ការពន្លឿនកិច្ចចរចាពាក់ព័ន្ធនឹងបញ្ញត្តិសម្រាប់តំបន់សមុទ្រចិនខាងត្បូង
សមាគមប្រជាជាតិអាស៊ីអាគ្នេយ៍ឬអាស៊ាននិងប្រទេសចិនគួរតែខិតខំពន្លឿនកិច្ចចរចាដើម្បីសម្រចឲ្យបាននូវ “បញ្ញត្តិ”សម្រាប់តំបន់សមុទ្រចិនខាងត្បូងទាំងមូល។ នេះជាសេចក្តីថ្លែងប្រកាសរបស់លោកប្រធានាធិបតីឥណ្ឌូនេស៊ី Susilo Bambang Yudhoyono នៅថ្ងៃអង្គារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
“ជាការចាំបាច់យើងត្រូវពន្លឿនកិច្ចចរចាដើម្បីសម្រចឲ្យបាននូវ “បញ្ញត្តិ”សម្រាប់តំបន់សមុទ្រចិនខាងត្បូងទាំងមូល។ ទាំងនេះ ដើម្បីជួយផ្តល់ឲ្យមានស្ថិរភាពក្នុងតំបន់ ហើយយើងនឹងត្រូវគិតគូរដល់បញ្ហាដទៃទៀត”។ នេះជាសេចក្តីថ្លែងប្រកាសរបស់លោកប្រធានាធិបតីឥណ្ឌូនេស៊ី Susilo Bambang Yudhoyono ទៅកាន់រដ្ឋមន្ត្រីក្រសួងការបរទេសនៃប្រទេសអាស៊ាននាឱកាសជំនួបប្រជុំនៅកោះបាលី។
បានជាលោកប្រធានាធិបតីឥណ្ឌូនេស៊ីថ្លែងបែបនេះ មកពីលោកឃើញកិច្ចចរចារវាងអាស៊ាននិងប្រទេសចិនមានដំណើរសែនយឺតយ៉ាវ។ មូលហេតុនេះហើយដែលជំរុញឲ្យលោក Susilo Bambang Yudhoyono ថ្លែងបញ្ជាក់ថា “យើងត្រូវបញ្ជូនសារដ៏ខ្លាំងក្លាមួយដើម្បីឲ្យពិភពលោកដឹងថា បញ្ហាសមុទ្រចិនខាងត្បូងគឺជាបញ្ហាដែលអាស៊ាននិងចិនអាចនឹងក្តោបក្តាប់ដោះស្រាយបាន គឺជាបញ្ហាសុទិដ្ឋិនិយម”។
ជំនួបអាស៊ានដែលមានរយៈពេល៥ថ្ងៃនៅប្រទេសឥណ្ឌូនេស៊ីចាប់ពីថ្ងៃអង្គារទី១៩កក្កដានេះរហូតដល់ថ្ងៃសៅរ៍ទី២៣កក្កដាឆ្នាំ២០១១ ដែលជាថ្ងៃចុងក្រោយហើយជាថ្ងៃដែលរដ្ឋមន្ត្រីក្រសួងការបរទេសអាស៊ាននឹងមានជំនួបពិភាក្សាស្ដីពីបញ្ហាសន្តិសុខជាមួយរដ្ឋមន្ត្រីក្រសួងការបរទេសនៃប្រទេសចិន ជប៉ុន និងសហរដ្ឋអាមេរិកក្នុងក្របខ័ណ្ឌនៃជំនួបForumពិភាក្សាពីសន្តិសុខនៃតំបន់អាស៊ាន ASEAN Regional Forum security dialogue។
គួរកត់សម្គាល់ថា តំបន់សមុទ្រចិនខាងត្បូងដែលក្នុងនោះមានទីប្រជុំកោះ Spratly និងទីប្រជុំកោះ Paracels ដែលដណ្ដើមទាមទារចង់បានដោយប្រទេសចិន ហ្វ៊ីលីពីន វៀតណាម ព្រុយណេ ម៉ាឡេស៊ី និងតៃវ៉ាន់។ តំបន់សមុទ្រចិនខាងត្បូងនេះល្បីសម្បូណ៌ទៅដោយសម្បត្តិធម្មជាតិ ហើយក៏ជាផ្លូវសមុទ្រដ៏សែនសំខាន់សម្រាប់នាវាធ្វើដំណើរឆ្លងកាត់ដើម្បីដឹកជញ្ជូនទំនិញ។
សហរដ្ឋអាមេរិក ដែលបានចុះហត្ថលេខាលើកិច្ចព្រមព្រៀងការពារគ្នាទៅវិញទៅមកជាមួយតៃវ៉ាន់និងហ្វ៊ីលីពីនក៏បានធ្វើការទាមទារ “ការពារផលប្រយោជន៍ជាតិ”របស់ខ្លួនផងដែរ ពាក់ព័ន្ធនឹងសេរីភាពរបស់នាវាក្នុងការធ្វើដំណើរតាមផ្លូវសមុទ្រ។
សូមបញ្ជាក់ថា កិច្ចចរចាដើម្បីសម្រចឲ្យបាននូវ “បញ្ញត្តិ”សម្រាប់តំបន់សមុទ្រចិនខាងត្បូងកំពុងជួបនឹងឧបស័គ្គ។ ដោយហេតុថា ទីក្រុងប៉េកាំងចង់ធ្វើការចរចាឧបតោភាគីរវាងប្រទេសចិនជាមួយនឹងប្រទេសនីមួយៗរបស់អាស៊ាន។ ចំណែកឯប្រទេសអាស៊ានវិញចង់ធ្វើការចរចាឧបតោភាគីរវាងប្រទេសចិនជាមួយនឹងប្រទេសអាស៊ានជាចង្កោម។ មូលហេតុដែលនាំឲ្យប្រទេសចិនទាមទារចរចាបែបនេះ មកពីប្រទេសចិនបារម្ភខ្លាចមានអន្តរជាតូបនីយកម្មទៅលើអធិករណ៍នៅសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ