ក្រុមហ៊ុនប្រមូលសំរាមសាកល្បងប្រើប្រព័ន្ធបច្ចេកវិទ្យាGPS និង GIS
ប្រព័ន្ធGPS បំពាក់ក្នុងរថយន្តប្រមូលសំរាម និងប្រព័ន្ធGISក្នុងកុំព្យូទ័រ ត្រូវបានដាក់អោយសាកល្បងក្នុងរយៈពេល៦ខែ ដោយចាប់ផ្តើមពីខែមេសានេះតទៅ។ ការដាក់ឲ្យសាកល្បងនេះធ្វើឡើង នៅក្នុងខណ្ឌដូនពេញ រាជធានីភ្នំពេញ ក្នុងគោលដៅ ជួយសំរួលអោយការប្រមូលសំរាមនិងការសំអាតទីក្រុង កាន់តែមានប្រសិទ្ធភាព។ ប្រសិនបើគម្រោងនេះទទួលបានលទ្ធផលវិជ្ជមាន អ្នកគ្រប់គ្រងជាន់ខ្ពស់ក្រុមហ៊ុនស៊ិន ទ្រី និងសាលារាជធានីភ្នំពេញ សុទ្ធតែអះអាងថា ចង់បន្តពង្រីកប្រព័ន្ធនេះនៅគ្រប់ទូទាំងខណ្ឌ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
សាលារាជធានីភ្នំពេញ ក្រុមហ៊ុន ស៊ិនទ្រី និងមូលនិធិអាស៊ី បានសហការគ្នាសាកល្បងគម្រោងប្រមូលសំរាមដោយបំពាក់បច្ចេកវិទ្យាGPS និង GIS ។ លោក សេង ប៊ុនរិទ្ធ នាយកគ្រប់គ្រងជាន់ខ្ពស់នៃការិយាល័យស្រាវជ្រាវនិងអភិវឌ្ឍន៍របស់ក្រុមហ៊ុនស៊ិនទ្រី បានប្រាប់វិទ្យុបារាំងអន្តរជាតិ RFI ថា នៅក្នុងគម្រោងនេះ មូលនិធិអាស៊ីបានផ្តល់ជាបច្ចេកទេស និង ឧបករណ៍បំពាក់ ព្រមទាំងការបណ្តុះបណ្តាលដល់បុគ្គលិកក្រុមហ៊ុន ។
លោកបានបញ្ជាក់ថានៅពេលនេះ ដំណើរការនៃគម្រោងនេះ ឋិតនៅក្នុងកំរិតដំបូង ដោយទើបតែមានការបំពាក់ឧបករណ៍ក្នុងរថយន្ត ហើយចំពោះប្រព័ន្ធត្រួតពិនិត្យមិនទាន់តម្លើងរួចរាល់ទេ ។ ចំនែក ក្នុងសប្តាហ៍នេះ មូលនីធិអាស៊ី នឹងចុះមកបណ្តុះបណ្តាលបុគ្គលិកស៊ិនទ្រី ហើយសប្តាហ៍ក្រោយ ពួកគេនឹងចាប់ផ្តើមពិនិត្យលើទិន្នន័យ ដែលទទួលបានពីប្រព័ន្ធនោះ ។
លោក សេង ប៊ុនរិទ្ធ បានអោយដឹងទៀតថា ប្រព័ន្ធបច្ចេកវិទ្យា GPS និង GIS នេះ នឹងអាចអោយគេងាយស្រួលនៅក្នុងការតាមដានប្រតិបត្តិការប្រមូលសំរាម។ បើតាមការចុះផ្សាយរបស់គេហទំព័រសាលាក្រុងភ្នំពេញ ការប្រើប្រាស់ប្រព័ន្ធនេះ អាចផ្តល់អោយសេវាប្រមូលសំណល់បានកាន់តែលឿន ជួយសន្សំសំចៃប្រេង ហើយអាចអោយសាធារណជនមើលព័ត៌មានសំរាមបាន និងចូលរួមកែលំអការផ្តល់សេវាសំណល់រឹងផងដែរ។
លោក សេង សាវី ប្រធានក្រុមហ៊ុនស៊ិនទ្រី បញ្ជាក់ថា គម្រោងសាកល្បងប្រតិបត្តិការប្រមូលសំរាមនៅខណ្ឌដូនពេញ រយៈពេល៦ខែ ដោយប្រើប្រព័ន្ធបច្ចេកវិទ្យាGPS និង GIS នេះ មានគោលដៅ លើកម្ពស់ការប្រមូលសំរាម ដើម្បីរៀបចំការសំអាតក្រុង ធ្វើយ៉ាងណាអោយបានស្អាត។ យ៉ាងណាក៏ដោយ ការសំអាតក្រុងនេះ ក៏ត្រូវមានការសហការពីអាជ្ញាធរ ក្រុមហ៊ុន និង ប្រជាជនផងដែរ។
ចំណែក លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានបង្ហាញសុទិដ្ឋិនិយមថា ប្រសិនបើគម្រោងនេះទទួលជោគជ័យ មូលនិធិអាស៊ីអាចនឹងបន្តសហការជាមួយ សាលារាជធានីភ្នំពេញ និងក្រុមហ៊ុនប្រមូលសំរាម ស៊ីនទ្រី ពង្រីកការប្រើប្រាស់ប្រព័ន្ធបច្ចេកវិទ្យាទំនើបនេះ នៅគ្រប់ទូទាំងខណ្ឌ។
សូមបញ្ជាក់ថា កាលពីថ្ងៃទី០៣ មេសា សាលារាជធានីភ្នំពេញ ក្រុមហ៊ុនស៊ិនទ្រី និងមូលនិធិអាស៊ី បានចុះហត្ថលេខាលើអនុស្សរណៈ ស្តីពីគម្រោងសាកល្បងប្រតិបត្តិការប្រមូលសំរាមនៅខណ្ឌដូនពេញ ដោយប្រើប្រព័ន្ធGPS និងGIS។ នៅក្នុងពិធីចុះអនុស្សរណៈនេះ លោក ប៉ាសុជាតិវង្ស អភិបាលរាជធានីភ្នំពេញ បានបញ្ជាក់ថា បញ្ហាសំរាមជាកង្វល់ដ៏ធំមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ