ម៉ានីលនិងប៉េកាំងទម្លាក់កំហុសដាក់គ្នាក្រោយឧប្បត្តិហេតុប៉ះទង្គិចនៅសមុទ្ទចិនខាងត្បូង
ហ្វីលីពីននិងចិន បានចោទប្រកាន់គ្នាទៅវិញទៅមក ថាជាដើមហេតុនាំឱ្យមានការបុកគ្នាពីរកន្លែង រវាងនាវាចិននិងទូកដឹកស្បៀងហ្វីលីពីន នៅក្នុងសមុទ្ទចិនខាងត្បូង នាថ្ងៃអាទិត្យទី២២តុលា២០២៣នេះ។
ចុះផ្សាយនៅថ្ងៃ៖
ស្តាប់ - ០២:៤១
បើតាមរដ្ឋាភិបាលហ្វីលីពីន នាវា៥២០៣របស់កងឆ្មាំសមុទ្ទចិន បានបើកមកបុកស្ទាក់ទូកដឹកស្បៀងអាហាររបស់កងយោធាហ្វីលីពីន។ វីដេអូរបស់យោធាហ្វីលីពីនបានបង្ហាញឱ្យឃើញថាក្បាលនាវាឆ្មាំសមុទ្ទចិនបានមកប៉ះនឹងកន្សៃទូក ហើយទូកហ្វីលីពីននោះក៏បានបន្តដំណើរទៅមុខទៀត ដោយពុំអាចកំណត់បានថាមានការខូចខាតប៉ុនណាទេ។ ឯចិនវិញបានអះអាងថា ការប៉ះគ្នាយ៉ាងស្រាលនេះបណ្តាលមកពីទូកហ្វីលីពីនធ្វើជាមិនឮសញ្ញាព្រមានជាច្រើន ហើយបើកដោយចេតនា កាត់មុខនាវារបស់ឆ្មាំសមុទ្ទចិន របៀបជាអ្នកគ្មានវិជ្ជាជីវៈ និងយ៉ាងគ្រោះថ្នាក់។
ចំណែកគ្រោះថ្នាក់មួយទៀត គឺជាការបុកទង្គិចរវាងនាវាឆ្មាំសមុទ្ទហ្វីលីពីនដែលអមការពារបេសកកម្មដឹកស្បៀង ជាមួយនឹងទូកនៃកងកម្លាំងប្រតិបត្តិការចិន ដែលមានទម្រង់ជាទូកនេសាទប្រដាប់អាវុធ។ តែប៉េកាំងបានចោទនាវាហ្វីលីពីនថាជាអ្នកបង្កឱ្យមានការប៉ះទង្គិចដោយចេតនាតាមរយៈការបើកថយសំដៅមកទូកនេសាទចិន។
នៅក្នុងសេចក្តីថ្លែងការណ៍ ម៉ានីលបានបញ្ជាក់ថានាវាទីពីរអាចបំពេញបេសកកម្មបញ្ជូនស្បៀងដោយជោគជ័យទៅឱ្យក្រុមយោធាប្រចាំការនៅខ្មោចនាវាចម្បាំងគាំងនៅកោះថ្មប៉ប្រះទឹកSecond Thomas និងបានថ្កោលទោសសកម្មភាពដ៏គ្រោះថ្នាក់ គ្មានទំនួលខុសត្រូវ និងខុសច្បាប់របស់ឆ្មាំសមុទ្ទចិន។ ឯកអគ្គរដ្ឋទូតអាមេរិកប្រចាំក្រុងម៉ានីល ក៏បានប្រកាសថ្កោលទោសភ្លាមទង្វើរំខានរបស់ឆ្មាំសមុទ្ទចិនថាអាចធ្វើឱ្យប៉ះពាល់ដល់សន្តិសុខក្រុមការងារដឹកជញ្ជូនស្បៀងហ្វីលីពីន។
ឧប្បត្តិហេតុនាវាប៉ះទង្គិចគ្នានេះ បានកើតឡើងនៅម្តុំប្រជុំកោះស្ព្រាតលី នៃសមុទ្ទចិនខាងត្បូង ចម្ងាយប្រមាណតែ២៥គីឡូម៉ែត្រពីកោះថ្មប៉ប្រះទឹកSecond Thomas ដែលជាទីតាំងជួរមុខរបស់កងទ័ពហ្វីលីពីន ដោយមានទាហានជើងទឹកហ្វីលីពីនប្រចាំការ នៅលើខ្មោចនាវាចម្បាំងBRP Sierra Madre និងដែលចិនមានដាក់ពង្រាយនាវាជាច្រើនដើម្បីសម្ញែងមហិច្ឆតាគ្រប់គ្រងសមុទ្ទចិនខាងត្បូងតែម្នាក់ឯង។
កោះថ្មប៉ប្រះទឹកSecond Thomas ស្ថិតនៅចម្ងាយប្រមាណ២០០គីឡូម៉ែត្រពីកោះPalawanផ្នែកខាងជើងបំផុតរបស់ហ្វីលីពីន និងដល់ទៅជាង១០០០គីឡូម៉ែត្រពីដីកោះចិនដ៏ជិតជាងគេបំផុតហៃណាំ។
នេះក៏មិនមែនជាគ្រោះប៉ះទង្គិចនាវាចិននិងហ្វីលីពីនលើកទីមួយឡើយ។ សម្រាប់នាយកវិទ្យាសាស្ត្រកិច្ចការនិងសិទ្ធិសមុទ្ទនៃសាកលវិទ្យាល័យហ្វីលីពីនលោក Jay Batongbacal នាវាបុកគ្នាក្នុងសមុទ្ទមិនមែនជារឿងចៃដន្យទេ តែជាឧប្បត្តិហេតុដែលចិនធ្វើឡើងដោយចេតនា ដើម្បីតេស្តមើលចិត្តអាមេរិកនិងហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ