ហ្វីលីពីនថ្កោលទោសឆ្មាំសមុទ្រចិនដែលបាញ់ទឹករារាំងកប៉ាល់ដឹកស្បៀងរបស់រដ្ឋាភិបាល
កម្លាំងប្រតិបត្តិការជាតិហ្វីលីពីននៅសមុទ្រចិនខាងត្បូងចោទប្រកាន់ និងថ្កោលទោសខ្លាំងៗសកម្មភាពយាយីរបស់ឆ្មាំសមុទ្រចិន ដែលប្រើកាណុង បាញ់ទឹកទៅលើកប៉ាល់ដឹកស្បៀង៣គ្រឿងរបស់រដ្ឋាភិបាលហ្វីលីពីន។ តាមសេចក្តីប្រកាសរបស់កម្លាំងប្រតិបត្តិការហ្វីលីពីន នៅថ្ងៃសៅរ៍ ទូករបស់រដ្ឋាភិបាលហ្វីលីពីន៣គ្រឿងដែលដឹកស្បៀង និងប្រេងសម្រាប់អ្នកនេសាទហ្វីលីពីននៅក្បែរថ្មប៉ប្រះទឹក Scarborough ដែលចិនដណ្តើមមកគ្រប់គ្រងដោយខុសច្បាប់តាំងពីឆ្នាំ ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
ហ្វីលីពីននិងចិនឈ្លោះ សង្ក្រឺតធ្មេញដាក់គ្នា សឹងជារៀងរាល់ខែ នៅសមុទ្រចិនខាងត្បូង ជាទីដែលមហាអំណាចចិនប្រកាសជាម្ចាស់កម្មសិទ្ធិផ្តាច់មុខ។ នៅថ្ងៃសៅរ៍ កម្លាំងប្រតិបត្តិការជាតិហ្វីលីពីនបានចោទប្រកាន់ ថ្កោលទោសឆ្មាំសមុទ្រចិនដែលប្រើកាំណុងបាញ់ទឹក ក្នុងគោលដៅ រំខានរារាំងមិនឲ្យទូករបស់រដ្ឋាភិបាលហ្វីលីពីន៣គ្រឿងនាំយកស្បៀង និងប្រេងទៅឲ្យទូកនេសាទហ្វីលីពីននៅក្បែរថ្មប៉ប្រះទឹក Scarborough។
តាមសេចក្តីប្រកាសព័ត៌មានរបស់កម្លាំងប្រតិបត្តិការជាតិហ្វីលីពីន ឆ្មាំសមុទ្រ និងកងទ័ពជើងទឹកចិនបានធ្វើសកម្មភាពខុសច្បាប់ ដ៏គ្រោះថ្នាក់ ទៅលើនាវាហ្វីលីពីន។ តាមភាគីហ្វីលីពីន ប្រព័ន្ធឆ្លើយឆ្លង និងឧបករណ៍បើកបររបស់ទូកមួយគ្រឿងត្រូវខូចខាតយ៉ាងធ្ងន់ធ្ងរដោយសារការបាញ់ទឹករបស់ឆ្មាំសមុទ្រចិន ចំណែកបុគ្គលិកនៅលើទូកមួយគ្រឿងទៀត ខូចត្រចៀក មិនអាចស្តាប់លឺមួយរយៈ ដោយសារតែប្រព័ន្ធបំពងសំឡេងរំខានរបស់ឆ្មាំសមុទ្រចិន។
ទូរទស្សន៍ចិនវិញផ្សាយនៅថ្ងៃសៅរ៍ថា ឆ្មាំសមុទ្រចិនបានចាត់វិធានការសមស្របតាមច្បាប់ប្រឆាំងកប៉ាល់ហ្វីលីពីនដែលបានបើករំលោភចូលតំបន់ថ្មប៉ប្រះទឹក Scarborough។
ថ្មប៉ប្រះទឹក Scarborough ដែលសំបូរត្រី និងជាជង្រុកប្រេងនៅសមុទ្រចិនខាងត្បូង ស្ថិតនៅចម្ងាយតែ ២៤០គីឡូម៉ែត្រ តែប៉ុណ្ណោះ ពីកោះ លូស្សុន ( Luzon) របស់ហ្វីលីពីន ក៏ប៉ុន្តែ វាស្ថិតនៅឆ្ងាយ ដល់ទៅជាង ៩០០ គីឡូម៉ែត្រពីកោះហៃណាន់ (Hainan) ត្រូវចិនដណ្តើមចូលកាន់កាប់តាំងពីឆ្នាំ ២០១២។
តាមច្បាប់សមុទ្រអន្តរជាតិ និង អនុសញ្ញាអង្គការសហប្រជាជាតិ ឆ្នាំ ១៩៨២ ដែលចិនផ្ទាល់បានយល់ព្រមផ្តល់សច្ចាប័នដែរនោះ ប្រទេសមានអធិបតេយ្យភាព នីមួយៗ អាចមានសិទ្ធិនេសាទ និងទាញយកប្រយោជន៍ពីធនធានធម្មជាតិនៅក្នុងសមុទ្រ នៅក្នុងរង្វង់ដែន ប្រមាណ ៣៧០ គីឡូម៉ែត្រ ពីច្រាំងសមុទ្ររបស់ខ្លួន។ ដោយយោងទៅលើច្បាប់សមុទ្រអន្តរជាតិ ហ្វីលីពីនដែលអះអាងជាម្ចាស់លើថ្មប៉ប្រះទឹក Scarboroughនៅតែបន្តចេញទៅនេសាទ នៅទីនោះជាមានការរារាំងពីឆ្មាំសមុទ្រចិនក្តី។ សម្រាប់ភាគីហ្វីលីពីន សកម្មភាពរបស់ឆ្មាំសមុទ្រចិន ដើម្បីរារាំងមិនគេដឹកស្បៀងទៅឲ្យអ្នកនេសាទមិនត្រឹមខុសច្បាប់ ប៉ុន្តែ អមនុស្សធម៌ក្រៃលែង។ កម្លាំងប្រតិបត្តិការហ្វីលីពីននៅបានបង្ហាញរូបភាពថតពីលើអាកាស ដែលបង្ហាញខ្សែសំណាញ់ដែលឆ្មាំសមុទ្រចិន ដាក់ពង្រាយជារនាំង ឧបសគ្គកុំឲ្យគេអាចបើកទូកចូលទៅក្នុងតំបន់ថ្មប៉ប្រះទឹក Scarborough។
ប៉ុន្តែ យ៉ាងណាក៏ដោយ បើតាមកម្លាំងប្រតិបត្តិការជើងទឹកហ្វីលីពីន ទោះឆ្មាំសមុទ្រចិនប្រើកាណុងបាញ់ទឹករំខាន ហ្វីលីពីននៅតែអាចដឹកយកស្បៀង និងប្រេងទៅឲ្យទូកនេសាទហ្វីលីពីនជាង៣០គ្រឿងដែលកំពុងដែលកំពុងប្រចាំការនេសាទនៅក្បែរថ្មប៉ប្រះទឹកScarboroughនៅថ្ងៃសៅរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ