ក្រុមហ៊ុនចិនដកខ្លួនពីការវិនិយោគលើរថយន្តក្រុង តែសាលារាជធានី អនុវត្តដោយខ្លួនឯងផ្ទាល់
សាលារាជធានីភ្នំពេញ បានសម្រេចដំណើរការដោយផ្ទាល់ ដោយមានមន្ទីរសាធារណការ និងដឹកជញ្ជូន ជាសេនាធិការ អនុវត្តនូវសេវារថយន្តក្រុង ដឹកជញ្ជូនអ្នកដំណើរតាមផ្លូវព្រះមុនីវង្ស។ មូលហេតុ មកពីក្រុមហ៊ុនចិន Global បានសម្រេចដកខ្លួនដោយសារតែបញ្ហាផ្ទៃក្នុង មិនអាចឈានទៅចុះកុងត្រាបន្តជាមួយសាលារាជធានីភ្នំពេញ។ នេះបើតាមលោក ឡុង ឌីម៉ង់ អ្នកនាំពាក្យសាលារាជធានីភ្នំពេញ។ ប៉ុន្តែ ក្រុមហ៊ុនចិនបានអះអាងការដកខ្លួននេះ ជាការផ្អាកបណ្តោះអាសន្នតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
ចាប់ពីពេលនេះតទៅ សាលាក្រុងភ្នំពេញជាអ្នកប្រតិបត្តិគ្រប់គ្រងលើសេវារថយន្តក្រុងសាធារណៈដោយខ្លួនឯងវិញម្តងហើយ។ ជាការគ្រប់គ្រងលើការសាកល្បងខែទីបី ពីថ្ងៃទី៥មេសាដល់ខែឧសភា បន្ទាប់ពីក្រុមហ៊ុនចិន Global city bus បានប្រកាសដកខ្លួនចេញក្រោយការសាកល្បងអស់រយៈពេលពីរខែមកហើយ។ នេះបើតាមការបញ្ជាក់របស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ កាលពីថ្ងៃព្រហស្បតិ៍។
អ្នកនាំពាក្យរូបនេះបានបញ្ជាក់ពីមូលហេតុនៃការដកខ្លួនរបស់ក្រុមហ៊ុនចិនថា គឺដោយសារលក្ខន្តិកៈមួយចំនួន ដែលក្រុមហ៊ុនចិនទាមទារ ប៉ុន្តែសាលារាជាធានីភ្នំពេញបានបដិសេធ។នៅមិនមានមូលហេតុណាច្បាស់លាស់ត្រូវបានលាតត្រដាងនោះទេ។ ជាការឆ្លើយតបនាយកគ្រប់គ្រងក្រុមហ៊ុនGlobal city bus លោក លឹម អង់ត្រេ បានបញ្ជាក់ថា មានបញ្ហាបច្ចេកទេសមួយចំនួនដែលបានរាំងស្ទះដល់ដំណើរចុះហត្ថលេខារវាងក្រុមហ៊ុន ដែលបំរើសេវាកម្មរថយន្តក្រុងនេះ ជាមួយសាលារាជធានីភ្នំពេញ។ ប៉ុន្តែយ៉ាងណាក៏ដោយ នាយកគ្រប់គ្រងរូបនេះបន្ថែមថា ការដកខ្លួននេះ គឺបណ្តោះអាសន្នតែប៉ុណ្ណោះ។
សូមបញ្ជាក់ថា ការសាកល្បងក្នុងខែមេសានេះ ដែលមានសាលារាជធានីភ្នំពេញជាអ្នកគ្រប់គ្រងផ្ទាល់នោះ មនុស្សចាស់វ័យពី៦៥ឆ្នាំឡើងទៅ កូនក្មេង និងជនពិការមិនត្រូវបានបង់ថ្លៃសេវានោះទេ។ សាលារាជធានីភ្នំពេញបានឱ្យដឹងថា ជាមធ្យមក្នុងមួយថ្ងៃមានអ្នកដំណើរប្រមាណ១២០០ នាក់ បានប្រើប្រាស់សេវារថយន្តក្រុងនេះ។ រថយន្តក្រុងដែលបម្រើសេវាកម្មដឹកជញ្ជូនលើខ្សែផ្លូវព្រះមុនីវង្ស ពីក្បាលថ្នល់រហូតដល់រង្វង់មូលស្តាតចាស់ ក្នុងតម្លៃ ១៥០០រៀលក្នុងម្នាក់។
សូមបញ្ជាក់ជូនថា សាលារាជធានីភ្នំពេញ និងអង្គការជប៉ុន JICA បានដាក់ឲ្យដំណើរការសេវាកម្មដឹកជញ្ជូនរថយន្តក្រុង លើកទី២កាលពីថ្ងៃទី៥ ខែកុម្ភៈ ឆ្នាំ២០១៤ ក្នុងគោលបំណងកាត់បន្ថយការកកស្ទះចរាចរណ៍ក្នុងទីក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ