លោក ចូ បៃដិន ប្រើសម្តីធ្ងន់ៗរិះគន់លោក ដូណាល់ ត្រាំ នៅក្នុងសេចក្តីថ្លែងទៅកាន់ប្រជាជាតិ
ថ្ងៃព្រហស្បតិ៍ ទី៧កុម្ភៈ ប្រធានាធិបតីសហរដ្ឋអាមេរិក លោក ចូ បៃដិន បានយកឱកាសថ្លែងសុន្ទរកថាប្រចាំឆ្នាំ ដើម្បីសរសើរនយោបាយដឹកនាំរបស់ខ្លួន រយៈពេល៣ឆ្នាំមកនេះ ហើយនិងឆ្លៀតឱកាសវាយបកសម្តីរិះគន់ចំពោះគូប្រជែង។ លោក ចូ បៃដិន បានប្រើសម្តីធ្ងន់ៗរិះគន់លោក ដូណាល់ ត្រាំ ថាបណ្តោយឲ្យរុស្ស៊ីធ្វើអ្វីស្រេចនឹងចិត្ត ហើយនិងថា លោក ត្រាំជាប្រភពនៃការគំរាមកំហែងបំផ្លាញប្រជាធិបតេយ្យសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៥៨
ការថ្លែងសុន្ទរកថាទៅកាន់ប្រជាជាតិ ជាទម្លាប់ប្រចាំឆ្នាំរបស់ប្រធានាធិបតីអាមេរិក ដែលត្រូវនិយាយទៅកាន់សភាទាំង២ក្នុងពេលតែ១ ហើយជាប្រពៃណី ត្រូវធ្វើតុល្យការនៃការដឹកនាំរបស់ខ្លួនប្រាប់ទៅកាន់ពលរដ្ឋ។ លោកប្រធានាធិបតី ចូ បៃដិន បានប្រើពេលជាង១ម៉ោង ថ្លែងពីការដឹកនាំជាទូទៅក្នុងស្រុក និងពីសំណុំរឿងអន្តរជាតិ។ រឿងនៅក្នុងស្រុក លោក បៃដិន រំឭកថា អំលុងពេលចូលកាន់អំណាច សេដ្ឋកិច្ចអាមេរិកដាបចុះខ្សោយ ព្រោះតែទើបពីវិបត្តិជំងឺកូវីដ។ ទន្ទឹមនេះ លោកបានអួតពីស្នាដៃរបស់ខ្លួនថា បានបង្កើតការងារធ្វើ ចំនួន ១៥ លានការងារ តែក្នុងរយៈពេល ៣ ឆ្នាំ ហើយអត្រាអត់ការងារធ្វើ បានធ្លាក់ចុះទាបជាងគេ ក្នុងរយៈពេល៥០ឆ្នាំចុងក្រោយ។
ក្នុងនាមជាបេក្ខជនប្រធានាធិបតីសម្រាប់អាណត្តិថ្មីផង លោក ចូ បៃដិន បានឆ្លៀតឱកាសឃោសនាអំពីគម្រោងដឹកនាំបន្តទៀត។ លោកមានប្រសាសន៍ថានឹងចេញវិធានការទប់ទល់ទំនិញឡើងថ្លៃ សម្រួលដល់ជីវភាពប្រជាជន ហើយនិងសម្រួលដល់ការរកផ្ទះសម្បែងកន្លែងស្នាក់នៅ។ មិនតែប៉ុណ្ណោះ លោក បៃដិន ថានឹងជំរុញឲ្យក្រុមហ៊ុនឱសថស្ថានបញ្ចុះបន្ថយតម្លៃថ្នាំសង្កូវ ៥០០ មុខ។ លើសពីនេះ លោក បៃដិន ថានឹងដំឡើងពន្ធចំពោះសេដ្ឋីគ្រាក់ៗនិងក្រុមហ៊ុនធំៗ ដែលមានទ្រព្យសម្បត្តិចាប់ពី ១០០ លានដុល្លារឡើងទៅ គឺត្រូវជាប់ពន្ធ ២៥%។ ក៏ប៉ុន្តែ គម្រោងទាំងនេះ មិនអាចសម្រេចទៅបានទេ ប្រសិនបើគណបក្សប្រជាធិបតេយ្យ គ្មានសំឡេងភាគច្រើននៅសភា ឬបើលោក ត្រាំ ឈ្នះឆ្នោតនៅខែវិច្ឆិកា។
សំណុំរឿងអន្តរជាតិវិញ ប្រធានាធិបតីអាមេរិក បានលើកពីសំណុំបញ្ហាចិន តៃវ៉ាន សង្គ្រាមអ៊ុយក្រែន និងសង្គ្រាមនៅហ្កាហ្សា ជាដើម។ រដ្ឋបាលដឹកនាំរបស់លោក បៃដិន បានបង្កើតវិធានការផ្សេងៗដើម្បីកុំឲ្យ រដ្ឋអំណាចចិន លួចយកបច្ចេកវិទ្យាអាមេរិក។ លោក ចូ បៃដិន ក៏បានជំរុញជាថ្មីម្តងទៀត ឲ្យសភាអាមេរិក ដែលគ្រប់គ្រងដោយក្រុមគណបក្សសាធារណៈរដ្ឋ ប្រញាប់អនុម័តផ្ទេរកញ្ចប់ជំនួយ ៩៥ ពាន់លានដុល្លារ ទៅឲ្យ អ៊ុយក្រែន តៃវ៉ាន់ និងអ៊ីស្រាអែល។
ចំពោះសង្គ្រាមអ៊ុយក្រែន, ប្រធានាធិបតីអាមេរិក វ័យ៨១ឆ្នាំរូបនេះ ថ្លែងថាសហរដ្ឋអាមេរិកត្រូវតែផ្តល់ជំនួយ ដើម្បីឈប់ស្កាត់រុស្ស៊ី។ លោកឆ្លៀតរិះគន់លោក ដូណាល់ ត្រាំ ថាបណ្តោយឲ្យរុស្ស៊ីធ្វើអ្វីស្រេចនឹងចិត្ត។ លោក បៃដិន ចាត់ទុកថាជារឿងគួរឲ្យខ្មាស ជាគ្រោះថ្នាក់ និងមិនអាចទទួលយកបានទាល់តែសោះ។ ចំពោះសំណុំរឿងសង្គ្រាមរវាងអ៊ីស្រាអែលនិងក្រុមហាម៉ាស, លោក បៃដិន បញ្ជាក់ថានឹងបង្កើតផែបណ្តោះអាសន្នមួយ នៅជិតតំបន់ហ្កាហ្សា ដើម្បីនឹងជួយសម្របសម្រួលផ្តល់ជំនួយមនុស្សធម៌ ដល់ពលរដ្ឋតំបន់ហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ