ភាពយន្ត៖ ហូលីវូដនិងសហជីពព្រមព្រៀងជាគោលការណ៍ បញ្ចប់កូដកម្ម
ក្រុមអ្នកសរសេរសាច់រឿងនៅហូលីវូដ ដែលធ្វើបាតុកម្មតាំងពី៥ខែមកហើយ បានប្រកាស រកឃើញកិច្ចព្រមព្រៀងជាគោលការណ៍ជាមួយក្រុមហ៊ុនហូលីវូដ នៅល្ងាចថ្ងៃអាទិត្យទី ២៤កញ្ញា២០២៣។ ប៉ុន្តែនៅមានចំណុចលម្អិតជាច្រើនទៀតត្រូវដោះស្រាយ មុននឹងហូលីវូដអាចនឹងចាប់ផ្តើមសកម្មភាពការងារជាធម្មតាឡើងវិញបាន។
ចុះផ្សាយនៅថ្ងៃ៖
ស្តាប់ - ០២:០៧
បន្ទាប់ពីជាប់គាំងអស់ជាច្រើនខែ សហជីពក្រុមអ្នកសរសេរសាច់រឿងនិងស្ទុយឌីយោហូលីវូដ បានព្រមព្រៀងគ្នាជាគោលការណ៍លើកិច្ចព្រមព្រៀងថ្មី ឆ្នាំ២០២៣។ ជាកិច្ចព្រមព្រៀងដ៏ ពិសេស ដែលពាំនាំប្រយោជន៍និងការពារយ៉ាងមាំទាំក្រុមអ្នកសរសេរសាច់រឿងគ្រប់ផ្នែកក្នុងពិភពភាពយន្ត។ នេះបើតាមខ្លឹមសារនៃលិខិតដែលប្រធានសហជីព(WGA)ផ្ញើមកកាន់សមាជិកក្រុម។ ដូច្នេះចាប់ពីថ្ងៃចន្ទនេះទៅ លែងមានហើយការប្រមូលផ្តុំធ្វើបាតុកម្មទ្រង់ទ្រាយធំ ប៉ុន្តែបាតុករមិនទាន់ត្រលប់ទៅធ្វើការជាធម្មតាឡើងវិញទេដរាបណាគ្រប់សហជីពមិនទាន់យល់ព្រមទទួលយកកិច្ចព្រមព្រៀងថ្មី។ ខ្លឹមសារលម្អិតនៃកិច្ចព្រមព្រៀងត្រូវបង្ហាញនៅតាមក្រោយ បន្ទាប់មកកិច្ចព្រមព្រៀងត្រូវឆ្លងកាត់ការអនុម័តយល់ព្រមពីសំណាក់គណៈកម្មការសហជីពដែលមានសមាជិក១១០០នាក់តាមរយៈការបោះឆ្នោត។
សូមរំលឹកថា ក្រុមអ្នកសរសេរសាច់រឿងភាពយន្តនិងបង្កើតកម្មវិធីទូរទស្សន៍ ជាច្រើនពាន់នាក់ បាននាំគ្នាធ្វើបាតុកូដកម្មតាំងពីដើមខែឧសភា។ បាតុកម្មដ៏ធំមិនធ្លាប់មានក្នុងប្រវត្តិហូលីវូដ ធ្វើឡើងក្នុងបំណងទាមទារដំឡើងប្រាក់បៀរវត្សរ៍ ឱ្យស្របទៅនឹងវិបត្តិអតិផរណា និងប្រាក់រង្វាន់បន្ថែមចំពោះស្នាដៃភាពយន្តនិងកម្មវិធីដែលមានជោគជ័យ ព្រមទាំងទាមទារឱ្យមានការពារស្នាដៃនិងតម្លៃការងារប្រសើរឡើងទល់នឹងបញ្ញាសិប្បនិម្មិត។
ក្រុមតារាសម្តែងក៏បានចូលរួមធ្វើបាតុកម្មជាមួយដែរ ចាប់តាំងពីខែកក្កដាមក ជាហេតុធ្វើឱ្យការថតភាពយន្ត ការចាក់បញ្ចាំងភាពយន្តតាមរោង តាមកញ្ចក់ទូរទស្សន៍ ក៏ដូចជាតាមបណ្តាញNetflix, Disney Universal និងWarner Bros រអាក់រអួលនិងយឺតយ៉ាវយ៉ាងខ្លាំង។ បាតុកម្មក្នុងវិស័យភាពយន្ត ហូលីវូដខាតបង់សេដ្ឋកិច្ចក្នុងតំបន់អស់ជាង៥ពាន់លានដុល្លាររួចមកហើយ ព្រមទាំងផលរំខានដល់វិស័យពាក់ព័ន្ធនឹងភាពយន្តជាច្រើនទៀត។
ពេលនេះហូលីវូដត្រូវងាកទៅចរចាដោះស្រាយជាមួយក្រុមតារាសម្តែងម្តង ដោយយកកិច្ចព្រមព្រៀងជាមួយក្រុមសហជីពអ្នកសរសេរសាច់រឿង មកធ្វើជាមូលដ្ឋាន ព្រោះការទាមទារប្រហាក់ប្រហែលគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ