ប្រមុខការទូតកម្ពុជា៖ បញ្ហាសមុទ្រចិនខាងត្បូងមិនគួរជាបញ្ហាអន្តរជាតិទេ
កម្ពុជាក្នុងនាមជាប្រធានអាស៊ាន តាមរយៈលោកប្រមុខការទូត ហោ ណាំហុង បានលើកឡើងថានៅថ្ងៃចន្ទនេះថា បញ្ជាក់ពីជំហរកម្ពុជា នៅចំពោះជម្លោះនៅសមុទ្រចិនភាគខាងត្បូង រវាងចិននិងបណ្តាប្រទេសសមាជិកអាស៊ាន រួមមាន វៀតណាម ហ្វីលីពីន ម៉ាឡេស៊ីនិងព្រុយណេ គឺបញ្ហានេះ គួរតែលើកទឹកចិត្តឲ្យប្រទេសចិន និងអាស៊ាន ចាប់ផ្តើមពិភាក្សាអំពីចំណុចគន្លឹះ នៃពង្រាងក្រមប្រតិបត្តិសមុទ្រចិនខាងត្បូងហៅកាត់ថា COC។ ក៏ប៉ុន្តែលោក ហោ ណាំហុង បានលើកឡើងថា បញ្ហាជម្លោះសមុទ្រចិនខាងត្បូងគេមិនគួរធ្វើជាអន្តរជាតិភាវូបនីយកម្មទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
នៅក្នុងកិច្ចប្រជុំជាមួយរដ្ឋមន្ត្រីការបរទេសអូស្ត្រាលី នាព្រឹកថ្ងៃទី២៦ ខែមីនា ឆ្នាំ២០១២ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា បានពិភាក្សាអំពីបញ្ហាសមុទ្រចិនខាងត្បូង។
លោកប្រមុខការទូត ហោ ណាំហុង បានជម្រាបទៅរដ្ឋមន្ត្រីការបរទេសអូស្ត្រាលីថា បញ្ហានេះ យើងគួរតែលើកទឹកចិត្ត អោយប្រទេសចិន និងអាស៊ាន ចាប់ផ្តើមធ្វើការពិភាក្សាអំពីចំនុចគន្លឹះ នៃពង្រាងក្រមប្រតិបត្តិសមុទ្រចិនខាងត្បូង COC ដោយសារចិនមានបំណងចូលរួមជាមួយអាស៊ាន ដើម្បីពិភាក្សាបញ្ហានេះ។ តាមលោកប្រមុខការទូត ហោ ណាំហុង ជាការល្អ ដែលយើងត្រូវតែលើកទឹកចិត្ត ហើយចិនថ្មីៗនេះ ក៏បានស្នើអោយបង្កើតក្រុមឥស្សរៈជនឆ្នើម IPG ដើម្បីតាក់តែងពង្រាងក្រមប្រតិបត្តិសមុទ្រចិនខាងត្បូង COC នេះផងដែរ។
លោកឧបនាយករដ្ឋមន្ត្រី ហោ ណាំហុង ក៏បានបញ្ជាក់ថា យើងមិនគួរយកបញ្ហាសមុទ្រចិនខាងត្បូង ធ្វើជាអន្តរជាតិភាវូបនីយកម្មទេ។ ម្យ៉ាងទៀត ការលើកយកបញ្ហាសមុទ្រចិនខាងត្បូងធ្វើជាលក្ខណៈអន្តរជាតិ នឹងនាំអោយស្មុគស្មាញ និងមិនឆ្លើយតបនឹងផលប្រយោជន៍ប្រទេសណាមួយទេ។
ជំហររបស់កម្ពុជាយ៉ាងដូច្នេះ ធ្វើឡើងតែប៉ុន្មានប៉ុណ្ណោះ មុនដំណើរទស្សនកិច្ចរបស់ប្រធានាធិបតីចិន លោក ហ៊ូ ជិនតាវ នឹងមកកម្ពុជា នាថ្ងៃទី៣០មីនា ចុងសប្តាហ៍នេះ។ ចិន មានបំណង មិនចង់ឲ្យអាស៊ាន ដែលត្រូវបើកកិច្ចប្រជុំកំពូល នៅកម្ពុជា ចាប់ពីថ្ងៃទី៣០មីនា ដល់ថ្ងៃទី៤មេសា លើកយកបញ្ហាជម្លោះចិនខាងត្បូង មកពិភាក្សាឡើយ។
ចិនជាអ្នកផ្តល់ជំនួយដ៏ច្រើនដល់កម្ពុជា សម្រាប់រៀបចំកិច្ចប្រជុំកំពូលអាស៊ាន ជាពិសេសកម្ពុជាក៏បានទទួលជំនួយ និងប្រាក់កម្ចីពីចិនរាប់រយលានដុល្លារ ក្នុងមួយឆ្នាំៗ។
ជាមួយនឹងការបញ្ជាក់ជំហររបស់កម្ពុជាខាងលើនេះ ក្នុងកិច្ចប្រជុំជាមួយរដ្ឋមន្ត្រីការបរទេសអូស្ត្រាលី លោក បុប ខារ ( Bob Carr ) នៅព្រឹកថ្ងៃទី២៦មីនា ឆ្នាំ២០១២ ប្រមុខការទូតកម្ពុជា និងអូស្ត្រាលី បានពិភាក្សាលើបញ្ហាសំខាន់ៗមួយចំនួន ដូចជា បញ្ហាសហប្រតិបត្តិការទ្វេភាគី ទំនាក់ទំនងការទូត នយោបាយក្នុងតំបន់ សេដ្ឋកិច្ច ពាណិជ្ជកម្ម និងបញ្ហាគ្រោះមហន្តរាយ ជាដើម។
ក្នុងកិច្ចប្រជុំ ប្រមុខការទូតទាំងពីរ ក៏បានសាទរចំពោះការផ្លាស់ប្តូរ កែទម្រង់និងការឈានទៅមុខនៃប្រជាធិបតេយ្យភាវូបនីយកម្ម នៅមីយ៉ាន់ម៉ា។ នោះគឺ ប្រទេសអូស្ត្រាលី បានយល់ព្រមលើកទណ្ឌកម្មសេដ្ឋកិច្ច លើប្រទេសមីយ៉ាន់ម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ