ចិនប្រាប់អាមេរិកថា ខ្លួននឹងមិនចុះញ៉ម ឬអត់ឱនឲ្យជាដាច់ខាត នៅក្នុងរឿងកោះតៃវ៉ាន់
ថ្នាក់ដឹកនាំកងទ័ពចិន បានប្រាប់ទៅសមភាគីអាមេរិកថា នៅក្នុងរឿងកោះតៃវ៉ាន់ គឺចិនបានប្តេជ្ញាចិត្តហើយ ដោយមិនចុះញ៉ម និងមិនធ្វើសម្បទានសូម្បីតែប៉ុនចុងក្រចក។ ដូច្នេះអាមេរិក ត្រូវតែឈប់ផ្តល់អាវុធ ទៅឲ្យតៃវ៉ាន់តទៅទៀត។ ការលើកឡើងដូច្នេះ គឺស្របពេលដែលនៅតៃវ៉ាន់ នឹងមានការបោះឆ្នោតប្រធានាធិបតីអាណត្តិថ្មី នៅថ្ងៃសៅរ៍ខាងមុខ។ ការបោះឆ្នោតដែលគេជឿថា លោក William Lai បេក្ខជនប្រជាធិបតេយ្យ និងឯករាជ្យនិយម ប្រាកដជានឹងឈ្នះ មកបន្តតំណែងជំនួសលោកស្រី សៃ អ៊ីងវេន។
ចុះផ្សាយនៅថ្ងៃ៖
ស្តាប់ - ០៣:៤៤
កាលពីថ្ងៃអង្គារ ថ្នាក់ដឹកនាំកងទ័ពចិន បានជួបប្រជុំជាមួយមន្ត្រីអាមេរិក នៅក្រសួងការពារជាតិអាមេរិក ក្នុងទីក្រុងវ៉ាស៊ីនតោន។ ផ្អែកតាមលិខិតប្រកាស របស់ក្រសួងការពារជាតិចិន នៅក្នុងជំនួបនោះ ថ្នាក់ដឹកនាំកងទ័ពចិន បានប្រាប់ទៅភាគីអាមេរិកថា នៅក្នុងសំណុំរឿងកោះតៃវ៉ាន់ គឺចិននឹងមិនធ្វើសម្បទាន ឬអត់ឱនឲ្យ សូម្បីបន្តិចណាឡើយ។ លិខិតនេះបន្តថា ចិនបានទាមទារយ៉ាងច្បាស់ថា សហរដ្ឋអាមេរិក ត្រូវតែគោរព គោលការណ៍ចិនតែ១។ ជាគោលការណ៍ ដែលសហរដ្ឋអាមេរិកបានទទួលស្គាល់ ហើយត្រូវតែគោរពឲ្យបានជាក់ស្តែង។ មានន័យថា អាមេរិកត្រូវតែឈប់ផ្តល់អាវុធទៅឲ្យតៃវ៉ាន់ ហើយត្រូវតែប្រឆាំងដាច់ខាតទៅនឹងចេតនាប្រកាសឯករាជ្យរបស់តៃវ៉ាន់។
សូមរំលឹកថា សហរដ្ឋអាមេរិកបានប្រកាសទទួលស្គាល់ គោលការណ៍ចិនតែ១ពិតមែន គឺសាធារណរដ្ឋប្រជាមានិតចិន តែទន្ទឹមគ្នានេះ សហរដ្ឋអាមេរិកមានច្បាប់អនុញ្ញាតឲ្យរដ្ឋាភិបាល អាចជួយទំនុកបម្រុងគ្រឿងសព្វាវុធឲ្យតៃវ៉ាន់បាន ដើម្បីការពារខ្លួន។ សម្រាប់ចិនវិញ ប៉ុន្មានឆ្នាំមកនេះ លោកស៊ី ជីនពីង បានកំណត់កម្មវត្ថុ ថានឹងប្រមូលយកតៃវ៉ាន់មកក្នុងរង្វង់គ្រួសារចិនវិញ ព្រោះតៃវ៉ាន់ជាខេត្តមួយរបស់ចិន។ ការបង្រួបបង្រួម ដែលចិនអះអាងថា នឹងធ្វើដោយ “សន្តិវិធី” តែក៏អាចប្រើកម្លាំងដើរ ប្រសិនបើកាលៈទេសៈតម្រូវ។
គួរបញ្ជាក់ដែរថា ក្នុងអំឡុងពេលនេះ ស្ថានភាពកាន់តែតានតឹងខ្លាំង ជុំវិញសំណុំរឿងកោះតៃវ៉ាន់ ដោយសារតែនៅថ្ងៃសៅរ៍ទី ទី១៣មករា តៃវ៉ាន់នឹងបោះឆ្នោតជ្រើសរើសប្រធានាធិបតីអាណត្តិថ្មី។ លោក វីលៀម ឡៃ (William Lai) បេក្ខជនបក្សប្រជាធិបតេយ្យចម្រើននិយម (PDP) របស់លោកស្រី សៃ អ៊ីងវេន គឺជាបេក្ខជនដែលគេសង្ឃឹមឈ្នះច្រើនជាងគេ។ ទាំងលោកស្រី សៃ អ៊ីងវេន ទាំងលោក វីលៀម ឡៃ គឺជាមនុស្សដែលប៉េកាំងស្អប់បំផុត ព្រោះអ្នកទាំងនេះបានដឹកនាំបំផុសគំនិត ឲ្យតៃវ៉ាន់ប្រកាសឯករាជ្យជាប្រទេសពេញសិទ្ធិ។
សំណុំរឿងតៃវ៉ាន់ បានធ្វើឲ្យមានការព្រួយបារម្ភជាខ្លាំង ស្តីពីប្រឈមមុខដាក់គ្នាដោយអាវុធ រវាងកងទ័ពចិន និងកងទ័ពអាមេរិក នៅក្នុងតំបន់អាស៊ីប៉ាស៊ីហ្វិក។ យ៉ាងណាមិញចិនបានរិះគន់បរិហារជាញឹកញាប់ ថាអាមេរិកត្រូវតែឈប់បញ្ជូនទ័ពមកក្រវែលក្បែរចិនតទៅទៀត ព្រោះវាជាទង្វើកំញើញរករឿង មកលើអធិបតេយ្យភាពរបស់ចិន។ ទន្ទឹមគ្នានេះ វត្តមានកាន់តែសកម្មរបស់កងទ័ពអាមេរិកនៅក្បែរចិន គឺវាមានជាប់ពាក់ព័ន្ធនឹងបញ្ហាតំបន់សមុទ្រចិនខាងត្បូង។ សម្រាប់ប្រទេសមួយចំនួនក្នុងតំបន់ ដែលជាសម្ព័ន្ធមិត្តអាមេរិក ដូចជាហ្វីលីពីនជាដើម គឺចិនបានធ្វើសកម្មភាពក្រអឺតក្រទម រករឿងកាន់តែខ្លាំង បំពានមកលើអធិបតេយ្យភាពដែនទឹករបស់គេ។
ទាក់ទិននឹងបញ្ហាតំបន់សមុទ្រចិនខាងត្បូងនេះដែរ កងទ័ពចិនបានប្រាប់ទៅភាគីអាមេរិកថា អាមេរិកត្រូវតែយល់ឲ្យច្បាស់អំពីបញ្ហាស៊ីជំរៅ នៃសន្តិសុខផ្លូវសមុទ្រនិងផ្លូវអាកាស អាមេរិកត្រូវគ្រប់គ្រងកងទ័ពខ្លួនឲ្យបានល្អ ហើយត្រូវតែឈប់បំផ្លើសបំភ្លៃ បង្កបញ្ហារករឿងចិន។ ពីខាងអាមេរិកវិញ គេបានប្រាប់ទៅចិនថា វាជារឿងចាំបាច់ ដែលចិន ត្រូវតែគោរពសិទ្ធិសេរីភាពនៃចរាចរណ៍ផ្លូវសមុទ្រ ក្នុងដែនសមុទ្រអន្តរជាតិ។
សូមបញ្ជាក់ថា ជំនួបនៅវ៉ាស៊ីនតោន ដើមសប្តាហ៍នេះ ត្រូវបានដឹកនាំដោយលោក Michael Chase មន្ត្រីជាន់ខ្ពស់ម្នាក់នៃក្រសួងការពារជាតិអាមេរិក និងលោក Song Yangchao អគ្គមេបញ្ជាការម្នាក់នៃកងទ័ពចិន។ ការប្រជុំនិយាយគ្នា រវាងកងទ័ពទាំង២នេះ គឺជាលទ្ធផលសន្យាគ្នារវាងលោកស៊ី ជីនពីង និងលោកចូ បៃដិន កាលពីពេលជួបគ្នានៅសាន់ហ្វ្រាន់ស៊ីស្កូ នៅខែវិច្ឆិកា។ ភាគីចិនបានអះអាងថា ខ្លួនមានចេតនាបណ្តុះទំនាក់ទំនងល្អបរិសុទ្ធ ជាមួយអាមេរិក ដោយឈរលើសមភាពនិងការគោរពគ្នាទៅវិញទៅមក។ បន្ទាយប៉ង់តាហ្គោនវិញ បានចេញលិខិតប្រកាស ដោយបានលើកឡើងថា វាជារឿងចាំបាច់ ដែលត្រូវរក្សាខ្សែតភ្ជាប់ទំនាក់ទំនងដោយផ្ទាល់ រវាងកងទ័ពទាំង២ ដើម្បីបញ្ចៀសបញ្ហាយល់ច្រឡំណាមួយ ដែលអាចនាំទៅជាកើតជម្លោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ