ឃាតកម្មសម្លាប់មេដឹកនាំសាសនាស៊ិក្ខនៅកាណាដាកំពុងបន្តរុញកាណាដា និងឥណ្ឌាឲ្យដំឡើងសំឡេងដាក់គ្នា
ភាពតានតឹងកំពុងបន្តមានរវាងកាណាដា និងឥណ្ឌាជុំវិញរឿងឃាតកម្មសម្លាប់មេដឹកនាំសាសនាស៊ិក្ខនៅកាណាដាកាលពីខែមិថុនា។ ក្នុងថ្ងៃចន្ទ ទី១៨ កញ្ញា កាណាដាបានចោទឥណ្ឌាពីបទនៅពីក្រោយឃាតកម្ម និងបានប្រកាសបណ្តេញប្រធានទីភ្នាក់ងារចារកិច្ចឥណ្ឌាម្នាក់ចេញពីកាណាដា។ នៅមួយថ្ងៃក្រោយមក ឥណ្ឌាបានសងសឹកវិញដោយបានប្រកាសបណ្តេញមន្ត្រីទូតជាន់ខ្ពស់កាណាដាម្នាក់ចេញពីឥណ្ឌា។ ក្នុងថ្ងៃព្រហស្បតិ៍ ទី២១ កញ្ញា ឥណ្ឌាបានសម្រេចព្យួរការផ្តល់ទិដ្ឋាការឲ្យពលរដ្ឋកាណាដាដែលចង់ចូលឥណ្ឌា។ តែកាណាដាបានព្យាយាមរំងាប់ភាពតានតឹងដោយស្នើឲ្យឥណ្ឌាចូលរួមនៅក្នុងការស៊ើបអង្កេត។
ចុះផ្សាយនៅថ្ងៃ៖
ស្តាប់ - ០២:៥១
សំណើរបស់កាណាដាបានធ្វើឡើងដោយនាយករដ្ឋមន្រ្តីលោកហ្សូសស្តាំង ទ្រុយដូពីទីក្រុងញូយ៉កដែលលោកបានចូលរួមនៅក្នុងមហាសន្និបាតអង្គការសហប្រជាជាតិ។ នៅក្នុងសំណើ លោកទ្រុយដូបានស្នើឲ្យរដ្ឋាភិបាលឥណ្ឌាចូលរួមសហការជាមួយរដ្ឋាភិបាលកាណាដាដើម្បីស្វែងរកការពិតជុំវិញរឿងឃាតកម្មសម្លាប់មេដឹកនាំសាសនាស៊ិក្ខលោក Hardeep Singh Nijjar នៅកាណាដាកាលពីខែមិថុនា។ តែលោកទ្រុយដូមិនបានបង្ហាញភស្តុតាងដែលលោកបានចោទឥណ្ឌាក្នុងថ្ងៃចន្ទ ទី១៨ កញ្ញានោះទេ។ នាយករដ្ឋមន្រ្តីកាណាដារូបនេះដដែលបានគូសបញ្ជាក់ថា រដ្ឋាភិបាលកាណាដាមិនបានស្វែងរកការបង្កហេតុ ឬបង្កឲ្យមានបញ្ហាអ្វីទេ។
គួររម្លឹកថាកាលពី ៣ថ្ងៃមុន ពោលក្នុងថ្ងៃចន្ទ ទី១៨ កញ្ញា លោកទ្រុយដូបានចោទរដ្ឋាភិបាលឥណ្ឌាពីបទនៅពីក្រោយឃាតកម្មសម្លាប់មេដឹកនាំសាសនាស៊ិក្ខលោក Hardeep Singh Nijjar។ ការចោទរបស់លោកទ្រុយដូនេះបានធ្វើឲ្យឥណ្ឌាផ្ទុះកំហឹង និងបង្កឲ្យមានវិបត្តិការទូតរវាងប្រទេសទាំងពីរដោយមានការបណ្តេញមន្រ្តីទូតគ្នាទៅវិញ ទៅមក។ បន្ទាប់មកក្នុងថ្ងៃព្រហស្បតិ៍ ទី២១ កញ្ញា រដ្ឋាភិបាលក្រុងញូដែលីបានដាក់គំនាបថ្មីលើកាណាដាដោយប្រកាសផ្អាកការផ្តល់ទិដ្ឋាការឲ្យពលរដ្ឋកាណាដាដែលចង់ចូលឥណ្ឌា។ លើសពីនេះ ក្រុងញូដែលីនឹងស្នើឲ្យក្រុងអូតាវ៉ាកាត់បន្ថយចំនួនមន្រ្តីទូតកាណាដានៅឥណ្ឌាឲ្យស្មើនឹងចំនួនមន្រ្តីទូតឥណ្ឌានៅកាណាដា។
គេនៅមិនទាន់ដឹងថា តើកាណាដានឹងចាត់វិធានការបកវិញដូចឥណ្ឌាដែរ ឬទេ ពិសេសផ្អាកការផ្តល់ទិដ្ឋាការឲ្យពលរដ្ឋឥណ្ឌាដែលចង់ចូលកាណាដា។ អ្វីដែលគេអាចនិយាយបាន វិបត្តិការទូតរវាងប្រទេសទាំងពីរប្រហែលមិនងាយចប់ភ្លាមៗទេ។ ក្រៅពីវិបត្តិនៅក្នុងទំនាក់ទំនងការទូត រឿងអាស្រូវមួយនេះក៏កំពុងគំរាមកំហែងដល់ទំនាក់ទំនងពាណិជ្ជកម្មរវាងប្រទេសទាំងពីរដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ