ចិនទាមទារឲ្យហ្វីលីពីនត្រូវតែអូសខ្មោចកប៉ាល់ចម្បាំងចេញពីដែនទឹកជម្លោះនៅសមុទ្រចិនខាងត្បូង
ចុះផ្សាយនៅថ្ងៃ៖
មួយថ្ងៃក្រោយចេញមុខការពារឆ្មាំសមុទ្រចិន ដែលបាញ់ទឹកលើទូកដឹកស្បៀងហ្វីលីពីន ប៉េកាំង នៅថ្ងៃអង្គារទី ៨ សីហាបានទាមទារសាជាថ្មីឲ្យហ្វីលីពីន អូសកប៉ាល់ខ្មោចរបស់ខ្លួន ចេញពីតំបន់ជម្លោះនៅសមុទ្រចិនខាងត្បូង។ ចិនទាមទារយ៉ាងដូច្នេះ នៅមួយថ្ងៃក្រោយ ហ្វីលីពីនកោះហៅឯកអគ្គរដ្ឋទូតចិន នៅម៉ានីល ដើម្បីតវ៉ាប្រឆាំងឆ្មាំសមុទ្រចិន ដែលបានបាញ់ទឹករារាំងមិនឲ្យទូកហ្វីលីពីនអាចនាំយកស្បៀងទៅផ្គត់ផ្គង់ទាហានជើងទឹក ដែលកំពុងប្រចាំការ នៅលើខ្មោចនាវាចម្បាំង នៅកោះថ្មប៉ប្រះទឹកSecond Thomas ដែលស្ថិតក្នុងប្រជុំកោះ Spratley។
បន្ទាប់ពីចេញមុខការពារឆ្មាំសមុទ្រចិនថា បានចាត់វិធានការ សមស្រប ប្រកបដោយវិជ្ជាជីវៈ ដើម្បីរារាំងទូកដឹកស្បៀងរបស់ទាហានហ្វីលីពីន កាលពីថ្ងៃ អាទិត្យ ក្រសួងការបរទេសចិន នៅថ្ងៃអង្គារទី ៨សីហាបានទាមទារសាជាថ្មីឲ្យហ្វីលីពីនអូសខ្មោចនាវាចម្បាំងរបស់ខ្លួនចេញពី ថ្មប៉ប្រះទឹក នៅប្រជុំកោះSpratley ព្រោះថា ខ្មោចនាវាចម្បាំងរបស់ហ្វីលីពីន ឈ្មោះ BRP Sierra Madre ត្រូវបានហ្វីលីពីនយកទៅសំចតចោល នៅកូនកោះ ថ្មប៉ប្រះទឹករបស់ចិន ដែលមានឈ្មោះថា Ren’ai។
តាមក្រសួងការបរទេសចិន ជាច្រើនឆ្នាំមកហើយ ប៉េកាំងបានចរចាការទូតជាមួយម៉ានីល ដើម្បីឲ្យម៉ានីលគិតគូរ ដកខ្មោចនាវាចម្បាំងចេញពីតំបន់ដែនទឹកដែលជាកម្មសិទ្ធិរបស់ចិន។ ប៉េកាំងបានបញ្ជាក់ថា ហ្វីលីពីនធ្លាប់បានសន្យាជាច្រើនដងមកហើយ ថានឹងសណ្តោងយកកប៉ាល់ខ្មោច BRP Sierra Madreចេញពីកូនកោះថ្មប៉ប្រះទឹក ប៉ុន្តែ នៅ២៤ឆ្នាំមកនេះ ហ្វីលីពីនមិនបានគោរពការសន្យា។ ផ្ទុយទៅវិញ ហ្វីលីពីនបង្កើនសកម្មភាពរបស់ខ្លួន ដើម្បីជួសជុលកប៉ាល់ខ្មោចរបស់ខ្លួន ក្នុងគោលដៅ បុកគ្រឹះ ចាក់ឬសវត្តមានយោធាហ្វីលីពីន នៅលើកោះថ្មប៉ប្រះទឹក Ren’ai របស់ចិន។
ដោយចោទប្រកាន់ហ្វីលីពីនថា កំពុងរំលោភច្បាប់អន្តរជាតិ តាមរយៈការពង្រឹងវត្តមានយោធាប្រចាំការនៅក្នុងដែនទឹករបស់ចិន ក្រសួងការបរទេសចិនបានទាមទារឲ្យហ្វីលីពីនត្រូវតែអូសយកកប៉ាល់ខ្មោចចេញជាបន្ទាន់ពីតំបន់ថ្មប៉ប្រះទឹក។ នៅក្នុងការអំពាវនាវកាលពីថ្ងៃអង្គារ ចិនបានទាមទារឲ្យហ្វីលីពីនត្រូវតែចេញមុខធានាដែរថា នឹងគ្មានវត្តមាន សំណង់អ្វីទាំងអស់ នៅលើកូនកោះដែលជាថ្មប៉ប្រះទឹក នៅប្រជុំកោះ Spratley។ ប្រជុំកោះ Spratleyស្ថិតនៅក្នុងតំបន់សមុទ្រចិនខាងត្បូង ដែលចិន អះអាងជាម្ចាស់កម្មសិទ្ធិសើ្ទរទាំងស្រុង ដោយយកផែនទីចិន គូសវាសនៅឆ្នាំ ១៩៤០ ដែលមានគំនូសដាច់ៗ ៩ចំណុច ជាសំអាង។ នយោបាយឈ្លានពានពង្រីកដែនឥទ្ធិពលរបស់ចិន នៅសមុទ្រចិនខាងត្បូង តាមរយៈការចូលគ្រប់គ្រង បង្កើតសំណង់យោធា កំពង់ផែ និងកន្លែងចូលសំចតយន្តហោះនៅតាមកូនកោះតូច បានបណ្តាលឲ្យមានជម្លោះ តវ៉ាប្រឆាំងរបស់ប្រទេសក្នុងសមុទ្រសមុទ្រខាងត្បូង ដែលមានតាំងពីហ្វីលីពីន វៀតណាម ព្រុយណេ និងម៉ាឡេស៊ី។
ហេតុអ្វីកប៉ាល់ BRP Sierra Madre ទៅនៅទើលើថ្មប៉ប្រះទឹក Atoll Second Thomas?
BRP Sierra Madreធ្លាប់ជាកប៉ាល់ចម្បាំងរបស់អាមេរិក សម្រាប់ដឹកទាហានឡើងទៅប្រយុទ្ធនៅលើគោក។ កងទ័ពជើងទឹកអាមេរិកធ្លាប់បានប្រើនាវាចម្បាំងនេះ នៅក្នុងសម័យសង្រ្គាមលោកលើកទី២។ នៅក្រោយចប់សង្រ្គាមវៀតណាម អាមេរិកបានប្រគល់កប៉ាល់ចម្បាំងនេះទៅឲ្យកងទ័ពជើងហ្វីលីពីន ប្រើប្រាស់ រហូតដល់ឆ្នាំ ១៩៩០។ នៅឆ្នាំ ១៩៩៩ រដ្ឋាភិបាលហ្វីលីពីនបានអូសយកកប៉ាល់ BRP Sierra Madreទៅសំចតនៅលើកូនកោះថ្មប៉ប្រះទឹក Second Thomas ប្រជុំកោះ Spratley ដើម្បីទុកធ្វើជាទីតាំងជួរមុខរបស់កងទ័ពហ្វីលីពីន នៅសមុទ្រចិនខាងត្បូង។
ខ្មោចកប៉ាល់ BRP Sierra Madreបានក្លាយជានិមិត្តរូបការពារទឹកដីរបស់ហ្វីលីពីន នៅក្នុងជម្លោះជាមួយចិន នៅសមុទ្រចិនខាងត្បូង។ នៅលើខ្មោចកប៉ាល់ BRP Sierra Madre ដែលមានប្រវែង ១០០ម៉ែត្រ មានទាហានជើងទឹកហ្វីលីពីន ពី ៩ ទៅ១១នាក់ រស់នៅប្រចាំការជាប់ជានិច្ច។ នៅឆ្នាំ២០១៤ ឆ្មាំសមុទ្រចិនចាប់ផ្តើមធ្វើសកម្មភាពរំខាន រារាំងមិនឲ្យទូកហ្វីលីពីនដឹកនាំយកស្បៀង ប្រេង និងសម្ភារៈទៅផ្គត់ផ្គង់នៅលើកប៉ាល់ខ្មោច BRP Sierra Madre ដូចជាការបាញ់ទឹក បាញ់ពន្លឺឡាស៊ែលើកប៉ាល់ទឹកហ្វីលីពីន។ ដើម្បីជៀសវាងការរំខាន យាយីរបស់កប៉ាល់ចម្បាំងចិន កងទ័ពហ្វីលីពីនឧស្សាហ៍បញ្ជូនស្បៀង ប្រេងតាមផ្លូវអាកាស។ នៅឆ្នាំមុន ក្រសួងការពារជាតិហ្វីលីពីនបានប្រកាសគម្រោងជួសជុលកប៉ាល់ខ្មោច BRP Sierra Madreដែលចាស់ទុ្រឌទ្រោម ច្រេះចាប់ដោយសារទឹកសមុទ្រ។ ប៉ុន្តែ ការប៉ុនប៉ងរបស់ទូកដឹកស្បៀង ដឹកសម្ភារៈរបស់កងទ័ពហ្វីលីពីនរមែងជួបឧសបគ្គ ដោយសារការរារាំង រំខាន ធ្វើបាបរបស់ឆ្មាំសមុទ្រចិន។
ខ្មោចកប៉ាល់ខ្មោចក្នុងប្រជុំកោះSpratelyសំខាន់សម្រាប់ទប់ទល់ការពង្រីកដែនទឹករបស់ចិន នៅសមុទ្រចិនខាងត្បូង
ខ្មោចកប៉ាល់ BRP Sierra Madreត្រូវហ្វីលីពីនយកទៅទម្លាក់ប្រចាំការនៅលើកោះថ្មប៉ប្រះទឹក Second Thomas ផ្នែកមួយនៃប្រជុំកោះ Spratley ដែលស្ថិតនៅចម្ងាយប្រមាណ ២០០ គីឡូម៉ែត្រប៉ុណ្ណោះ ពីហ្វីលីពីន។ ហ្វីលីពីនអះអាងជាម្ចាស់កម្មសិទ្ធិព្រោះថា កូនកោះថ្មប៉ប្រះទឹកស្ថិតនៅជិតហ្វីលីពីនជាង ចិន ដែលស្ថិតនៅចម្ងាយជាង ១០០០គីឡូម៉ែត្រពីថ្មប៉ប្រះទឹក Second Thomas។
សម្រាប់រដ្ឋាភិបាលហ្វីពីលីន ដោយធ្វើសកម្មភាព បំភិតបំភ័យទាហានល្បាតហ្វីលីពីន ឆ្មាំសមុទ្រចិន មានចេតនាបន្ទុចបង្អាក់ កប៉ាល់ហ្វីលីពីន និងរំលោភយ៉ាងគឃ្លើន ឥតក្រែងច្បាប់ដែនអធិបតេយ្យភាពរបស់ហ្វីលីពីន។
ទោះត្រូវចិនបញ្ជូនឆ្មាំសមុទ្រឲ្យទៅរំខានយាយី នាវាដឹកស្បៀង ដឹកគ្រឿងបរិក្ខាទៅឲ្យទាហានប្រចាំការហ្វីលីពីននៅលើកោះSecond Thomasក្តី ហ្វីលីពីន កាលពីថ្ងៃចន្ទ បានអះអាងថា ខ្លួន នឹងយល់ព្រមបាត់បង់ទឹកដី និងចុះចាញ់ ការសម្លុត គំរាមកំហែងរបស់ចិន។
ប្រឈមនឹងការគំរាមកំហែងរបស់ចិន ដែលអះអាងជាម្ចាស់កម្មសិទ្ធិផ្តាច់មុខ នៅសមុទ្រខាងត្បូង ហ្វីលីពីន បានចុះហត្ថលេខាជាមួយសម្ព័ន្ធមិត្តអាមេរិក កាលពីដើមខែកុម្ភៈនេះ ដើម្បី អនុញ្ញាតឲ្យអាមេរិកចូលទៅប្រើប្រាស់មូលដ្ឋានទ័ពហ្វីលីពីន ចំនួន៤បន្ថែមទៀត។ ម៉ានីល និងវ៉ាស៊ីនតោនបានឯកភាពគ្នាផងដែរថា នឹងបញ្ជូនកប៉ាល់ទៅល្បាតរួមគ្នា សាជាថ្មី នៅសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ