Bill Richardson៖ទស្សនកិច្ចរបស់គាត់នៅកូរ៉េខាងជើងគ្មានជាប់ទាក់ទងនឹងរដ្ឋាភិបាលអាមេរិកឡើយ
អតីតប្រមុខការទូតអាមេរិកប្រចាំអសប Bill Richardson និងប្រធានក្រុមហ៊ុន Google Eric Schmidt បានធ្វើដំណើរឆ្ពោះទៅកាន់ប្រទេសកូរ៉េខាងជើងនៅថ្ងៃចន្ទ៧មករានេះ។ មុននឹងចាកចេញពីទីក្រុងប៉េកាំងលោក Bill Richardsonនិងលោក Eric Schmidt បានប្រកាសជាថ្មីម្តងទៀតថាដំណើរទស្សនកិច្ចនេះ ពុំមានជាប់ទាក់ទងនឹងរដ្ឋាភិបាលអាមេរិកឡើយនិងមានលក្ខណៈជាឯកជនសុទ្ធសាធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
គឺជាបេសកកម្មមនុស្សធម៌និងជាលក្ខណៈឯកជនសុទ្ធសាធពុំជាប់ទាក់ទងជាមួយរដ្ឋាភិបាលអាមេរិកឡើយ -នេះជាការប្រកាសរបស់លោក Bill Richardson អតីតប្រមុខការទូតអាមេរិកប្រចាំអសបដល់ក្រុមអ្នកកាសែត ក្រោយពីក្រសួងការបរទេសអាមេរិកបានវាយតម្លៃទៅលើដំណើរទស្សនកិច្ចនេះក្នុងរបៀបជាការលាក់លាម។
អតីតអ្នកការទូតអាមេរិកនេះ បានថ្លែងទៀតថា« លោកនិងប្រធានក្រុមហ៊ុន Google Eric Schmidt នឹងត្រូវស្នាក់នៅទីក្រុងព្យុងយ៉ាងចំនួន២ថ្ងៃកន្លះ ហើយពួកលោកក៏ប្រហែលជានឹងចេញដំណើរទៅខាងក្រៅទីក្រុងព្យុងយ៉ាងដែរ”-នេះជាការគូសបញ្ជាក់បន្ថែមរបស់លោក Richardson មុននឹងឡើងយន្តហោះរបស់លោកពីទីក្រុងប៉េកាំងឆ្ពោះទៅកាន់ទីក្រុងព្យុងយ៉ាង ប្រទេសកូរ៉េខាងជើង។
លោក Richardson ដែលជាអតីតអភិបាលរដ្ឋអាមេរិកនៅ Nouveau-Mexique ភាគនារតីនៃសហរដ្ឋអាមេរិក ស្គាល់ប្រទេសកូរ៉េខាងជើងយ៉ាងច្បាស់ណាស់ ដោយលោកធ្លាប់បានធ្វើកិច្ចចរចាជាមួយកូរ៉េខាងជើងដើម្បីសុំការដោះលែង អាណិកជនជាតិអាមេរិកជាច្រើនរូបចាប់តាំងពី២០ឆ្នាំកន្លងមកហើយ។
នៅក្នុងអំឡុងដំណើរទស្សនកិច្ចនេះ អតីតប្រមុខការទូតអាមេរិក ក៏ប្រាថ្នាលើកនិយាយជាមួយអាជ្ញាធរកូរ៉េខាងជើងដែរ អំពីករណីជនជាតិអាមេរិកម្នាក់ដើមកំណើតកូរ៉េឈ្មោះ Kenneth Bae ដែលត្រូវបានក្រុងព្យុងយ៉ាងចាប់ខ្លួនកាលពីខែធ្នូកន្លងមកនេះ។
ក្រសួងការបរទេសអាមេរិកវិញ កាលពីថ្ងៃព្រហស្បតិ៍មុន បានវាយតម្លៃដោយភាពប្រុងប្រយ័ត្ន នៅលើភាពសមហេតុសមផលនៃដំណើរទស្សនកិច្ចរបស់លោក Richardson នៅកូរ៉េខាងជើងនិងបានចាត់ទុកថា ជាដំណើរទស្សនកិច្ចមួយដែលគ្មានលក្ខណៈជាការស្ថាបនាអ្វីឡើយ-នេះជាការថ្លែងរបស់លោកស្រី Victoria Nuland អ្នកនាំពាក្យរបស់ក្រសួងការបរទេសអាមេរិក។
ម្យ៉ាងទៀត លោក Richardson នឹងត្រូវ ធ្វើសន្និសីទកាសែតមួយនៅទីក្រុងប៉េកាំងនៅថ្ងៃព្រហស្បតិ៍ខាងមុខ-នេះជាការគូសបញ្ជាក់របស់ការិយាល័យរបស់លោក។
លោក Richardson បានបន្តទៀតថា" ប្រធានក្រុមហ៊ុន Google ដែលជាមិត្តម្នាក់របស់លោក ធ្វើទស្សនកិច្ចនៅកូរ៉េខាងជើងនេះ ក្នុងលក្ខណៈជាឯកជនសុទ្ធសាធនិងក៏ពុំមែនសំរាប់ក្រុមហ៊ុន Google ដែរ"។
ប្រមុខការទូតអាមេរិក ក៏បានគូសបញ្ជាក់ទៀតថា លោក Eric Schmidt ជាមនុស្សចូលចិត្តនិងចាប់អារម្មណ៍ខ្លាំងទៅលើនយោបាយការបរទេស ហេតុដូច្នេះហើយបានជាលោកគិតថា ជាការសំខាន់ណាស់ដែលគាត់ចង់ដឹងនូវទស្សនវិស័យដ៏ទូលំទូលាយមួយនៅលើដំណើរទស្សនកិច្ចនៅកូរ៉េខាងជើងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ