គណបក្សសង្គ្រោះជាតិប្តឹងទៅក្រុមប្រឹក្សាធម្មនុញ្ញ នៅថ្ងៃស្អែក
បន្ទាប់គណៈកម្មាធិការជាតិរៀបចំការបោះឆ្នោតបានច្រានចោលបណ្តឹងស្នើឱ្យដោះស្រាយផ្ទៀងផ្ទាត់នៅភាពមិនប្រក្រតីនៃកាបោះឆ្នោត កាលពីម្សិលមិញ។ គណបក្សសង្គ្រោះជាតិនឹងបន្តប្តឹងទៅក្រុមប្រឹក្សាធម្មនុញ្ញជាបន្តនៅថ្ងៃស្អែក ដើម្បីស្វែងរកភាពយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
គណបក្សសង្គ្រោះជាតិកំពុងពិនិត្យ និងរៀបចំបណ្តឹងដើម្បីដាក់ទៅក្រុមប្រឹក្សាធម្មនុញ្ញនៅថ្ងៃស្អែក បន្ទាប់ពីពាក្យបណ្តឹងមួយចំនួនពាក់ព័ន្ធនឹងភាពមិនប្រក្រតីនៃការបោះឆ្នោតរបស់គណបក្សនេះ ត្រូវបានគណៈកម្មាធិការជាតិរៀបចំការបោះឆ្នោតសម្រេចមិនដោះស្រាយ។
លោក គួយ ប៊ុនរឿន តំណាងរាស្ត្រគណបក្សសង្គ្រោះជាតិ បានប្រាប់វិទ្យុបារាំងអន្តរជាតិនៅថ្ងៃសៅរ៍នេះថា ក្រុមប្រឹក្សាអ្នកច្បាប់របស់គណបក្សសង្គ្រោះជាតិ និងមន្ត្រីជំនាញផ្នែកបោះឆ្នោតកំពុងតែពិនិត្យនិតិវិធីនៃអង្គហេតុ និងអង្គច្បាប់ ដើម្បីបង្ហាញថា បណ្តឹងពីភាពមិនប្រក្រតីនៅពេលបោះឆ្នោត គឺគ.ជ.ប. មិនបានធ្វើការដោះស្រាយដោយគោរពទៅតាមនិតិវិធីច្បាប់នោះទេ។ ដូច្នេះ គណបក្សសង្គ្រោះជាតិត្រូវទាមទារឲ្យមានការដោះស្រាយប្រកបដោយភាពយុត្តិធម៌។
លោកបញ្ជាក់ថា ក្រុមអ្នកច្បាប់របស់គណបក្សសង្គ្រោះជាតិកំពុងតែរកមូលដ្ឋាននៃអង្គហេតុ និងអង្គច្បាប់ ព្រមទាំងភស្តុតាងបន្ថែមទៀតដើម្បីឲ្យបណ្តឹងរបស់គណបក្សមានទំងន់ និងសុពលភាព ដើម្បីឲ្យក្រុមប្រឹក្សាធម្មនុញ្ញផ្តល់យុត្តិធម៌ទៅលើពាក្យបណ្តឹង។
គួរបញ្ជាក់ថា មានបណ្តឹងចំនួន១៧ ដែលគណបក្សសង្គ្រោះជាតិបានដាក់ទៅកាន់គណៈកម្មាធិការជាតិរៀបចំការបោះឆ្នោត ឲ្យធ្វើការដោះស្រាយពាក់ព័ន្ធនឹងភាពមិនប្រក្រតីនៃការបោះ ឆ្នោត។ ប៉ុន្តែបណឹ្តងចំនួនជាផ្លូវការចំនួន១៤ត្រូវបានគ.ជ.ប. សម្រេចបដិសេធមិនដោះស្រាយ ដោយបានបញ្ចប់និតិវិធីដោះស្រាយកាលពីថ្ងៃសុក្រម្សិលមិញ។ នេះបើតាមការអះអាងរបស់លោក គួយ ប៊ុនរឿន ហើយការបដិសេធនេះ ខាងគណបក្សសង្គ្រោះជាតិមិនអាចទទួលយកបាននោះទេ។
មានបណ្តឹងធំៗពីរ គឺទី១ បណ្តឹងរួមទូទាំងប្រទេសរបស់គណបក្សសង្គ្រោះជាតិ ដែលប្តឹងពីការបាត់ឈ្មោះអ្នកបោះឆ្នោតរាប់លាននាក់ និងបណ្តឹងទាក់ទងនឹងការចេញទំរង់លិខិតបញ្ជាក់អត្តសញ្ញាណដល់អ្នកបោះឆ្នោតមិនត្រឹមត្រូវ រួមទាំងបណ្តឹងទឹកខ្មៅលុបលាងមិនជ្រេះ។ ចំណែកទី២ គឺបណ្តឹងស្តីពីភាពមិនប្រក្រតីនៃការរាប់សន្លឹកឆ្នោត នៅខេត្តចំនួន១៥ទូទាំងប្រទេស។
ដោយឡែកអគ្គលេខាធិការដ្ឋានក្រុមប្រឹក្សាធម្មនុញ្ញបានប្រកាសថា ខ្លួនបានត្រៀមទទួលពាក្យបណ្តឹងរបស់គណបក្សនយោបាយដែលមិនសុខចិត្តនឹងសេចក្តីសម្រេចរបស់គ.ជ.ប. ចាប់ពីថ្ងៃទីសុក្រទី ១៦ ដល់ថ្ងៃច័ន្ទទី១៩ខែសីហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ