ភាពតានតឹងរវាងប៉េកាំងនិងវ៉ាស៊ីនតោនពាក់ព័ន្ធនឹងបញ្ហាសមុទ្រចិនខាងត្បូង
ចុះផ្សាយនៅថ្ងៃ៖
ស្តាប់ - ០៣:២២
ទីក្រុងប៉េកាំងបានចាត់ទុកសមុទ្រចិនខាងត្បូងថាជាតំបន់ឋិតនៅក្នុងដែនទឹករបស់ខ្លួន។ ចំណែកឯប្រទេសជិតខាងរបស់ប្រទេសចិនក៏ធ្វើការទាមទារដូចគ្នាអ៊ីចឹងដែរ។ សហរដ្ឋអាមេរិកបានឆ្លៀតឱកាសនេះធ្វើការពង្រឹងវត្តមាននៃឥទ្ធិពលរបស់ខ្លួននៅក្នុងតំបន់។
កាលពីខែមីនាកន្លងទៅ អ្នកទទួលខុសត្រូវជាន់ខ្ពស់នៃប្រទេសចិនបានថ្លែងប្រាប់សហរដ្ឋអាមេរិកថា បញ្ហាតំបន់សមុទ្រចិនខាងត្បូងគឺជាបញ្ហាមួយដ៏សែនសំខាន់សម្រាប់ប្រទេសចិន។
ស្រាប់តែនៅខែកក្កដា នាឱកាសជំនួបប្រជុំអាស៊ាននៅទីក្រុងហាណូយ រដ្ឋមន្ត្រីក្រសួងការបរទេសអាមេរិកលោកស្រីហ៊ីលឡារីគ្លីនតុនបានប្រកាសប្រាប់ថា ការដោះស្រាយបញ្ហាដែនដីនិងដែនសមុទ្រគឺជាអាទិភាពចម្បងនៃវិស័យការទូតអាមេរិក។ ទាំងនេះបានបណ្តាលឲ្យទីក្រុងប៉េកាំងបញ្ចេញប្រតិកម្មភ្លាមថា សហរដ្ឋអាមេរិកបានធ្វើការជ្រៀតជ្រែកចូលក្នុងបញ្ហាតំបន់។
នៅខែកញ្ញាកន្លងទៅនេះ មុនមានជំនួបរវាងលោកប្រធានាធិបតីអាមេរិកបារ៉ាក់អូបាម៉ាជាមួយមេដឹកនាំនៃក្រុមប្រទេសអាស៊ាន ប្រទេសចិនបានថ្លែងប្រកាសបញ្ជាក់ទៀតថា ទីប្រជុំកោះដែលមាននៅក្នុងសមុទ្រចិនខាងត្បូងនិងដែនទឹកនៅទីនោះគឺជាកម្មសិទ្ធិប្រកែកពុំបានដែលឋិតនៅក្រោមការគ្រប់គ្រងរបស់ប្រទេសចិន។
ហើយនៅថ្ងៃទី១២តុលា រដ្ឋមន្ត្រីក្រសួងការពារជាតិនៃក្រុមប្រទេស”អាស៊ាន+៨”ក៏បានចាប់ពិភាក្សាគ្នាជាថ្មីទៀតពីបញ្ហាសមុទ្រចិនខាងត្បូងនេះ។
សូមបញ្ជាក់ថា ទីប្រជុំកោះParacel ដែលឋិតនៅខាងជើងហើយនិងទីប្រជុំកោះSpratly ដែលឋិតនៅប៉ែកខាងត្បូងនៃសមុទ្រចិនខាងត្បូងគឺពិតជាបញ្ហាដ៏សែនក្តៅគគុកមួយនៅក្នុងតំបន់។ ដោយហេតុថា ទីនោះជាជង្រុកសម្បូណ៌ទៅដោយប្រេងកាតនិងវត្ថុធាតុរ៉ែសំខាន់ៗ។
ហេតុដូច្នេះហើយបានជាប្រទេសចិននិងប្រទេសវៀតណាមបានទាមទារថា តំបន់នេះជាដែនដីនិងជាដែនទឹករបស់ខ្លួន។ ចំណែកឯប្រទេសម៉ាឡេស៊ី ប្រទេសហ្វីល្លីពីន និងប្រទេសប៊្រុយណេបានទាមទារទីប្រជុំកោះSpratly មួយភាគ។ រីឯការទាមទាររបស់ចិនតៃវ៉ាន់វិញក៏ពុំខុសគ្នាពីការទាមទាររបស់ទីក្រុងប៉េកាំងឡើយ។
ប្រទេសចិនបានក្តោបកាន់កាប់ទីប្រជុំកោះParacel ទាំងស្រុង។ ចំណែកឯ ទីប្រជុំកោះSpratlyវិញគឺជាបញ្ហាមួយដ៏សែនស្មុគស្មាញ ពីព្រោះ ប្រទេសវៀតណាមបានកាន់កាប់កោះប្រមាណ៣០ប្លាយ ហើយបានដាក់ពង្រាយទាហានប្រមាណ៦០០នាក់សម្រាប់ការពារមូលដ្ឋានរបស់ខ្លួន។ ប្រទេសហ្វីល្លីពីនវិញបានកាន់កាប់កោះចំនួន១០។ ប្រទេសចិនបានកាន់កាប់កោះចំនួន៩។ ប្រទេសម៉ាឡេស៊ីបានកាន់កាប់កោះចំនួន៧។ តៃវ៉ាន់បានកាន់កាប់កោះមួយ។
នារយៈប៉ុន្មានខែចុងក្រោយនេះ ទីក្រុងប៉េកាំងបានចាប់ឃាត់ខ្លួនអ្នកនេសាទវៀតណាមជាច្រើនរយនាក់នៅសមុទ្រចិនខាងត្បូង។ ហើយទីក្រុងប៉េកាំងបានព្រមានជាច្រើនលើកដល់ការឃ្លាំយាមរបស់អាមេរិកនៅសមុទ្រចិនខាងត្បូង។ រីឯទីក្រុងវ៉ាស៊ីនតោននិងសម្ព័ន្ធមិត្តរបស់គេនៅក្នុងតំបន់វិញបានរំលឹកថា អនុសញ្ញាជាធរមានអនុញ្ញាតឲ្យពួកគេមានសកម្មភាពយោធានៅក្នុងដែនទឹកអន្តរជាតិ។ ក៏ប៉ុន្តែគឺដែនទឹកអន្តរជាតិនេះឯងដែលឋិតនៅក្នុងតំបន់ដែនទឹកសេដ្ឋកិច្ចដែលទាមទារដោយទីក្រុងប៉េកាំង។
ក្រុមឧត្តមសេនីយវៀតណាមបារម្ភខ្លាចកើតមានការប៉ះទង្គិចជាមួយមហាអំណាចចិន មូលហេតុនេះហើយដែលបាននាំឲ្យប្រទេសវៀតណាមខិតខំរិះរកពង្រឹងដៃគូយុទ្ធសាស្ត្រជាមួយសហរដ្ឋអាមេរិកដែលជាអតីតបច្ចាមិត្តរបស់ខ្លួន។ ហើយទីក្រុងហាណូយទាមទារឲ្យយកបញ្ហាសមុទ្រចិនខាងត្បូងមកពិភាក្សានៅក្នុងជំនួបប្រជុំអាស៊ាន ដែលទីក្រុងវ៉ាស៊ីនតោនចាត់ទុកជាឱកាសមួយដ៏ល្អសម្រាប់ពង្រឹងពង្រីកទំនាក់ទំនងការទូតរបស់ខ្លួននៅក្នុងតំបន់អាស៊ាននិងនៅក្នុងតំបន់អាស៊ីបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ