អំពើហិង្សានៅតែបន្តក្នុងតំបន់ហ្កាហ្សាខណៈដែលគេរង់ចាំបទឈប់បាញ់គ្នាមួយ
គ្រាប់ផ្លោងរបស់អ៊ីស្រាអែលនៅតែបន្តពេញមួយយប់ម្សិលមិញឆ្លងមកដល់ថ្ងៃពុធ២១វិច្ឆិកានេះទៀតនៅហ្កាហ្សា។ ខាងប៉ាឡេស្ទីនវិញក៏ផ្លោងគ្រាប់រ៉ុកកែតខ្លួនទៅខាងអ៊ីស្រាអែលដែរនិងបានសម្លាប់ប្រជាជនអ៊ីស្រាអែលពីរនាក់ក្នុងនោះទាហានម្នាក់។ នៅក្នុងបរិបថនេះ ការចរចាគ្នាជាច្រើនដើម្បីរៀបចំបទឈប់បាញ់គ្នាមួយត្រូវបានប្រព្រឹត្តទៅ ហើយយោងតាមចលនាអ៊ីស្លាមប៉ាឡេស្ទីនហាម៉ាស ដំណោះស្រាយនៃកិច្ចចរចានេះប្រហែលជាត្រូវជូនដំណឹងដោយប្រទេសអេហ្ស៊ីប។ ចំណែកលោកស្រី ហ៊ីឡារីក្លីនតុន រដ្ឋមន្ត្រីការបរទេសអាមេរិកវិញ កំពុងស្ថិតនៅក្នុងតំបន់ Cijordanie នៅថ្ងៃពុធនេះ ដើម្បីជួបប្រាស្រ័យជាមួយលោកប្រធានរដ្ឋអំណាចប៉ាឡេស្ទីន Mahmoud Abbas។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ពេញមួយយប់ម្សិលមិញឆ្លងមកថ្ងៃពុធនេះទៀត អំពើហិង្សា នៅតែបន្ត ដោយមានការបាញ់គ្រាប់ផ្លោងរបស់អ៊ីស្រាអែលនិងការបាញ់គ្រាប់រ៉ុកកែតរបស់ចលនាប៉ាឡេស្ទីនហាម៉ាស។
គេឮសូរសម្លេងយន្តហោះដ្រូន(drone) យ៉ាងទ្រហឹងអឹងអាប់ពេញផ្ទៃមេឃនៅព្រឹកថ្ងៃពុធនេះ ហើយកាលពីយប់មិញ ឧត្ថម្ភភាគចក្រអ៊ីស្រាអែល បានប្រតិបត្តិការហោះល្បាត និង បាញ់គ្រាប់មីស្ស៊ីល។ កងទ័ពជើងទឹកអ៊ីស្រាអែលវិញ នៅតែដាក់ពង្រាយនៅតាមបណ្តោយឆ្នេរសមុទ្រជានិច្ច ចំណែកយន្តហោះប្រដេញធុន F16 វិញ ក៏ហោះក្នុងកំរិតយ៉ាងទាបដែរនៅយប់មិញ។
កងទ័ពអ៊ីស្រាអែល បានបូកសរុបចំនួនគ្រាប់រ៉ុកកែតដែលបាញ់ចេញពីតំបន់ហ្កាហ្សាប្រមាណ១៨៩គ្រាប់ក្នុងនោះជាង៥០គ្រាប់ ត្រូវបានប្រព័ន្ធកំចាត់មីស្ស៊ីលអ៊ីស្រាអែល Iron Dome ស្តាត់ចាប់បាន។ នៅម្សិលមិញនេះទាហានអ៊ីស្រាអែលម្នាក់អាយុ១៨ឆ្នាំត្រូវរងគ្រោះស្លាប់ដោយការផ្លោងគ្រាប់រ៉ុកកែតប៉ាឡេស្ទីនមកលើភាគខាងត្បូងប្រទេសអ៊ីស្រាអែលនិងបានបណ្តាលឲ្យស្លាប់ជនស៊ីវិលអ៊ីស្រាអែលម្នាក់ដែរនៅក្នុងតំបន់ដដែលនេះ។ ខាងអ៊ីស្រាអែល មកទល់ពេលនេះមានស្លាប់៥នាក់។
ខាងប៉ាឡេស្ទីនយោងតាមអ្នកតំណាងប៉ាឡេស្ទីននៅអសបចំនួនជនរងគ្រោះប៉ាឡេស្ទីន ចាប់តាំងពីមានប្រតិបត្តិការ”សសរការពារ"របស់អ៊ីស្រាអែលមកមានអ្នកស្លាប់ប្រមាណ ១៤០នាក់និងរងរបួស៩៥០នាក់។
អ្នកតំណាងរបស់ប៉ាឡេស្ទីន បានទាមទារសុំឲ្យមានការដាក់ទណ្ឌកម្មមួយទៅលើប្រតិបត្តិការយោធាអ៊ីស្រាអែលពីសំណាក់ក្រុមប្រឹក្សាសន្តិសុខនៃអសប។ ម្យ៉ាងទៀត កិច្ចប្រជុំជាសាធារណៈមួយ ប្រហែលជានឹងត្រូវធ្វើនៅអសប នៅថ្ងៃពុធនេះដែរ។
ដោយឡែក នៅយប់ម្សិលមិញនៅទីក្រុងហ្សេរុយហ្សាឡិម លោកស្រីរដ្ឋមន្រ្តីការបរទេសអាមេរិកហ៊ីឡារីក្លីនតុន មុនកិច្ចសន្ទនាជាមួយលោកនាយករដ្ឋមន្ត្រីអ៊ីស្រាអែល បានថ្លែង បញ្ជាក់ជាថ្មី ថា ការសន្យារបស់សហរដ្ឋអាមេរិកក្នុងកិច្ចការពារសន្តិសុខរដ្ឋអ៊ីស្រាអែល នៅតែម៉ឹងម័តនិងរឹងប៉ឹងដដែល។ នៅថ្ងៃពុធនេះ លោកស្រីត្រូវអញ្ជើញទៅទីក្រុង Ramallah ដើម្បីជួបសន្ទនាជាមួយលោក ប្រធានរដ្ឋអំណាចប៉ាឡេស្ទីន Mahmoud Abvbas មុននឹងចាកចេញដំណើរឆ្ពោះទៅកាន់ទីក្រុងកែរប្រទេសអេហ្ស៊ីប ដើម្បីលើកពិភាក្សាអំពីកិច្ចព្រមព្រៀងគ្នាមួយនៅក្នុងរយៈពេលប៉ុន្មានថ្ងៃខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ