សមាជិករដ្ឋសភា បញ្ចេញប្រតិកម្មលើអ្នករាយការណ៍ពិសេសអង្គការសហប្រជាជាតិ
សមាជិករដ្ឋសភា និងមន្ត្រីជាន់ខ្ពស់រដ្ឋាភិបាល បានយកវេទិកានៃកិច្ចប្រជុំរដ្ឋសភា កាលពីព្រឹកថ្ងៃទី២៧ ខែមិថុនា ឆ្នាំ២០១៤ ដើម្បីបញ្ចេញប្រតិកម្មតបនឹងអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោក ស៊ូយា ស៊ូប៊ែឌី។លោក ស៊ូប៊ែឌី ដែលទើបតែបញ្ចប់ដំណើរទស្សនកិច្ចជាថ្មី រយៈពេល ១០ ថ្ងៃនៅកម្ពុជា កាលពីថ្ងៃទី២៤ ខែមិថុនា បានផ្តល់អនុសាសន៍ជាច្រើនថែមទៀត ពាក់ព័ន្ធនឹងកំណែទម្រង់ជាច្រើន ក្នុងនោះ មានទាំងការយល់ស្របឲ្យមានកំណែទម្រង់គជប ដោយសំឡេង ២ ភាគ ៣ នៃចំនួនរដ្ឋសភាសរុប។
ចុះផ្សាយនៅថ្ងៃ៖
ស្តាប់ - ០២:១៩
ក្នុងកិច្ចប្រជុំរដ្ឋសភា ដែលបានពិភាក្សា និងអនុម័តលើសេចក្តីព្រាងច្បាប់ ស្តីពី ការធានារ៉ាប់រង កាលពីព្រឹកថ្ងៃទី២៧ មិថុនា លោក គាត ឈន់ ឧបនាយករដ្ឋមន្ត្រីប្រចាំការ និងជាអ្នកតំណាងរាស្ត្រ មណ្ឌលភ្នំពេញ បានបង្ហាញការមិនពេញចិត្ត ដោយលោកអះអាងថា មានអារម្មណ៍ឆួលបន្តិចដែរ ពាក់ព័ន្ធនឹងដំណឹងមកពីទីក្រុងហ្សឺណែវ ដែលជាទីស្នាក់ការធំរបស់អង្គការសហប្រជាជាតិ។
លោក គាត ឈន់ បានថ្លែងថា នៅកម្ពុជាសព្វថ្ងៃ ក្រោមការដឹកនាំរបស់គណបក្សប្រជាជនកម្ពុជា នៅរក្សាបានសន្តិភាព រក្សាបាននូវស្ថិរភាពសង្គម និងប្រក្រតីភាពនៃកិច្ចដំណើរការស្ថាប័ននីតិបញ្ញត្តិ នីតិប្រតិបត្តិ និងតុលាការ។ ក្នុងនោះ ស្ថាប័នថ្នាក់ជាតិ និងថ្នាក់ក្រោមជាតិ ដំណើរការជាធម្មតា។លោកឧបនាយករដ្ឋមន្ត្រី គាត ឈន់ បានបញ្ជាក់ថា ពេលលោកបានឃើញដំណឹងពីហ្សឺណែវ ធ្លាក់មកនៅថ្ងៃនេះ នាំឲ្យលោកមានអារម្មណ៍ឆួលក្នុងចិត្ត។
ចំណែកលោក ឈាង វុន អ្នកតំណាងរាស្ត្រមណ្ឌលខេត្តបាត់ដំបង ក៏បានថ្លែងគាំទ្រទាំងស្រុងនូវការលើកឡើងរបស់លោកឧបនាយករដ្ឋមន្ត្រី គាត ឈន់។ លោក ឈាង វុន បានថ្លែងក្នុងកិច្ចប្រជុំរដ្ឋសភា កាលពីព្រឹកមិញ ដោយចាត់ទុកថា រឿងនេះ មិនមែនជារឿងធម្មតាទេ។
តាមលោក ឈាង វុន អនុសាសន៍មួយចំនួន របស់លោក ស៊ូប៊ែឌី ត្រូវបានយកមកគិតគូរ បញ្ចូលក្នុងច្បាប់មួយចំនួនហើយ តែអ្វីដែលកម្ពុជាមិនស្តាប់ និងមិនយក មកពីអនុសាសន៍របស់គាត់ យកមកអនុវត្តនៅកម្ពុជា មិនបាន។
លោក ឈាង វុន បញ្ជាក់ថា អនុសាសន៍ ដែលមិនអាចយកនោះ មកពីអាចធ្វើឲ្យរាំងស្ទះស្ថាប័នរដ្ឋ ឧទាហរណ៍ដូចជា ការជ្រើសរើសសមាជិកគជប ដោយមតិ ២ ភាគ ៣ តាមអ្វីដែលគណបក្សប្រឆាំង និងសង្គមស៊ីវិល បានលើកឡើង។ អនុសាសន៍នោះ ត្រូវបានលោក ឈាងវុន អះអាងថា នឹងត្រូវជាប់គាំង ហើយនាំឲ្យរលត់រលាយស្ថាប័នជាតិ និងជាអនុសាសន៍ ដែលនាំឲ្យកម្ពុជា វិលទៅមុនឆ្នាំ១៩៩៣។
ប្រតិកម្មរបស់សមាជិករដ្ឋសភាខាងលើនេះ បានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកស៊ូប៊ែឌី បានបិទបញ្ចប់ដំណើរទស្សនកិច្ច លើកទី១១ រយៈពេល ១០ ថ្ងៃ របស់លោក នៅកម្ពុជា កាលពីថ្ងៃទី២៤ ខែមិថុនា ឆ្នាំ២០១៤។ លោក ស៊ូប៊ែឌី ក៏បានផ្តល់អនុសាសន៍ជាច្រើន ក្នុងនោះ មានការកែទម្រង់គជប កែទម្រង់រដ្ឋសភា កែទម្រង់ប្រព័ន្ធយុត្តិធម៌ និងតុលាការ រួមទាំងកំណែទម្រង់ដីធ្លី ជាដើម។
ជាមួយគ្នានោះ ក្រុមប្រឹក្សាសិទ្ធិមនុស្ស របស់អង្គការសហប្រជាជាតិ កាលពីថ្ងៃព្រហស្បតិ៍ ទី២៦ ខែមិថុនា ឆ្នាំ២០១៤ ក៏បានលើកឡើងថា រដ្ឋាភិបាលកម្ពុជា នៅទ្រឹងចំពោះអនុសាសន៍សំខាន់ៗជាច្រើន ពាក់ព័ន្ធនឹងការកែលម្អសិទ្ធិមនុស្ស នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ