អ្នកកាសែតជាតិនិងអន្តរជាតិប្រមាណ១០០០នាក់យកព័ត៌មានពីអាស៊ានលើកនេះ
មន្ត្រីជាន់ខ្ពស់ក្រសួងព័ត៌មានបានអះអាងអោយដឹងថានឹងមានអ្នកកាសែតយ៉ាងហោចណាស់១០០០នាក់ដែលត្រូវមានវត្តមាននៅក្នុងព្រឹត្តិការណ៍ប្រជុំអាស៊ានចាប់ពីថ្ងៃសុក្រសប្តាហ៍នេះទៅ។ ចំនួនអ្នកកាសែតកើនឡើងជាងពេលមានកិច្ចប្រជុំអាស៊ានក្នុងខែមេសា ដូច្នេះការងារត្រៀមរៀបចំទទួលអ្នកកាសែតក៏ត្រូវមានច្រើនជាងមុនដែរ។
ចុះផ្សាយនៅថ្ងៃ៖
ស្តាប់ - ០១:៣៩
យោងតាមការបញ្ជាក់របស់មន្ត្រីក្រសួងព័ត៌មាន រហូតមកដល់ពេលនេះ ក្រុមការងារចុះឈ្មោះអ្នកសែតបានទទួលអ្នកកាសែតបរទេសចំនួន៤១៤នាក់ ដែលមកពីប្រទេសចំនួន២០ និងពីអង្គភាពចំនួន៩០។ ចំណែកឯអ្នកកាសែតកម្ពុជាមានចំនួន៤៦៣នាក់ មកពី៣៥អង្គភាព និងមន្រី្តបម្រើការក្នុងមជ្ឈមណ្ឌលព័ត៌មានមានចំនួន៨៨នាក់ផ្សេងទៀត។
ទោះយ៉ាងនេះក្តី ចំនួនអ្នកកាសែតនឹងអាចកើនឡើងបន្ថែមទៀតនៅពេលកិច្ចប្រជុំចាប់ផ្តើមពីថ្ងៃទី៦កក្កដានោះ។ នោះគឺអ្នកសារព័ត៌មានបរទេសដែលមកតាមគណៈប្រតិភូផ្ទាល់។
លោកប៊ុត បូវុត អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានបានប្រាប់វិទ្យុបារាំងអន្តរជាតិអោយដឹងថា ក្រុមការងារក្រសួងព័ត៌មានត្រូវមានការងារច្រើនជាងលើកមុន ក្នុងការរៀបចំទទួលអ្នកកាសែត។
អ្នកទទួលខុសត្រូវរូបនេះបញ្ជាក់ថា «មានការងារមួយចំនួនដែលគេត្រូវរៀបចំអោយល្អជាងមុន គឺអោយល្អជាងព្រឹត្តិការណ៍អាស៊ានក្នុងខែមេសាកន្លងទៅ។ ពោលគឺស្តង់ការិយាល័យសម្រាប់ទីភ្នាក់ងារព័ត៌មានបរទេសនឹងមានច្រើនជាងមុន។ ការរៀបចំអាហារក៏ត្រូវមានរបៀប និងសណ្តាប់ធ្នាប់ជាងពេលមុនដែរ។ ហើយនឹងមានការរៀបចំអាហារសម្រាប់អ្នកកាសែតមូស្លីមទៀតផង។ គួររម្លឹកថា នៅក្នុងកិច្ចប្រជុំកំពូលអាស៊ានកាលពីខែមេសាកន្លង ក្រសួងព័ត៌មានបានរៀបចំផ្តល់អាហារពេញមួយថ្ងៃដល់អ្នកកាសែត ព្រមទាំងឧបករណ៍ចាំបាច់នានាទៀតផង ដែលធានាដល់ការផ្សព្វផ្សាយដោយរលូនរបស់អ្នកសារព័ត៌មាន។
សូមរម្លឹកថា កិច្ចប្រជុំអាស៊ានលើកនេះនឹងមានកិច្ចប្រជុំជាអន្តរជាតិជាច្រើនដែលនឹងប្រព្រឹត្តទៅពីថ្ងៃសុក្រទី៦ដល់ថ្ងៃទី១៣កក្កដា។ ក្នុងនោះកិច្ចប្រជុំដែលសំខាន់ខ្លាំងនោះ គឺវេទិកាតំបន់អាស៊ានដែលនឹងមានប្រទេសធំៗ៣០ប្រទេសចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ