តារាហូលីវូដ ប្រកាសធ្វើបាតុកម្មទ្រង់ទ្រាយធំ បន្ទាប់ពីចរចា គ្មានលទ្ធផល
នៅសហរដ្ឋអាមេរិក ក្រុមតារាសម្តែងភាពយន្ត អ្នកសរសេរសាច់រឿងភាពយន្ត ព្រមទាំង អ្នកធ្វើការទូទៅផ្នែកវិស័យភាពយន្ត ប្រចាំនៅក្រុមហ៊ុន ហូលីវូដ បាននាំគ្នាធ្វើកូដកម្ម អត់ធ្វើការ ជាច្រើនសប្តាហ៍មកហើយ។ សហជីពតំណាងនិយោជក តំណាងក្រុមហ៊ុនផលិតករ និងសហជីពអ្នកសម្តែង អ្នកសរសេរឿង ព្រមទាំងអ្នកសម្រុះសម្រួលរបស់រដ្ឋ បានយល់ព្រមចរចាគ្នា នៅដើមខែកក្កដា ហើយ រយៈពេលកំណត់ទុកសម្រាប់ចរចាគ្នា បានផុតកំណត់ហើយ នៅយប់ពាក់កណ្តាលអធ្រាត្រថ្ងៃពុធ ឈានចូលថ្ងៃព្រហស្បតិ៍នេះ ក៏ប៉ុន្តែ នៅតែគ្មានដំណោះស្រាយឯកភាពទេ។ ដោយមានគាំទ្រពីតារាល្បីៗច្រើននាក់ផង សហជីពតារាសម្តែងភាពយន្តហូលីវូដ បានប្រកាសធ្វើបាតុកម្មទ្រង់ទ្រាយធំ។
ចុះផ្សាយនៅថ្ងៃ៖
ស្តាប់ - ០២:៣២
ពិភពភាពយន្តហូលីវូដអាមេរិក មានតារាសម្តែងនិងអ្នកធ្វើការក្នុងវិស័យសិល្បៈទី៧នេះ ប្រមាណ ១៦០ ០០០ នាក់។ នៅក្នុងខែមេសា អ្នកសរសេរសាច់រឿង សេណារីយ៉ូ និង តារាសម្តែងភាពយន្តហូលីវូដ ជាច្រើនរយនាក់ បានធ្វើកូដកម្មសម្តែង មតិមិនពេញចិត្តចំពោះប្រាក់ខែ លក្ខខណ្ឌការងារ ហើយថ្លែងពីក្តីបារម្ភចំពោះអនាគតការងារ។
ចំពោះប្រាក់ខែ គឺថា តារាតូចតាច មិនសូវមានកេរ្តិ៍ឈ្មោះ ច្រើនតែរស់នៅខ្វះមុខខ្វះក្រោយ ហើយក្តីបារម្ភចំពោះបច្ចុប្បន្ននិងអនាគត គឺហានិយភ័យនៃការប្រើប្រាស់បច្ចេកវិទ្យាទំនើបបញ្ញាសិប្បនិមិត្ត មកជំនួសមនុស្ស ជំនួសអ្នកសម្តែង និង អ្នកសរសេរ។ ការផលិតកុនដោយប្រើបច្ចេកវិទ្យាបញ្ញាសិប្បនិមិត្ត វានឹងកាត់បន្ថយតួនាទីរបស់តួសម្តែង ជំនួសអ្នកបញ្ចូលសំឡេង ហើយនិងជំនួសអ្នកនិពន្ធសាច់រឿង។ ហេតុនេះហើយ ទើបពួកគេមិនសុខចិត្តទាល់តែសោះ និងបានធ្វើបាតុកម្ម និងកុបកម្ម នៅខែឧសភា និងមិថុនា។ បាតុកម្មបានស្ងប់ទៅវិញបន្តិច នៅពេលដែលសហជីពចូលតុចរចា។
ភាគីសហជីពគាំទ្រខាងអ្នកសម្តែង អ្នកនិពន្ធ និងអ្នកដឹកនាំរឿង ចេញសេចក្តីប្រកាសព័ត៌មាន១ពីម្សិលមិញ ដោយពន្យល់ថា សហជីពខាងផលិតករម្ចាស់ក្រុមហ៊ុន ខាងតំណាងផលិតកម្មនិងទូរទស្សន៍ មិនព្រមឯកភាពត្រង់ចំណុចសំខាន់ជាងគេបំផុត អំពីរឿងប្រាក់ខែ និងប្រាក់ឧបត្ថម្ភ។
ការចរចាបរាជ័យ គ្មានដំណោះស្រាយដូច្នេះ គឺច្បាស់ជា ភាគីខាងតារាសម្តែង អ្នកសរសេរសាច់រឿង និងអ្នកធ្វើការក្នុងវិស័យសិល្បៈទី៧ នឹងបន្តសកម្មភាពតវ៉ា ធ្វើកូដកម្ម អត់ធ្វើការជាថ្មី ហើយគេក៏ពុំអាចនឹងដឹងថា កូដកម្មនេះ ត្រូវស៊ីពេលប៉ុន្មាន និងអូសបន្លាយពេលវេលាដល់ពេលណាទើបចប់ទេ។ ការជ្រួលច្របល់ កើតមានតាំងពីថ្ងៃនេះទៅហើយ កម្មវិធីមួយចំនួននៅអង់គ្លេស និងអាមេរិក ត្រូវលុបចោល និងគ្មានអ្នកចូលរួមច្រើន ដ្បិតតារាសម្តែង និងតួល្បីៗ សម្តែងស្មារតីគាំទ្រការធ្វើបាតុកម្ម ឡើងវិញ។
តារាសម្តែងភាពយន្តអាមេរិក ធ្វើកូដកម្ម អត់ធ្វើការ ជារឿងកម្រនឹងកើតមានណាស់ នារយៈពេល ៤០ ឆ្នាំងចុងក្រោយនេះ។ កូដកម្ម ចុងក្រោយបំផុត នៅឆ្នាំ២០០៧-២០០៨។ កាលណោះ វាមានពេល ១០០ ថ្ងៃ ហើយជំនាន់នោះ វិស័យភាពយន្ត ត្រូវខាតបង់លុយកាក់ ប្រមាណ ២ ពាន់លានដុល្លារ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ