ប្រមុខទូតចិនប្តេជ្ញាការពារផលប្រយោជន៍របស់ចិននៅសមុទ្រចិនខាងត្បូង
ក្នុងឱកាសសន្និសីទសារព័ត៌មាន នៅក្រុងប៉េកាំង នាថ្ងៃព្រហស្បតិ៍ ទី៧មីនានេះ ប្រមុខការបរទេសចិន អះអាងថា ចិនប្តេជ្ញាការពារផលប្រយោជន៍របស់ចិននៅសមុទ្រចិនខាងត្បូង ហើយទន្ទឹមនឹងគ្នានោះ លោក វ៉ាង យី ក៏ព្រមានប្រទេសផ្សេងទៀតដែលនៅក្រៅតំបន់ កុំឲ្យលូកដៃ។ ចំណែក នាយករដ្ឋមន្រ្តីម៉ាឡេស៊ី លើកឡើងនៅក្នុងជំនួបកំពូលអាស៊ាន-អូស្ត្រាលី ថា ម៉ាឡេស៊ីគ្មានបញ្ហាជាមួយចិនទេ ប៉ុន្តែ អ្នកដែលស្អប់ចិន គឺ បស្ចិមលោក។ សូមជ្រាបថា ម៉ាឡេស៊ី ក៏ដូចជាប្រទេសមួយចំនួនផ្សេងទៀតក្នុងតំបន់អាស៊ាន មានជម្លោះដែនទឹកជាមួយចិន។
ចុះផ្សាយនៅថ្ងៃ៖
ស្តាប់ - ០២:២៥
«យើងការពារសិទ្ធិស្របច្បាប់របស់យើង នៅក្នុងតំបន់សមុទ្រចិនខាងត្បូង»។ នេះជាប្រសាសន៍របស់ប្រមុខការបរទេសចិន លោក វ៉ាង យី នៅក្នុងការប្តេជ្ញាការពារផលប្រយោជន៍របស់ចិននៅសមុទ្រចិនខាងត្បូង។
ក្នុងសំណុំបញ្ហាសមុទ្រចិនខាងត្បូង រដ្ឋអំណាចចិន មានជម្លោះទំនាស់ទាស់ទែងដែនទឹកនិងទាមទារដីកោះ ជាមួយបណ្តាប្រទេសអាស៊ាន ជាអាទិ៍ ឈ្លោះជាមួយហ្វីលីពីន វៀតណាម ឥណ្ឌូណេស៊ី ព្រុយណេ និងម៉ាឡេស៊ី។ ម៉ាឡេស៊ី ដោយសារតែទំហំទម្ងន់សេដ្ឋកិច្ច និងផលប្រយោជន៍ពាណិជ្ជកម្ម បានធ្វើឲ្យ ថ្នាក់ដឹកនាំម៉ាឡេស៊ី បន្ទន់ជំហរបន្តិចចំពោះមុខចិន។ ចិន ក៏មានទំហំសេដ្ឋកិច្ចពាណិជ្ជកម្មច្រើនជាមួយបណ្តាប្រទេសអាស៊ានផ្សេងដែរ។ ក្នុងជំនួបកំពូលអាស៊ាន-អូស្ត្រាលី នាយករដ្ឋមន្រ្តីម៉ាឡេស៊ី អានវ៉ា អ៊ីប្រាហ៊ីម បានលើកឡើងថា« ម៉ាឡេស៊ីគ្មានបញ្ហាជាមួយចិនទេ ប៉ុន្តែ អ្នកដែលស្អប់ចិន គឺ បស្ចិមលោក»។ លោក អានវ៉ា អ៊ីប្រាហ៊ីម សង្កត់ធ្ងន់ថា «ប្រសិនបើពួកប្រទេសបច្ចិមលោក មានបញ្ហាទំនាស់នឹងចិន សូមកុំឲ្យទម្លាក់បញ្ហានោះមកលើយើង»។
ថ្នាក់ដឹកនាំអាស៊ាននិងអូស្ត្រាលី ក៏បានគូសបង្ហាញពីក្តីបារម្ភចំពោះ«សកម្មភាពដែលគំរាមកំហែងដល់សន្តិភាព» នៅសមុទ្រចិនខាងត្បូង។ សេចក្តីថ្លែងការណ៍រួមនេះ ចេញផ្សាយថ្ងៃពុធ ទី៦មីនា ពោលគឺ១ថ្ងៃបន្ទាប់ពី ចិន និងហ្វីលីពីន បានប៉ះទង្គិចគ្នា។ ថ្ងៃអង្គារសប្តាហ៍នេះ ឆ្មាំសមុទ្រហ្វីលីពីន បានប៉ះទង្គិចជាមួយនាវាចិន ហើយនាវាចិន បានបាញ់ទឹកស្រោចពីលើទូកហ្វីលីពីន ដែលបណ្តាលឲ្យឆ្មាំសមុទ្រហ្វីលីពីន ៤ នាក់រងរបួស។ ហ្វីលីពីន បានលើកឡើងថាសកម្មភាពបែបនេះ ជារឿងមិនអាចទទួលយកបានទាល់តែសោះ ហើយនិង ហ្វីលីពីន ចោទ ចិន ថា ធ្វើសកម្មភាពគំរាមឈ្លានពាន។
ផ្ទុយទៅវិញ ប្រមុខការទូតចិន បានឆ្លើយបកនៅថ្ងៃព្រហស្បតិ៍ ដោយពន្យល់ថា ហ្វីលីពីន ដែលបានជំនួយគាំទ្រពីសហរដ្ឋអាមេរិក ចេះតែញោះញ៉ុងបង្កហេតុ ហើយនាំអាទិ៍រករឿងចិន។ ប្រមុខទូតចិន ជាថ្មីម្តងទៀត បានសម្តែងក្តីបារម្ភចំពោះការរឹតចំណងយោធាកាន់តែខ្លាំងឡើងៗ រវាងកងទ័ពហ្វីលីពីននិងយោធាសហរដ្ឋអាមេរិក។
នាឱកាសកិច្ចប្រជុំសភាប្រជាជនចិន ក្នុងសន្និសីទសារព័ត៌មាន រដ្ឋមន្ត្រីការបរទេសចិន មិនបានចុចចំពោះឈ្មោះសហរដ្ឋអាមេរិកនោះទេ តែលោក វ៉ាង យី បានព្រមានជាប្រយោលថា សូមប្រទេសផ្សេងទៀតនៅក្រៅតំបន់ កុំញោះញ៉ុងបង្កជម្លោះ កុំនាំអាទិ៍ឲ្យគេឈ្មោះគ្នា និង កុំធ្វើជាចលករបង្កហេតុ បង្កើតបញ្ហានៅសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ