រថយន្តក្រុងសាធារណៈ ត្រូវបានដាក់ឲ្យដំណើរការជាលើកទី២ ក្នុងទីក្រុងភ្នំពេញ
រថយន្តក្រុងសាធារណៈត្រូវបានសម្ពោធដាក់ឲ្យប្រើប្រាស់សាកល្បងជាផ្លូវការហើយនៅថ្ងៃទី៥កុម្ភៈនេះ។ នេះជាការសាកល្បងលើកី២ បន្ទាប់ពីការសាកល្បងដាក់ឲ្យមានសេវារថយន្តក្រុងរត់នៅក្នុងទីក្រុងភ្នំពេញ លើកទី១ កាលពីឆ្នាំ ២០០១ ។ ក្រោមកិច្ចសហការពីភ្នាក់ងារសហប្រតិបត្តិការអន្តរជាតិជប៉ុន (JICA) សាលារាជធានីបានព្យាយាមសាកល្បងដាក់ឲ្យដំណើរការរថយន្តក្រុងនេះ គឺដើម្បីកាត់បន្ថយបញ្ហាការកកស្ទះចរាចរណ៍ នៅក្នុងទីក្រុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
នៅថ្ងៃទី០៥កុម្ភៈនេះ សាលារាជធានីភ្នំពេញ សហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) បានសម្ពោធរួមគ្នា ដាក់ឲ្យដំណើការសាកល្បងរថយន្តក្រុងដឹកអ្នកដំណើរមួយខ្សែ ពីគល់ស្ពានជ្រោយចង្វា ទៅផ្សារច្បារអំពៅ ពោលគឺរត់តែនៅលើផ្លូវព្រះមុនីវង្ស ក្នុងទីក្រុងភ្នំពេញ។ គម្រោងនេះនឹងដាក់អោយសាកល្បង រយៈពេលមួយខែ គិតចាប់ពីថ្ងៃទី ០៥កុម្ភៈនេះ រហូតដល់ថ្ងៃទី ៤មិនា ឆ្នាំ២០១៤។ អ្នកដំណើរចំណាយតែ១៥០០រៀលប៉ុណ្ណោះ សម្រាប់ការធ្វើដំណើរមួយជើង។
តាមការប្រកាសរបស់សាលារាជធានី រថយន្តក្រុងដែលដាក់ឲ្យចរាចរណ៍ក្នុងកំឡុងពេលមួយខែនេះ មានចំនួន ១០គ្រឿង ដោយរថយន្តមួយគ្រឿង អាចផ្ទុកអ្នកដំណើរបាន ៣៥កៅអី។ ជាប្រភេទរថយន្តក្រុងទំនើប មានម៉ាស៊ីនត្រជាក់ ប្រកបដោយផាសុកភាព។ រថយន្តក្រុងនេះចាប់ចេញដំណើរពីម៉ោង៥និង៣០នាទីព្រឹក រហូតដល់ម៉ោង៨និង៣០នាទីយប់ ក្នុងចន្លោះពីចំណតមួយ ទៅចំណតមួយ មានចម្ងាយ៥០០ម៉ែត្រ ហើយរថយន្តត្រូវឈប់ទទួលភ្ញៀវតែមួយនាទីប៉ុណ្ណោះ សម្រាប់ចំណតនីមួយៗ។ ចាប់ពីកន្លែងចេញដំណើររហូតដល់គោលដៅ មានចំណតទាំងអស់សរុបចំនួន ៣៦។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានប្រាប់វិទ្យុបារាំង កាលពីពេលកន្លងមកថា ការដាក់ឲ្យប្រើប្រាស់រថយន្តក្រុងសាធារណៈនេះ គឺក្នុងគោលបំណងកាត់បន្ថយការស្ទះ និងគ្រោះថ្នាក់ចរាចរណ៍ក្នុងទីក្រុង។ លោក ឡុង ឌីម៉ង់ បាននិយាយថា កំណើនប្រជាជន និងការដឹកជញ្ជូន មានការកើនឡើងយ៉ាងគំហុក ក្នុងរយៈពេល ១០ឆ្នាំចុងក្រោយនេះ ពោលគឺគិតត្រឹមឆ្នាំ ២០១៤នេះ មានរថយន្តជាង ៤០ម៉ឺនគ្រឿង និងម៉ូតូជាង ១លានគ្រឿង ត្រូវបានចុះបញ្ជីនៅមន្ទីរសាធារណការក្រុងភ្នំពេញ។
លោក ម៉ាសាតូ កូតូ តំណាងអង្គការ JICA ប្រចាំកម្ពុជា បានប្រាប់វិទ្យុបារាំងថា ដំណើរការសាកល្បងនេះ នឹងចំណាយប្រាក់របស់គម្រោងអង្គការ JICA ហើយប្រសិនបើគម្រោងនេះ ជោគជ័យ JICA នឹងដាក់ឲ្យដំណើការទាំងស្រុងនូវសេវារថយន្តក្រុងនេះ នៅក្នុងឆ្នាំ២០១៦។
ចំណែកសាលារាជធានីភ្នំពេញ ក៏បានបញ្ជាក់ដែរថា បន្ទាប់ពីការដាក់ឲ្យដំណើរការរថយន្តក្រុង ក្នុងរាជធានីភ្នំពេញ ជំហានទី១ លើកទី២ តាមបណ្តោយផ្លូវព្រះមុនីវង្ស សាលារាជធានី ក៏គ្រោងដាក់ឲ្យដំណើរការ ជំហានទី២ តាមបណ្តោយផ្លូវកម្ពុជាក្រោម និងជំហានទី៣ តាមបណ្តោយផ្លូវម៉ៅសេទុង បន្តទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ