អ.ស.ប.ថ្កោលទោស ព្យុងយ៉ាងផ្គើនពង្រីកបន្ថែមកម្មវិធីនុយក្លេអ៊ែរ
គ្មានញញើតនឹងទណ្ឌកម្មរបស់អង្គការសហប្រជាជាតិ កូរ៉េខាងជើង បានព្រមានតបវិញយ៉ាងទាន់ហន់ នៅល្ងាចថ្ងៃអង្គារទី ២២មករា ឆ្នាំ២០១៣ ម្សិលមិញ ថានឹងពង្រឹងពង្រីកអាវុធ និងកម្មវិធីនុយក្លេអ៊ែររបស់ខ្លួនជាបន្តទៀត។ សេចក្តីព្រមាននេះធ្វើឡើងតែប៉ុន្មានម៉ោង ក្រោយការអនុម័តជាឯកច្ឆ័ន្ទ លើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិប្រឆាំងនឹងការបាញ់បង្ហោះផ្កាយរណបរបស់ព្យុងយ៉ាង កាលពីខែធ្នូឆ្នាំ២០១២កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
កូរ៉េខាងជើងបានធានាអះអាងថា ការបាញ់បង្ហោះកាំជ្រួច កាលពីថ្ងៃទី ១២ធ្នូ ឆ្នាំ២០១២ គឺដើម្បីបញ្ជូនផ្កាយរណបទៅក្នុងតារាវិថី តែប៉ុណ្ណោះ ប៉ុន្តែក្រុមប្រឹក្សាសន្តិសុខអង្គការសហប្រជាជាតិមិនជឿ ! សមាជិកទាំង១៥ យល់ថាជាការសាកល្បងបាញ់មីស្ស៊ីលរយៈឆ្ងាយ ! ដូច្នេះជាឯកច្ឆ័ន្ទ ក្រុមប្រឹក្សាសន្តិសុខអង្គការសហប្រជាជាតិ បានអនុម័តលើសេចក្តីសម្រេចចិត្តមួយ ពង្រីកទណ្ឌកម្មបន្ថែមប្រឆាំងនឹងកូរ៉េខាងជើង នៅល្ងាចមិញ និងជាលើកទីមួយ គិតក្នុងរយៈពេលបីឆ្នាំចុងក្រោយនេះ។ សហគ្រាសចំនួន ៥ ធនាគារមួយ និងអ្នកទទួលខុសត្រូវកម្មវិធីនុយក្លេអ៊ែរបួនរូប ត្រូវចាត់ចូលក្នុងបញ្ជីខ្មៅ បិទខ្ទប់ទ្រព្យសម្បត្តិ និងហាមឃាត់មិនឱ្យធ្វើដំណើរទៅបរទេស។
សេចក្តីសម្រេចចិត្តរបស់ក្រុមប្រឹក្សានេះ ជាផ្លែផ្កានៃការចរចារវាងសហរដ្ឋអាមេរិកនិងចិន ដែលទីបំផុតមិនបានដាក់ទណ្ឌកម្មត្រង់ទេ បានត្រឹមតែព្រមានមេដឹកនាំថ្មីនៃរបបក្រុងព្យុងយ៉ាង លោក គីម ជុងអ៊ុន មិនឱ្យសម្រេចចិត្តធ្វើការសាកល្បងនុយក្លេអ៊ែរណាថ្មីទៀត។ ប៉ុន្តែទណ្ឌកម្មនេះ ហាក់ដូចជាគ្មានប្រសិទ្ធិភាពឡើយ ព្រោះពីរបីម៉ោងក្រោយការអនុម័តរបស់អង្គការសហប្រជាជាតិ ក្រសួងការបរទេសកូរ៉េខាងជើង បានចេញសេចក្តីជូនដំណឹងមួយថា នឹងខិតខំចាត់វិធានការគ្រប់យ៉ាង ដើម្បីធ្វើយ៉ាងណាបង្កើន និងពង្រឹងអំណាចយោធារបស់ខ្លួន ដោយត្រូវអភិវឌ្ឍន៍កម្មវិធីនុយក្លេអ៊ែរផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ