គណៈកម្មការទី១០នៃរដ្ឋសភាផ្តើមសិក្សាពីស្ថានភាពអំពើពុករលួយ មុនបោសសម្អាត
ដូចការគ្រោងទុកនៅព្រឹកថ្ងៃសុក្រនេះ លោកហូរ វ៉ាន់ ប្រធានគណៈកម្មការអង្កេត បោសសម្អាត និង ប្រឆាំងអំពើពុករលួយនៃរដ្ឋសភា បានជួបពិភាក្សាគ្នាជាមួយលោក ព្រាប កុល នាយកប្រតិបត្តិអង្គការសម្លាភាពកម្ពុជា ដើម្បីសិក្សាពីស្ថានភាពអំពើពុករលួយនៅក្នុងប្រទេសកម្ពុជាឲ្យបានច្បាស់លាស់ មុនចាប់ផ្តើមបោសសម្អាត។ គណៈកម្មការទី១០នេះក៏បានកោះហៅថ្នាក់ដឹកនាំអង្គភាពប្រឆាំងអំពើពុករលួយចូលបំភ្លឺនៅពេលខាងមុខនេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ក្នុងជំនួបពិភាក្សាជាងពីរម៉ោងនោះ អង្គការតម្លាភាពកម្ពុជា បានបង្ហាញរបាយការណ៍នៃអំពើពុករលួយដែលកំពុងកើតមាននៅក្នុងប្រទេសកម្ពុជា។ អំពើពុករលួយដែលអង្គការនេះចង្អុលបង្ហាញថា កើតមានច្រើនជាងគេក្នុងប្រព័ន្ធតុលាការ អាជ្ញាធរមានសមត្ថកិច្ច និង ក្នុងរឿងជម្លោះដីធ្លី។
លោក ហូរ វ៉ាន់ បានចាត់ទុករបាយការណ៍ស្តីពីអំពើពុករលួយរបស់អង្គការតម្លាភាពកម្ពុជា ថាបានឆ្លុះបញ្ចាំងពីស្ថានអំពើពុករលួយភាគច្រើននៅក្នុងប្រទេសកម្ពុជា។គណៈកម្មការទី១០ នឹងបន្តសហការជាមួយអង្គការក្រៅរដ្ឋាភិបាល ដើម្បីបោសសម្អាតអំពើពុករលួយដែលកំពុងកើតមានទាំងនោះ។
គួរកត់សម្គាល់ថា ការជួបពិភាក្សាជាមួយអង្គការក្រៅរដ្ឋាភិបាល របស់គណៈកម្មការទី១០ នៃរដ្ឋសភានៅពេលនេះ គឺជាប្រើប្រាស់យន្តការសភាថ្មីមួយទៀតក្នុងដោះស្រាយបញ្ហារបស់ជាតិ។ កាលពីថ្ងៃពុធ គណៈកម្មការទី ៧ នៃរដ្ឋសភាដែលដឹកនាំដោយគណបក្សសង្គ្រោះជាតិដែរនោះ បានសួរ និង ស្ដាប់ការឆ្លើយបំភ្លឺរបស់លោក ហង់ ជួនណារ៉ុន រដ្ឋមន្ត្រីក្រសួងអប់រំជុំវិញកំណែទម្រង់របស់ក្រសួង។
ការប្រើប្រាស់យន្តការសភាតាមរយៈការកោះហៅរដ្ឋមន្ត្រីមកបំភ្លឺ និង ជួបពិភាក្សាជាមួយអង្គការក្រៅរដ្ឋាភិបាលបែបនេះ ត្រូវបានប្រមុខរដ្ឋាភិបាលកម្ពុជា លោក ហ៊ុន សែន និង ប្រមុខគណបក្សបក្សប្រឆាំង លោក សម រង្ស៊ី បានសម្តែងការគាំទ្រដូចគ្នា ។ ទាំងលោកហ៊ុន សែន និង លោក សម រង្ស៊ី សុទ្ធតែជំរុញឲ្យមានការសហការគ្នាបែបនេះតទៅទៀតនៅក្នុងរដ្ឋសភា។ ស្របពេលគ្នានោះ លោក ហ៊ុន សែន ក៏បានប្រាប់ទៅរដ្ឋមន្ត្រីក្រោមឱវាទ ត្រូវតែចូលខ្លួនទៅបំភ្លឺនៅក្នុងរដ្ឋសភា នៅពេលមានការកោះហៅ។
យ៉ាងណាក៏ដោយ ជំហានបន្ទាប់ គណៈកម្មការទី១០ នៃរដ្ឋសភានឹងសួរនាំ និង ស្ដាប់ការបំភ្លឺរបស់ថ្នាក់ដឹកនាំអង្គភាពប្រឆាំងអំពើពុករលួយនាពេលខាងមុខជុំវិញចំណាត់ការរបស់អង្គភាពនេះក្នុងការប្រយុទ្ធប្រឆាំង និង លុបបំបាត់អំពើពុករលួយនៅក្នុងប្រទេសកម្ពុជា។ គណៈកម្មការជំនាញខាងបោសសម្អាតអំពើពុករលួយរបស់រដ្ឋសភានេះ បានផ្ញើលិខិតកោះអញ្ជើញទៅកាន់អង្គភាពប្រឆាំងអំពើពុករលួយរួចហើយកាលពីពីរសប្តាហ៍មុន ។ នេះបើតាមការបញ្ជាក់របស់លោក ហូរ វ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ