សមត្ថកិច្ចពង្រឹងសន្តិសុខកាន់តែខ្លាំងសម្រាប់ពេលប្រជុំអាស៊ាន
កងកម្លាំងមានសមត្ថកិច្ចចម្រុះ ត្រូវបានដាក់ពង្រាយនៅតាមគោលដៅសំខាន់ៗហើយចាប់ពីថ្ងៃនេះទៅ ដើម្បីពង្រឹងសន្តិសុខក្នុងពេលកិច្ចប្រជុំអាស៊ានដែលនឹងចាប់ផ្តើមពីថ្ងៃសុក្រស្អែកនេះទៅ។ស្នងការរាជធានីភ្នំពេញ លោកឧត្តមសេនីយ ទូច ណារ៉ុថបានប្រាប់សារព័ត៌មានក្នុងស្រុកថាការងារពង្រឹងសន្តិសុខត្រូវបានធ្វើកាន់តែខ្លាំងជាងមុនពីព្រោះមានគណៈប្រតិភូជិត ៣០ប្រទេសដែលនឹងមានវត្តមាននៅក្នុងរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
អាជ្ញាធររាជធានីភ្នំពេញនិងកំលាំងសមត្ថកិច្ចលើផ្ទៃប្រទេស បានចាប់ផ្តើមការងារការពារសន្តិសុខរបស់ខ្លួនហើយនៅថ្ងៃព្រហស្បតិ៍នេះ។ កម្លាំងប៉ូលីសគ្រប់ឯកសណ្ឋាន មានបំពាក់អាវុធផង ត្រូវបានដាក់ពង្រាយនៅតាមមហាវិថីសំខាន់ៗ ពិសេសគឺជាមហាវិថីដែលគណៈប្រតិភូ ធ្វើដំណើរដូចជាមហាវិថីសហព័ន្ធរុស្ស៊ីនិងនរោត្តម និងម៉ៅ សេទុង។
ការហ្វឹកហាត់របស់ប៉ូលីសប្រឆាំងបាតុកម្មក៏មានដូចពេលមុនដែរ។ លោកឧត្តមសេនីយទូច ណារ៉ុថ ស្នងការរាជធានីភ្នំពេញ បានថ្លែងប្រាប់អ្នកសារព័ត៌មានថា បើទោះជាកិច្ចប្រជុំលើកនេះមិនមានវត្តមានប្រមុខដឹកនាំប្រទេសដូចកាលពីខែមេសាកន្លងទៅមែន ប៉ុន្តែវានឹងមានវត្តមានរដ្ឋមន្ត្រីការបរទេសប្រមាណ៣០ប្រទេសដែលនឹងមកចូលរួមក្នុងកិច្ចប្រជុំលើកនេះ។ ដូច្នេះវត្តមានគណៈប្រតិភូដ៏ច្រើនយ៉ាងនេះត្រូវទាមទារអោយសមត្ថកិច្ចកម្ពុជាប្រុងប្រយ័ត្នខ្ពស់។
សម្រាប់លោកស្នងការ សន្តិសុខដែលត្រូវពង្រឹងខ្លាំងនោះ គឺនៅតំបន់ប្រជុំវិមានសន្តិភាព និងនៅតាមសណ្ឋាគារដែលគណៈប្រតិភូស្នាក់នៅ។យោងតាមការអះអាងរបស់លោកអភិបាលរាជធានីភ្នំពេញ នៅក្នុងកិច្ចប្រជុំអាស៊ានលើកនេះ សមាជិកប្រតិភូ និងភរិយារបស់ថ្នាក់ដឹកនាំប្រតិភូជាច្រើនបានស្នើសុំដើរទស្សនកិច្ចតាមទីផ្សារ។
កាលពីប៉ុន្មានសប្តាហ៍មុន អភិបាលរាជធានីភ្នំពេញលោកកែប ជុតិមាបានបញ្ជាអោយត្រៀមរថយន្តប៉ូលីសស្ទូចជាច្រើនគ្រឿងដើម្បីត្រៀមស្ទូចរថយន្តដែលចតគ្មានសណ្តាប់ធ្នាប់នៅតាមផ្សារធំចំនួន២ ដែលត្រូវបានចាត់ទុកថា ជាផ្សារគំរូ គឺផ្សារធំថ្មី និងផ្សារទួលទំពូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ