មានមហិច្ឆតាអន្តរជាតិដូចអាមេរិកដែរ។
ជាច្រើនឆ្នាំកន្លងមកហើយ ដែលគេបាននិងកំពុងបន្តសាកល្បងមើលឲ្យធ្លុះគោលបំណងយោធាពិតប្រាកដរបស់ថ្នាក់ដឹកនាំចិន ពីព្រោះចិនមិនមែនចេះតែបង្កើនថវិកាយោធាលឿនរហ័សដល់ម្ល៉ឹង ដោយគ្មានគោលដៅច្បាស់លាស់នោះទេ។
ក្រុមអ្នកវិភាគមួយចំនួនបានអះអាងជាច្រើនឆ្នាំកន្លងមកហើយថា គោលដៅយោធារបស់ចិនមានបីដំណាក់កាល។ នៅក្នុងដំណាក់កាលទីមួយ គឺមកដល់ឆ្នាំ២០១០នេះ ប្រទេសចិនចាំបាច់ត្រូវតែមានសមត្ថភាពនិងលទ្ធភាពយោធា ដើម្បីប្រឈមមុខនឹងសង្គ្រាមជាយថាហេតុជាមួយតៃវ៉ាន់ ព្រមទាំងសង្គ្រាមដែលនឹងអាចកើតមានឡើងនៅប៉ែកខាងត្បូងនៃសមុទ្រចិន។ នៅក្នុងដំណាក់កាលទីពីរ គឺពីឆ្នាំ២០១០ដល់ឆ្នាំ២០២០ ប្រទេសចិនចាំបាច់ត្រូវតែមានសមត្ថភាពធ្វើអន្តរាគមន៍យោធា នៅគ្រប់ច្រកល្ហកក្នុងតំបន់អាស៊ី។ រីឯនៅក្នុងដំណាក់កាលទីបី គឺពីឆ្នាំ២០២០ដល់ឆ្នាំ២០៥០ ប្រទេសចិនចាំបាច់ត្រូវតែក្លាយជាមហាអំណាចយោធាពិភពលោក ដោយត្រូវបានគេទទួលស្គាល់ជាមុនថាជាមហាអំណាចយោធានៅក្នុងតំបន់ បានន័យថា នៅគ្រប់ផ្ទៃសមុទ្រក្នុងភូមិភាគអាស៊ីអាគ្នេយ៍ និងអាស៊ីបូព៌ាព្រមទាំងនៅទូទាំងតំបន់ប៉ែកខាងលិចនៃមហាសមុទ្រប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ