អង្គការសង្គមស៊ីវិលសម្តែងការបារម្ភពីវិធីសាស្ត្រដោះស្រាយបណ្តឹងតវ៉ារបស់គ.ជ.ប. ថាគ្មានតម្លាភាព
មជ្ឈមណ្ឌលសិទ្ធិមនុស្សកម្ពុជា និងខុមហ្វ្រែល សម្តែងការព្រួយបារម្ភពីចំពោះវិធីសាស្ត្រដែលគណៈកម្មាធិការជាតិរៀបចំការបោះឆ្នោតបានប្រើនៅក្នុងការដោះស្រាយបណ្តឹងតវ៉ា និងការផ្ទៀងផ្ទាត់ឡើងវិញទាក់ទងភាពមិនប្រក្រតីនៃលទ្ធផលបណ្តោះអាសន្ន។ ជាវិធីសាស្ត្រដែលធ្វើឲ្យអង្គការសង្គមស៊ីវិលទាំងពីរនោះយល់ថា ខ្វះនូវតម្លាភាព និងមិនអាចបញ្ជាក់ពីលទ្ធផលបោះឆ្នោតបាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
សេចក្តីថ្លែងការណ៍ដាច់ដោយឡែកពីគ្នាមួយ ដែលចេញផ្សាយនៅថ្ងៃសៅរ៍នេះ របស់អង្គការសង្គមស៊ីវិលចំនួនពីរ ដែលបានធ្វើការតាមដានដំណើរការបោះឆ្នោតនៅក្នុងប្រទេសកម្ពុជា បានបង្ហាញការព្រួយបារម្ភពីវិធីសាស្ត្រដោះស្រាយបណ្តឹងតវ៉ា និងការផ្ទៀងផ្ទាត់ឡើងវិញ នូវលទ្ធផលបណ្តោះអាសន្ន នៃការបោះឆ្នោត ដែលបានដែលធ្វើឡើងដោយគណៈកម្មាធិការជាតិរៀបចំការបោះឆ្នោត កាលពីថ្ងៃទី១៥ និង១៦ ខែសីហាកន្លងទៅនេះ។
សេចក្តីថ្លែងរបស់គណៈកម្មាធិការ ដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ ខុមហ្វ្រែល និងមជ្ឈមណ្ឌលសិទ្ធិមនុស្សកម្ពុជា បានលើកឡើងស្រដៀងគ្នាថា ដំណើរការដោះស្រាយបណ្តឹងរបស់គ.ជ.ប. ទៅលើបណ្តឹងរបស់គណបក្សសង្គ្រោះជាតិក្នុងខេត្តចំនួន៤ គឺមិនបានផ្ទៀងផ្ទាត់លទ្ធផលបោះឆ្នោត ជាមួយទម្រង់ដើម ដែលមាននៅក្នុងកញ្ចប់សុវត្ថិភាព(ក) នោះទេ។
បើតាមលោក អ៊ូ វីរៈ ប្រធានមជ្ឈមណ្ឌលសិទ្ធិមនុស្ស ការដោះស្រាយបណ្តឹងរបស់ គ.ជ.ប នៅពេលនេះ ធ្វើឲ្យមានការព្រួយបារម្ភពីភាពមិនប្រក្រតីនៅតែកើតមាន ហើយភាពមិនឯករាជ្យ នៃលទ្ធផលបោះឆ្នោត និងគ.ជ.ប នៅតែបន្តស្ថិតក្នុងភាពមន្ទិល។ លោកបញ្ជាក់ថា ប្រសិនបើគ.ជ.ប. ចង់ឲ្យមានតម្លាភាពពិតមែននោះ ត្រូវបើកទម្រង់ដើមនៅក្នុងកញ្ចប់សុវត្ថិភាព ដើម្បីស៊ើបអង្កេត។
ជាការផ្ទៀងផ្ទាត់តាមទម្រង់ ១១០២ ១១០៤ និង១១០៩ របស់ គ.ជ.ប. គឺទម្រង់ទាំងអស់នេះហើយ ដែលធ្វើឲ្យអង្គការសង្គមស៊ីវិលទាំងពីរនោះយល់ថា ការផ្ទៀងផ្ទាត់នេះខ្វះនូវតម្លាភាព និងមិនអាចបញ្ជាក់ពីលទ្ធផលបោះឆ្នោតបាននោះទេ ដោយសារតែទម្រង់ទាំងនេះ គ.ជ.ប.ទទួលបានពីឃុំ សង្កាត់តែប៉ុណ្ណោះ។ ពិសេសទម្រង់ ១១០២ គឺជាឯកសារដែលគេអាចកែ ឬធ្វើថ្មីបាន ព្រោះមិនមែនជាឯកសារដើម ដែលរក្សាទុកនៅក្នុងកញ្ចប់សុវត្ថិភាព "ក"នោះទេ។
វាមានលក្ខណៈបច្ចេកទេសបន្តិចទៅលើទម្រង់ខាងលើទាំងអស់នេះ ប៉ុន្តែអង្គការទាំងពីរ បានជំរុញឲ្យ គ.ជ.ប បើកទម្រង់ដើម នៅក្នុងកញ្ចប់សុវត្ថិភាព ដើម្បីផ្ទៀងផ្ទាត់លទ្ធផល និងស៊ើបអង្កេតលើភាពមិនប្រក្រតី ក្នុងការរាប់សន្លឹកឆ្នោត នៅមុនការចេញផ្សាយលទ្ធផលបោះឆ្នោតជាផ្លូវការ នៅពេលខាងមុខនោះ។
វិទ្យុបារាំងមិនអាចទាក់ទងសុំការពន្យល់ពីលោក ទេព នីថា អគ្គលេខាធិការនៃគណកម្មាធិការជាតិរៀបចំការបោះឆ្នោតបានទេ រសៀលថ្ងៃសៅរ៍នេះ ដោយលោកបានបិទទូរស័ព្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ