សហរដ្ឋអាមេរិកជំរុញឲ្យគណបក្សជាប់ឆ្នោតទាំងពីរនៅកម្ពុជាចរចាគ្នា
អ្នកនាំពាក្យក្រសួងការបរទេសសហរដ្ឋអាមេរិក នៅល្ងាចថ្ងៃព្រហស្បតិ៍ម្សិលមិញ បានជំរុញឲ្យគណបក្សប្រជាជនកម្ពុជា និងគណបក្សសង្គ្រោះជាតិជួបចរចាគ្នា ដើម្បីដោះស្រាយបញ្ហាភាពមិនប្រក្រតីនៃការបោះឆ្នោត។ ការជំរុញបែបនេះបានធ្វើឡើង ខណៈដែលលោក សម រង្ស៊ី បានត្រឡប់មកដល់ប្រទេសវិញនៅថ្ងៃសុក្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
អ្នកនាំពាក្យក្រសួងការបរទេសសហរដ្ឋអាមេរិក លោកស្រី Jennifer Psaki បានថ្លែងនៅថ្ងៃព្រហស្បតិ៍ម្សិលមិញថា សហរដ្ឋអាមេរិកជំរុញឲ្យមេដឹកនាំគណបក្សជាប់ឆ្នោតទាំងពីររបស់កម្ពុជាវិលទៅរកតុចរចាឡើងវិញ និងបង្ហាញពីកិច្ចសហការគ្នាដើម្បីឲ្យចេញជាលទ្ធផលមួយសម្រាប់បម្រើផលប្រយោជន៍ប្រជាជនកម្ពុជាឲ្យបានល្អជាងនេះ។ អ្នកនាំពាក្យក្រសួងការបរទេសអាមេរិកបន្តថា ការបោះឆ្នោតកាលពីថ្ងៃទី ២៨ កក្កដា មានភាពមិនប្រក្រតីធ្ងន់ធ្ងរជាច្រើនដែលទាមទារឲ្យមានការស៊ើបអង្កេតមួយច្បាស់លាស់ និងប្រកបដោយតម្លាភាព។
ការជំរុញឲ្យមានកិច្ចចរចារកដំណោះស្រាយរវាងគណបក្សទាំងពីរបានធ្វើឡើង ខណៈដែលលោក សម រង្ស៊ី បានវិលត្រឡប់មកពីសហរដ្ឋអាមេរិកវិញនៅថ្ងៃសុក្រនេះ និងខណៈដែលគណបក្សសង្គ្រោះជាតិបានដាក់ពាក្យបណ្តឹងជាច្រើនទៅ គ.ជ.ប។ មេដឹកនាំបក្សប្រឆាំងបានប្រកាសតាមហ្វេសប៊ុកមុនពេលមកដល់កម្ពុជាថា លោកនឹងចូលរួមរកដំណោះស្រាយបញ្ហាបោះឆ្នោតនេះដោយសន្តិវិធី។ នៅឯទីក្រុងភ្នំពេញ ក្រុមចរចាគណបក្សសង្គ្រោះជាតិបានស្នើសុំជួបជាថ្មីទៀតជាមួយក្រុមចរចាគណបក្សប្រជាជនកម្ពុជា។ ប៉ុន្តែ ភាគីទាំងពីរនៅតែខ្វែងគំនិតគ្នា អំពីតួនាទីរបស់ គ.ជ.ប ដែលធ្វើឲ្យការចរចាមិនអាចទៅមុខរួច។
យ៉ាងណាក៏ដោយ ទាំងប្រជាពលរដ្ឋខ្មែរទូទៅ ក៏ដូចជាសហគមន៍អន្តរជាតិដែរ កំពុងដាក់សម្ពាធទៅលើគណបក្សទាំងពីរនេះឲ្យជួបចរចាគ្នារកដំណោះស្រាយដោយសន្តិវិធី។ កាលពីប៉ុន្មានថ្ងៃមុននេះ លោកស្រី Catherine Ashton ប្រមុខការទូតសហភាពអឺរ៉ុប ក៏បានជំរុញឲ្យមានដំណោះស្រាយស្តីពីភាពមិនប្រក្រតីក្នុងការបោះឆ្នោតនេះដែរ។ សម្ពាធទាំងនេះបានធ្វើឡើងបន្ទាប់ពីស្ថានការណ៍នយោបាយក្រោយការបោះឆ្នោតកាន់តែតឹងតែង និងអាចឈានទៅរកមហាបាតុកម្មប្រឆាំងលទ្ធផលបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ