ហ្វីលីពីនចោទចិន ថាឈ្លានពានដែនទឹក និងសង់របាំងលើសមុទ្ររំខានអ្នកនេសាទ
បញ្ហាសមុទ្រចិនខាងត្បូង បានកក្រើកជាថ្មី! ថ្ងៃអាទិត្យ ទី២៤ ខែកញ្ញា អាជ្ញាធរហ្វីលីពីន បានចោទប្រកាន់ ប្រទេសចិន ថា បានឈ្លានពានដែនទឹក និងសង់របាំងរណាំងលើទឹកសមុទ្រ រំខានដល់អ្នកនេសាទរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:៣៤
បើតាមការចោទប្រកាន់របស់អាជ្ញាធរហ្វីលីពីន គឺ ចិន បានដាក់ពង្រាយទ័ព ឆ្មាំសមុទ្រ និងនាវា ហើយ ថ្មីៗនេះ ចិន ថែមទាំងបានសាងសង់ របងរណាំង នៅលើសមុទ្រហ្វីលីពីន ប្រមាណ ៣០០ ម៉ែត្រ ត្រង់កន្លែងដែលសម្បូរត្រីច្រើន។ សំណង់រណាំងចិន បានខាឃាំង រារាំង រំខានដល់ អ្នកនេសាទហ្វីលីពីន។ នេះបើតាម អ្នកនាំពាក្យ ឆ្មាំសមុទ្រ ការិយាល័យនេសាទនិងធនធានសមុទ្រហ្វីលីពីន ដែល បានផ្សាយដំណឹងតាមប្រព័ន្ធ Twitter។
ប្រភពពីអាជ្ញាធរហ្វីលីពីនដែលប្រាប់ទីភ្នាក់ព័ត៌មានព័ត៌មាន AFP គឺនៅពេលថ្មីៗ អ្នកនេសាទហ្វីលីពីន ត្រូវពួកចិន ស្តីថាឲ្យចាកចេញពីកន្លែងរបស់គេ ក៏ប៉ុន្តែ អ្នកនេសាទហ្វីលីពីន ក៏ឆ្លើយវិញថាជាកន្លែងនេសាទរបស់ខ្លួនទេតើ គឺពួកចិនទេ ដែលត្រូវចាកចេញ។ ទោះជាមានប៉ះសម្តីគ្នាដូច្នេះក្តី ក៏ប្រជានេសាទហ្វីលីពីន ពុំតតាំងអ្វីច្រើនទៅទៀតដែរ ព្រោះភាគីខាងចិនឯណោះ មានប្រដាប់អាវុធ។
ជម្លោះរវាង ចិន និង ហ្វីលីពីន ជុំវិញដែនសមុទ្រ ផ្ទុះឡើង នៅឆ្នាំ២០១២។ ឆ្នាំ២០២១ ប្រទេសទាំងពីរបានទាស់ទែងគ្នា ជាថ្មី និងពេលនេះ គឺនៅទីតាំងដដែល ឈ្មោះថា Scarborough។ ត្រង់កន្លែង Scarborough នេះ គឺឋិតនៅចម្ងាយតែ ២៤០គីឡូម៉ែត្រ តែប៉ុណ្ណោះ ពីកោះ លូស្សុន ( Luzon) របស់ហ្វីលីពីន។ ក៏ប៉ុន្តែ វាឋិតនៅឆ្ងាយដល់ទៅជាង ៩០០ គីឡូម៉ែត្រ ឯណោះ ពីកោះហៃណាន់ (Hainan) របស់ចិន។
បើតាមច្បាប់សមុទ្រអន្តរជាតិ និង អនុសញ្ញាអង្គការសហប្រជាជាតិ ឆ្នាំ ១៩៨២ ដែលចិន ក៏បានយល់ព្រមផ្តល់សត្យាប័នដែរនោះ គឺប្រទេសមានអធិបតេយ្យភាព នីមួយៗ អាចមានសិទ្ធិនេសាទ និងចម្រាញ់ទាញយកផលធនធានធម្មជាតិ តែនៅក្នុងរង្វង់ដែន ប្រមាណ ៣៧០ គីឡូម៉ែត្រ ពីច្រាំងសមុទ្ររបស់ខ្លួន ប៉ុណ្ណោះ។
នាថ្ងៃអាទិត្យ ទី២៤ ខែកញ្ញា លោក Jay Tarriela អ្នកនាំពាក្យ ឆ្មាំសមុទ្រ -ការិយាល័យនេសាទនិងធនធានសមុទ្រហ្វីលីពីន ថា ឆ្មាំសមុទ្រហ្វីលីពីន នឹងបន្តសហការជិតដិតជាមួយបណ្តារដ្ឋទាំងឡាយដែលពាក់ព័ន្ធ ដើម្បីធានាឲ្យបានសិទ្ធិគ្រប់គ្រងដែនសមុទ្ររបស់ហ្វីលីពីន។
ក្នុងសំណុំបញ្ហាជម្លោះសមុទ្រចិនខាងត្បូងនេះ មិនមែនតែ ហ្វីលីពីន ១ ទេ ដែល មហាយក្សចិនកំពុងមានទំនាស់ គឺនៅមាន ប្រទេសវៀតណាម ម៉ាឡេស៊ី ឥណ្ឌូនេស៊ី និង ព្រុយណេ ក៏ ចិន ឈ្លោះទាស់ទែងដណ្តើមដែនទឹកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ