អ៊ីស្រាអែលបាញ់កម្ទេចទីស្នាក់ការកណ្តាលរបស់ចលនាហាម៉ាស
នៅតែប៉ុន្មានម៉ោងក្រោយ នាយករដ្ឋមន្រ្តីអេហ្សីបបញ្ចប់ទស្សនកិច្ចនៅតំបន់ហ្កាហ្សា ទាហានអ៊ីស្រាអែលបានចាប់ផ្តើមជាថ្មីសមរភូមិប្រយុទ្ធ ដោយបានប្រើយន្តហោះចម្បាំងបាញ់កម្ទេចទីតាំងសំខាន់ៗរបស់ក្រុមសកម្មប្រយុទ្ធហាម៉ាស។ នៅព្រឹកព្រលឹមថ្ងៃសៅរ៍ទី ១៧ វិច្ឆិកានេះ ការវាយប្រហារទ័ពអាកាសរបស់អ៊ីស្រាអែលបានសម្លាប់ប្រជាជនប៉ាឡេស្ទីន៨នាក់ ក្នុងនោះ មានបីនាក់ជាយុទ្ធជនប៉ាឡេស្ទីន។ ជាសរុប រហូតមកដល់ព្រឹកថ្ងៃសៅរ៍នេះ មានប្រជាជនប៉ាឡេស្ទីន ៣៨នាក់ស្លាប់ នៅក្នុងការវាយប្រហាររបស់យន្តហោះអ៊ីស្រាអែល។ នៅទឹកដីអ៊ីស្រាអែលវិញ គ្រាប់ផ្លោងរបស់ក្រុមប៉ាឡេស្ទីនបានធ្វើឲ្យទាហានអ៊ីស្រាអែលរបួសបីនាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
ចាប់តាំងពីយប់ថ្ងៃសុក្រម្សិលមិញ ប្រជាជនប៉ាឡេស្ទីន នៅតំបន់ហ្កាហ្សា មិនអាចលក់មួយស្រឡេតណាឡើយ។ នេះជាលើកទីបីហើយ ដែលយន្តហោះចម្បាំងរបស់អ៊ីស្រាអែលបានទមា្លក់គ្រាប់បែកផ្ទួនៗទៅលើទីតាំងសំខាន់ៗរបស់ចលនាហាម៉ាស គឺបន្ទាប់ពីគ្រាប់ផ្លោងជាច្រើនគ្រាប់របស់ចលនាប៉ាឡេស្ទីន បាញ់ចូលទៅJerusalum និងក្បែររដ្ឋធានីTel Aviv កាលពីថ្ងៃសុក្រ។ នៅព្រឹកថ្ងៃសៅរ៍នេះ សូម្បី ទីស្នាក់ការកណ្តាលរបស់ក្រុមហាម៉ាស ដែលជាកន្លែងធ្វើសន្និសីទកាសែត របស់នាយករដ្ឋមន្រ្តីអេហ្សីប កាលពីម្សិលមិញ ក៏ត្រូវរងការបាញ់បំផ្លាញយ៉ាងខ្ទេចខ្ទីដែរ ប៉ុន្តែ មិនបានបង្កឲ្យមានមនុស្សរបួសទេ បើតាមតុល្យការចុងក្រោយ។
ទាហានអ៊ីស្រាអែលបានប្រកាសថា ខ្លួនបានសំដៅវាយប្រហារទៅលើស្ថាប័ន ចំនួន ៨៥កន្លែងរបស់ក្រុមហាម៉ាស ដែលនៅក្នុងនោះមានតាំងពីទីស្នាក់ការរបស់ប៉ូលិស។ ផ្លូវថ្នល់សំខាន់២ ជុំវិញ ទីក្រុងហ្កាហ្សាក៏ត្រូវយន្តហោះអ៊ីស្រាអែលបាញ់បំផ្លាញដែរ។ យោងតាមអ្នកកាសែត ដែលកំពុងយកព័ត៌មាននៅក្នុងទឹកដីហ្កាហ្សា ការវាយប្រហារទ័ពអាកាសរបស់អ៊ីស្រាអែល លើកនេះមានលក្ខណៈផ្ទួនៗគ្នា និងចំគោលដៅ ជាងមុន គឺខុសពីការវាយប្រហាររបស់អ៊ីស្រាអែល កាលពីឆ្នាំ២០០៨ និង២០០៩ ទៅលើតំបន់ហ្កាហ្សា ដែលកាលណោះ គឺលំនៅឋានរបស់ប្រជាជនដែលរងគ្រោះ ដោយការទម្លាក់គ្រាប់របស់ទាហានអ៊ីស្រាអែល។
ចាប់តាំងថ្ងៃសុក្រ ក្រុមទាហានស្ម័គ្រអ៊ីស្រាអែលត្រូវបញ្ជូនទៅ ព្រំដែន អ៊ីស្រាអែល ជាមួយតំបន់ហ្កាហ្សា ដែលរថក្រោះអ៊ីស្រាអែលត្រូវបានពង្រាយរួចជាស្រេចដើម្បីផ្តើមប្រតិបត្តិការប្រយុទ្ធតាមផ្លូវគោក។ ក្រសួងការពារជាតិអ៊ីស្រាអែលវិញបានបញ្ជាក់ថា គេបានប្រកាសប្រមូលចូលវិញនូវទាហានអ៊ីស្រាអែលបម្រុង ប្រមាណ ៧ម៉ឺន ៥ពាន់ សម្រាប់ត្រៀមប្រយុទ្ធជាមួយក្រុមហាម៉ាស។
នៅថ្ងៃសៅរ៍នេះដែរ រដ្ឋមន្រ្តីការបរទេសទុយនីស៊ីបានធ្វើដំណើរទៅក្នុងទឹកដីហ្កាហ្សា ដើម្បីជួបពិភាក្សាជាមួយប្រមុខដឹកនាំក្រុមហាម៉ាស។ កាលពីថ្ងៃម្សិលមិញ ប្រធានាធិបតីទុយនីស៊ីបានប្រកាសសាមគ្គីភាពរបស់ប្រជាជនទុយនីស៊ីជាមួយប្រជាជនប៉ាឡេស្ទីន និងបានបរិហារពីការវាយប្រហារដ៏ហិង្សារបស់អ៊ីស្រាអែលទៅលើប្រជាជនប៉ាឡេស្ទីន។ ទុយនីស៊ីបានទាមទារឲ្យមានការប្រជុំរបស់ក្រុមប្រឹក្សាសន្តិសុខអង្គការសហប្រជាជាតិជាបន្ទាន់ ដើម្បីចេញសេចក្តី សម្រេច ដាក់ទណ្ឌកម្មលើអ៊ីស្រាអែល។
សេចក្តីសម្រេចរបស់ក្រុមប្រឹក្សាសន្តិសុខ ដើម្បីដាក់ទណ្ឌកម្មប្រឆាំងអ៊ីស្រាអែល នឹងទំនងប្រហែលជាមិនអាចចេញរួច ព្រោះលោកប្រធានាធិបតីអាមេរិក បារ៉ាក់ អូបាម៉ាបានសំដែងជាថ្មី គាំទ្រប្រតិបត្តិការរបស់អ៊ីស្រាអែល ដែលលោកចាត់ទុកថា ធ្វើឡើងដើម្បីការពារខ្លួន ពីការវាយប្រហាររបស់ហាម៉ាសតែប៉ុណ្ណោះ។ លោកអគ្គលេខាធិការអង្គការសហប្រជាជាតិបាន គីមូនឯណោះវិញ នឹងធ្វើដំណើរទៅប្រទេសអ៊ីស្រាអែល និងតំបន់ហា្កហ្សា នៅប៉ុន្មានថ្ងៃខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ