គណបក្សកាន់អំណាចបារាំងបាក់មុខ ព្រោះចាញ់ឆ្នោតឃុំ-សង្កាត់ ប្រឈមនឹងជោគជ័យរបស់បក្សអភិរក្សនិយម
ការបោះឆ្នោតក្រុមប្រឹក្សាឃុំ-សង្កាត់ ជុំទី២ នៅប្រទេសបារាំង ថ្ងៃអាទិត្យម្សិលមិញ បានចេញលទ្ធផលថា គណបក្សសង្គមនិយមរបស់ប្រធានាធិបតី ហ្វ្រង់ស៊័រ ហូឡង់ ដែលកំពុងកាន់អំណាចបច្ចុប្បន្ន បានចាញ់សម្លេងឆ្នោត ប្រឈមនឹងបក្សអភិរក្សនិយម ស្តាំនិយម UMP អ៊ុយ អិម ប៉េ របស់អតីតប្រធានាធិបតីនីកូឡា សាកូហ្ស៊ី ដែលបានដណ្តើមក្រុងជាច្រើនពីបក្សកាន់អំណាច យកមកកាន់កាប់។ សម្លេងឆ្នោតអនុប្បវាទបានឡើងខ្ពស់មិនធ្លាប់មាន។ តាមធម្មតា នៅថ្ងៃចន្ទនេះ ប្រធានាធិបតីបារាំងហូឡង់ត្រូវជួបពិភាក្សាជាមួយរដ្ឋមន្ត្រីក្រសួងមហាផ្ទៃ គឺលោកម៉ានុយអ៊ែល វ៉ាល់ ប៉ុន្តែ ជំនួបនេះត្រូវបានលើកពេលវិញ។ ប្រសិនបើបារាំងរុះរើរដ្ឋាភិបាល លោកម៉ានុយអ៊ែល វ៉ាល់ ប្រហែលជាអាចឡើងកាន់តំណែងជានាយករដ្ឋមន្ត្រី បន្តពីលោកហ្សង់ ម៉ាក អៃរ៉ូល។
ចុះផ្សាយនៅថ្ងៃ៖ កែប្រែថ្ងៃទី៖
លទ្ធផលនៃការបោះឆ្នោតឃុំ-សង្កាត់ នៅបារាំង ថ្ងៃអាទិត្យម្សិលមិញ បានបំបាក់មុខគណបក្សកាន់អំណាចសង្គមនិយមបារាំងយ៉ាងខ្លាំង។ គិតទូទាំងប្រទេស បក្សកាន់អំណាចទទួលសម្លេងបាន៤០,៥៧ភាគរយ តិចជាងបក្សប្រឆាំងស្តាំនិយម UMP អ៊ុយ អិម ប៉េ ដែលទទួលជោគជ័យជាមួយសម្លេង៤៥,៩១ភាគរយ។ រីឯបក្សរណសិរ្សជាតិ ជាបក្សស្តាំនិយមជ្រុលវិញ បានទទួលសម្លេងខ្ពស់ គួរអោយកត់សម្គាល់ផងដែរគឺបានប្រមាណ៦,៨៤ភាគរយ។ បក្សស្តាំនិយមជ្រុលនេះ បានឈ្នះឆ្នោតនៅតាមក្រុងចំនួនជាង១២ ស្របតាមទិសដៅដែលបានកំណត់ពីដំបូងទី។
នេះជាលើកទី១ហើយ ដែលបក្សប្រឆាំងស្តាំនិយម UMP របស់អតីតប្រធានាធិបតីនីកូឡា សាកូហ្ស៊ី បានទទួលជោគជ័យក្នុងការបោះឆ្នោតឃុំ-សង្កាត់ គិតរយៈពេល៦ឆ្នាំមកនេះ។ កាលពីលោកសាកូហ្ស៊ីកាន់អំណាចជាប្រធានាធិបតី បក្ស UMP បានចាញ់ឆ្នោតឃុំ-សង្កាត់ ប្រឈមនឹងបក្សសង្គមនិយម ដែលកំពុងកាន់អំណាចសព្វថ្ងៃនេះ។
ដោយឡែក ក្នុងការបោះឆ្នោតម្សិលមិញ លោកស្រី អាន ហ៊ីដាល់ហ្កូ មកពីបក្សកាន់អំណាចបានជាប់ឆ្នោត ជាអភិបាលរដ្ឋធានីប៉ារីស។ ម្សិលមិញ អត្រាអ្នកចូលរួមបោះឆ្នោតជុំទី២ មាន៦៣,៧ភាគរយ ជាអត្រាទាបមិនធ្លាប់មាន។ បរាជ័យរបស់បក្សកាន់អំណាចនៅពេលនេះ បង្ហាញច្បាស់ថា ប្រជាជនបារាំងមិនពេញចិត្តនយោបាយរបស់ប្រធានាធិបតី ហូឡង់ និងនាយករដ្ឋមន្ត្រីអៃរ៉ូលនោះទេ។ ប្រជាជនបារាំងនៅតែបន្ទោសរដ្ឋាភិបាលថា គ្មានលទ្ធភាពដោះស្រាយបញ្ហាជនគ្មានការងារធ្វើក្នុងស្រុក។
រដ្ឋាភិបាលបារាំងប្រហែលជាត្រូវរុះរើសមាសភាពរបស់ខ្លួន ដោយសារតែភាពបរាជ័យក្នុងការបោះឆ្នោតឃុំ-សង្កាត់នេះ។ គេរំពឹងថា លោកហ្សង់ម៉ាក អៃរ៉ូល នឹងចុះពីតំណែងនាយករដ្ឋមន្ត្រី ហើយរដ្ឋមន្ត្រីមហាផ្ទៃ គឹលោកម៉ានុយអ៊ែល វ៉ាល់ នឹងឡើងមកធ្វើជានាយករដ្ឋមន្ត្រីវិញ។ ខុសពីនាយករដ្ឋមន្ត្រីអៃរ៉ូល និងប្រធានាធិបតីហូឡង់ ដែលធ្លាក់ប្រជាប្រិយភាព លោកវ៉ាល់ កំពុងមានប្រជាប្រិយភាពក្នុងស្រុកគួរអោយកត់សម្គាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ