គណបក្សសង្គ្រោះជាតិ៖ ជោគជ័យនៃការបង្រួបបង្រួម!
ចុះផ្សាយនៅថ្ងៃ៖
ស្តាប់ - ០៥:១១
គិតមកដល់ថ្ងៃទី៧មេសាឆ្នាំ ២០១៤ នេះ គណបក្សសង្គ្រោះជាតិមានអាយុគ្រប់មួយឆ្នាំហើយ។ បង្កើតឡើងទើបតែបានមួយឆ្នាំ គណបក្សនេះបានធ្វើឲ្យមានការប្រែប្រួលដ៏ធំមួយក្នុងការបោះឆ្នោតសភាអាណត្តិទី៥នេះ។ ជាគណបក្សថ្មីតែមានធាតុផ្សំចាស់ គណបក្សសង្គ្រោះជាតិដែលកើតចេញពីសម្ព័ន្ធភាពរវាងលោក សម រង្ស៊ី និងលោក កឹម សុខា កំពុងក្លាយជាដៃគូតែមួយគត់របស់គណបក្សប្រជាជនក្នុងការឈានទៅដណ្តើមអំណាចដឹកនាំប្រទេស។ ប៉ុន្តែ គណបក្សនេះមានបញ្ហាប្រឈមជាច្រើនដែលត្រូវដោះស្រាយចំពោះមុខ។ តើអ្វីខ្លះជាចំណុចខ្លាំងនិងចំណុចខ្សោយរបស់គណបក្សសង្គ្រោះជាតិ?
ទើបតែមានអាយុមួយឆ្នាំសោះ ប៉ុន្តែ គណបក្សសង្គ្រោះជាតិទទួលបានទទួលការគាំទ្រគួរឲ្យភ្ញាក់ផ្អើល។ ក្រៅពីវាយផ្តួលគណបក្សផ្សេងទៀតឲ្យបាត់មុខពីរដ្ឋសភាហើយនោះ គណបក្សប្រឆាំងមួយនេះក៏បានដណ្តើមយក២២កៅអីពីគណបក្សប្រជាជនកម្ពុជាថែមទៀត។ ទោះជាយ៉ាងនេះក៏ដោយ ក៏មេដឹកនាំគណបក្សនេះនៅតែអះអាងថាខ្លួនអាចទទួលបានកៅអីច្រើនជាងនេះទៅទៀតប្រសិនបើការបោះឆ្នោតប្រព្រឹត្តទៅដោយសេរីនិងយុតិ្តធម៌។
ដើម្បីឈានដល់ដំណាក់កាលនេះ គណបក្សសង្គ្រោះជាតិពិតជាមានចំណុចខ្លាំងរបស់ខ្លួន៖
ចំណុចខ្លាំងទី១ គឺការបង្រួបបង្រួមបក្សប្រឆាំង។ នរណាក៏ដឹងដែរថាការបង្រួបបង្រួមជាផ្លូវតែមួយគត់ដើម្បីឈានទៅធ្វើគូប្រជែងពិតប្រាកដរបស់គណបក្សប្រជាជនកម្ពុជាដែលកាន់អំណាចជាង ៣០ឆ្នាំ។ ប៉ុន្តែ ការបង្រួបបង្រួមបានទទួលបរាជ័យម្តងហើយម្តងទៀតក្រោមឥទ្ធិពលនៃអំណួតរបស់អ្នកនយោបាយ។ ទីបំផុត ក្រោមសម្ពាធនៃស្ថានការណ៍ចាប់បង្ខំ ការបង្រួបប្រងួមរវាងគណបក្ស សម រង្ស៊ី និងសិទ្ធិមនុស្សរបស់លោក កឹម សុខា ក៏កើតចេញជារូបរាងយ៉ាងតក់ក្រហល់។ ការបង្រួបបង្រួមនេះហើយដែលជាគ្រឹះដ៏រឹងមាំក្នុងការទាក់ទាញការគាំទ្រ។
ចំណុចខ្លាំងទី២ ៖ មេដឹកនាំទាំងពីរគឺលោក សម រង្ស៊ី និងលោក កឹម សុខា គឺជាអ្នកប្រឆាំងដ៏ល្បីល្បាញជាមួយរដ្ឋាភិបាលគណបក្សកាន់អំណាចជាពិសេសគឺជាមួយលោកនាយករដ្ឋមន្ត្រី ហ៊ុន សែន។ អ្នកទាំងពីរតែងហ៊ានចេញមុខតវ៉ានិងដឹកនាំបាតុកម្មតាមដងផ្លូវដ៏សកម្មដើម្បីការពារផលប្រយោជន៍ពលរដ្ឋដែលរងគ្រោះដោយអំពើអយុត្តិធម៌ផ្សេង។ ភាពសកម្មនេះហើយដែលបានផ្តល់ភាពកក់ក្តៅដល់ពលរដ្ឋក្រីក្រជាច្រើនជាពិសេសអ្នករងគ្រោះដោយបញ្ហាណាមួយក្រោមការដឹកនាំរបស់រដ្ឋាភិបាលគណបក្សប្រជាជនកម្ពុជា។
ចំណុខ្លាំងទី៣៖ គោលនយោបាយដែលវាយចំចំណុចខ្សោយរបស់គណបក្សកាន់អំណាច៖ ការដំឡើងប្រាក់ខែមន្ត្រីរាជការនិងកម្មករ ការផ្តល់ប្រាក់ឧត្ថម្ភដល់ជនចាស់ជរា ផ្តល់ការព្យាបាលជំងឺដល់អ្នកក្រីក្រដោយឥតគិតថ្លៃ រួមទាំងគោលនយោបាយដីធ្លី និងការបញ្ចុះតម្លៃជីកសិកម្ម និងប្រេងសាំងជាដើម គឺជាការទន្ទឹងរង់ចាំរបស់ប្រជាពលរដ្ឋខ្មែរជាច្រើនតែគណបក្សកាន់អំណាចមិនអាចធ្វើបាន។
យ៉ាងណាក៏ដោយ ប្រជាប្រិយភាពរបស់គណបក្សសង្គ្រោះជាតិត្រូវគេមើលឃើញថាមិនមែនសុទ្ធតែបានមកពីសមត្ថភាពរបស់ខ្លួនទាំងស្រុងទេ។ សំណាងនិងឱកាសក៏ជាអំណោយផលមួយទៀតដែលជួយបង្កើនថាមពលដល់គណបក្សប្រឆាំងផងដែរពោលគឺអ្នកបោះឆ្នោតឲ្យគណបក្សនេះមួយចំនួនបោះដោយការមិនពេញចិត្តគណបក្សកាន់អំណាចក្នុងនោះក៏មានមន្ត្រីរាជការនិងសមាជិកគណបក្សប្រជាជនមួយចំនួនដែរដែលងាកមកទម្លាក់សន្លឹកឆ្នោតឲ្យបក្សប្រឆាំងដើម្បីជាការព្រមានគណបក្សរបស់ខ្លួនឲ្យភ្ញាក់រលឹក។
គណបក្សសង្គ្រោះជាតិក៏មានចំណុចខ្សោយគួរឲ្យកត់សម្គាល់ដែរ។ ជាបឋម កង្វះខាតធនធានមនុស្សជាបញ្ហាមិនអាចមើលរំលងបាន។ ក្រៅពីធនធានមនុស្សថ្នាក់លើដែលមិនសូវសម្បូរ នៅឯថ្នាក់មូលដ្ឋានឯណោះរឹតតែខ្វះខាតថែមទៀត។ សូមកុំភ្លេចថា ដើម្បីត្រៀមខ្លួនដឹកនាំប្រទេស គណបក្សនេះត្រូវការធនធានមនុស្សច្រើនណាស់ក្នុងបរិបទដែលរដ្ឋបាលរបស់កម្ពុជាសព្វថ្ងៃតំណាងឲ្យគណបក្សច្រើនជាងតំណាងឲ្យជាតិ។
រីឯសម្ព័ន្ធភាពរវាងគណបក្សសម រង្ស៊ីនិងសិទ្ធិមនុស្សវិញក៏នៅតែមិនទាន់រឹងមាំនៅឡើយដែរ។ គណបក្សមួយដែលប្រធាននិងអនុប្រធានតែងនៅជាប់ស្អិតជាមួយគ្នាគ្រប់ទិសទី គណបក្សមួយដែលមានអ្នកនាំពាក្យពីរនាក់ រីឯការបែងចែកកូតានៅតែជាបញ្ហាសំខាន់។ល។ សុទ្ធសឹងជាសញ្ញានៃភាពមិនរឹងមាំនៃសម្ព័ន្ធភាព។
ក្រៅពីនោះ កង្វះយុទ្ធសាស្ត្រច្បាស់លាស់ កង្វះតម្លាភាពក្នុងការឡើងកាន់តួនាទី បញ្ហាបក្ខពួកសែស្រឡាយនិងកង្វះភាពចាស់ទុំខាងប្រជាធិបតេយ្យក្នុងចំណោមអ្នកដឹកនាំនិងសកម្មជនក៏ជាអ្វីដែលគួរឲ្យកត់សម្គាល់ដែរ។ គណបក្សមួយដែលចូលចិត្តរិះគន់គេ តែងាយនឹងរើសអើងឬលាបពណ៌ដល់អ្នករិះគន់ទៅលើខ្លួនឯងវិញបញ្ជាក់ពីភាពក្មេងខ្ចីនៃប្រជាធិបតេយ្យនៅក្នុងគណបក្សយ៉ាងពិតប្រាកដ។
សរុបមកវិញ គណបក្សសង្គ្រោះជាតិពេលនេះកំពុងក្លាយជាដៃគូផ្លាស់វេនដឹកនាំប្រទេសជាមួយគណបក្សប្រជាជនកម្ពុជាយ៉ាងពិតប្រាកដ។ ប៉ុន្តែ គណបក្សនេះពិតជាមានកិច្ចការច្រើនណាស់ដែលត្រូវធ្វើ។ សូមកុំភ្លេចថា ការទទួលបានការគាំទ្រពីមហាជនជារឿងមួយ តែសមត្ថភាពគ្រប់គ្រងនិងដឹកនាំជារឿងមួយទៀត ពីព្រោះជួនកាលគ្រាន់តែថាអាចជាការស្រួល ប៉ុន្តែ ដល់ពេលធ្វើជាក់ស្តែងទើបដឹងថាជាការលំបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ