ផ្ទុះវិបត្តិការទូតរវាងកាណាដានិងឥណ្ឌា ដោយសារករណីឃាតកម្មមេដឹកនាំសាសនាស៊ិក្ខនៅកាណាដា
វិបត្តិការទូតកំពុងតែផ្ទុះកក្រើកឡើង រវាងឥណ្ឌានិងកាណាដា ដោយរដ្ឋាភិបាលទាំងសងខាង បានបណ្តេញមន្ត្រីការទូតរបស់ប្រទេសម្ខាងទៀត តែរៀងៗខ្លួន។ កាលពីថ្ងៃចន្ទទី១៨កញ្ញា រដ្ឋាភិបាលកាណាដា បានប្រកាសបណ្តេញ ប្រធានទីភ្នាក់ងារចារកិច្ចឥណ្ឌាម្នាក់ប្រចាំនៅកាណាដា។ មួយថ្ងៃក្រោយ ជាការឆ្លើយតបវិញ រដ្ឋាភិបាលឥណ្ឌា បានសម្រេចបណ្តេញមន្ត្រីទូតជាន់ខ្ពស់ម្នាក់ របស់កាណាដា ឲ្យចាកចេញពីឥណ្ឌា ក្នុងរយៈពេល៥ទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២១
ដំណើរដើមហេតុ គឺដោយសារតែមានករណីឃាតកម្មមួយនៅកាណាដា កាលពីខែមិថុនា ធ្វើទៅលើលោក Hardeep Singh Nijjar ដែលជាមេដឹកនាំចលនាសាសនាស៊ិក្ខ (Sikh) ដ៏សំខាន់ម្នាក់នៅកាណាដា។ ក្រោយការស៊ើបអង្កេតលំអិត អាជ្ញាធរកាណាដាបានអះអាងថា មានធាតុផ្សំយ៉ាងជាក់ច្បាស់ គួរឲ្យទុកចិត្តបំផុត ដែលបញ្ជាក់ថា រដ្ឋាភិបាលឥណ្ឌាជាអ្នកនៅពីក្រោយអំពើឃាតកម្មនេះ។
នៅចំពោះមុខសភាកាណាដា កាលពីថ្ងៃចន្ទ លោកនាយករដ្ឋមន្ត្រី យូស្តាំង ទ្រុយដូ បានថ្លែងថា ការចូលរួមឃុបឃិតពីសំណាក់រដ្ឋាភិបាលប្រទេសមួយ នៅក្នុងអំពើឃាតកម្មសម្លាប់ជនជាតិកាណាដា នៅលើទឹកដីកាណាដាដោយផ្ទាល់បែបនេះ វាគឺជារឿងបំពានដ៏ធ្ងន់ធ្ងរ ដែលប៉ះពាល់មកលើអធិបតេយ្យភាពរបស់កាណាដា។
ក្រោយការលើកឡើងនេះរបស់ភាគីកាណាដា ក្រសួងការបរទេសឥណ្ឌា បានបដិសេធច្រានចោលភ្លាមៗ ដោយបានលើកឡើងថា ឥណ្ឌាជាប្រទេសប្រជាធិបតេយ្យគោរពនីតិរដ្ឋ។ លិខិតប្រកាសរបស់ឥណ្ឌា បានអះអាងទៀតថា ការចោទដោយគ្មានមូលដ្ឋានរបស់កាណាដានេះ គឺវាមានចេតនាបង្វែរចំណាប់អារម្មណ៍មហាជន ឲ្យងាកចេញពីក្រុមចលនាភេរវនិយម ជ្រុលនិយម ដែលធ្វើសកម្មភាពបះបោរ គំរាមបូរណភាពដែនដីរបស់ឥណ្ឌា។
សូមរំលឹកថា ប៉ុន្មានខែមកហើយ ដែលកាណាដានិងឥណ្ឌាចាប់ផ្តើមមានទំនាស់នឹងគ្នា ទាក់ទិននឹងសកម្មភាពរបស់សហគមន៍អ្នកកាន់សាសនាស៊ិក្ខ ដែលភាគច្រើនបំផុតរស់នៅកាណាដា។ ថ្មីៗនេះ កាណាដាបានផ្អាកការចរចាជាមួយឥណ្ឌា ស្តីពីការបង្កើតកិច្ចព្រមព្រៀងពាណិជ្ជកម្មសេរី ហើយរដ្ឋមន្ត្រីពាណិជ្ជកម្មកាណាដា បានលុបចោលដំណើរទៅឥណ្ឌា ដែលគ្រោងធ្វើនៅខែតុលា។
គួរបញ្ជាក់ថា អង្គការពិភពលោកនៃអ្នកកាន់សាសនាស៊ិក្ខនៅកាណាដា អះអាងថាខ្លួនធ្វើសកម្មភាពដើម្បីការពារផលប្រយោជន៍សហគមន៍ខ្លួនតែប៉ុណ្ណោះ។ ប៉ុន្តែសម្រាប់រដ្ឋាភិបាលឥណ្ឌា គឺអង្គការនេះ ធ្វើសកម្មភាពបះបោរបំបែកទឹកដី បង្កើតរដ្ឋឯករាជ្យឈ្មោះ Khalistan នៅរដ្ឋពុនចាបរបស់ឥណ្ឌា ជាទីដែលមានអ្នកកាន់សាសនាស៊ិក្ខរស់នៅ ប្រមាណ៥៨%។ រដ្ឋាភិបាលឥណ្ឌា ធ្លាប់បានចោទរដ្ឋាភិបាលកាណាដា ថាបានធ្មេចភ្នែក មិនបោសសំអាតក្រុមនេះ ដែលខ្លួនចាត់ទុកថាជាក្រុម ជ្រុលនិយមបំបែកទឹកដី។
គួររំលឹកដែរថា កាលពីពេលជំនួបកំពូល G20 នៅញូដេលី លោកយូស្តាំង ទ្រុយដូ បាននិយាយប្រាប់ទៅលោកម៉ូឌី អំពីករណីឃាតកម្មមេដឹកនាំសាសនាស៊ិក្ខ នៅកាណាដា ថាជារឿងមិនអាចទទួលយកបានទេ។ តែលោកម៉ូឌី បានឆ្លើយច្រានចោលទាំងស្រុង និងបានលើកឡើងពីការបារម្ភរបស់ឥណ្ឌាវិញ ទាក់ទិននឹងសកម្មភាពប្រឆាំងឥណ្ឌា របស់ក្រុមជ្រុលនិយមដែលមានទីតាំងនៅកាណាដា។ លោកទ្រុយដូ បានប្រាប់អ្នកកាសែតថា ក្នុងពេលនោះ លោកបានឆ្លើយប្រាប់ទៅលោកម៉ូឌីវិញថា កាណាដាការពារសិទ្ធិសេរីភាពបញ្ចេញមតិ សេរីភាពសាសនា និងសេរីភាពធ្វើបាតុកម្មដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ