សមុទ្រក្រហម៖ អាមេរិកបង្កើតសម្ព័ន្ធភាពអន្តរជាតិ ដើម្បីទប់ទល់នឹងការវាយប្រហាររបស់ក្រុមហ៊ូទី
លោករដ្ឋមន្ត្រីក្រសួងការពារជាតិអាមេរិក Lloyd Austin បានប្រកាសនៅថ្ងៃអង្គារ ទី១៩ធ្នូនេះថា សហរដ្ឋអាមេរិកនឹងបង្កើតសម្ព័ន្ធភាពអន្តរជាតិមួយ ដើម្បីទប់ទល់នឹងការវាយប្រហាររបស់ក្រុមហ៊ូទីយេម៉ែន នៅក្នុងតំបន់សមុទ្រក្រហម។ ប្រទេសសរុបទាំងអស់ចំនួន១០ នឹងចូលរួមនៅក្នុងសម្ព័ន្ធភាពនេះ ដែលមានដូចជា បារាំង អង់គ្លេស បារ៉ែន កាណាដា អ៊ីតាលី ហូឡង់ ន័រវែស អេស្ប៉ាញ និងសីឈែល។ ភ្លាមៗក្រោយការប្រកាសនេះ ក្រុមហ៊ូទីយេម៉ែន បានអះអាងថា ខ្លួននឹងបន្តវាយប្រហារដោយមិនញញើតឡើយ។
ចុះផ្សាយនៅថ្ងៃ៖
ស្តាប់ - ០៣:៤៣
ថ្លែងពីអ៊ីស្រាអែល បន្ទាប់ពីបានជួបលោកនាយករដ្ឋមន្ត្រីនេតាន់យ៉ាហ៊ូ លោករដ្ឋមន្ត្រីការពារជាតិអាមេរិក បានលើកឡើងថា ការវាយប្រហារថ្មីៗនេះរបស់ក្រុមហ៊ូទីយេម៉ែន នៅក្នុងតំបន់សមុទ្រក្រហម វាគឺជាការវាយប្រហារដែលគ្មានការទទួលខុសត្រូវ គំរាមមកលើសេរីភាពនៃចរាចរណ៍ពាណិជ្ជកម្ម បង្កហានិភ័យដល់អាយុជីវិតរបស់ក្រុមនាវិកស្លូតត្រង់ និងបំពានមកលើច្បាប់អន្តរជាតិ។ លោកបន្តថា ដោយហេតុនេះ សហរដ្ឋអាមេរិក សូមប្រកាសនៅថ្ងៃនេះ បង្កើតសម្ព័ន្ធភាពអន្តរជាតិមួយ មានឈ្មោះថា Prosperity Guardian ដើម្បីការពារសន្តិសុខតំបន់សមុទ្រក្រហម។
គួរកត់សំគាល់ថា អ៊ីស្រាអែលមិនស្ថិតនៅក្នុងសម្ព័ន្ធភាពថ្មីនេះទេ។ លោក Lloyd Austin បានថ្លែងអំពាវនាវ ហៅឲ្យអ៊ីរ៉ង់ ត្រូវតែឈប់ទំនុកបម្រុង ជួយក្រុមហ៊ូទីតទៅទៀត នៅក្នុងសកម្មភាពវាយប្រហារមកលើនាវាដឹកទំនិញអន្តរជាតិ។ សូមរំលឹកដែរ ថាកាលពីឆ្នាំ២០១៩ សហរដ្ឋអាមេរិក បានចងក្រងសម្ព័ន្ធភាពផ្លូវសមុទ្រមួយរួចហើយ ដើម្បីការពារចរាចរណ៍នាវាដឹកប្រេង នៅក្នុងតំបន់ឈូងសមុទ្រពែក្ស បន្ទាប់ពីមានការវាយប្រហារជាច្រើនដង ដែលអាមេរិកអះអាងថា ជាស្នាដៃរបស់អ៊ីរ៉ង់។
សូមបញ្ជាក់ថា តំបន់សមុទ្រក្រហម គឺជាផ្លូវឆ្លងកាត់នៃនាវាដឹកទំនិញអន្តរជាតិ ទំហំប្រមាណ៤០% នៃពាណិជ្ជកម្មពិភពលោក។ ថ្មីៗនេះ នៅក្នុងបរិបទសង្គ្រាមនៅហ្កាហ្សា ក្រុមហ៊ូទីកូនចៅអ៊ីរ៉ង់នៅយេម៉ែន បានប្រកាសគំរាមថានឹងវាយប្រហារ ទៅលើនាវាទាំងអស់ ដែលបើកឆ្លងកាត់ច្រកសមុទ្រ Bab al-Mandeb ឲ្យតែនាវានោះ មានជាប់ពាក់ព័ន្ធជាមួយអ៊ីស្រាអែល។ ២សប្តាហ៍កន្លងមកនេះ ក្រុមហ៊ូទីបានវាយប្រហារជាច្រើនលើក ដោយបានបាញ់មីស៊ីល គ្រាប់រ៉ូកែត ដ្រូនអត្តឃាត ព្រមទាំងបានប្លន់យកនាវាដឹកទំនិញថែមទៀត។ លោកស្រី Catherine Colonna រដ្ឋមន្ត្រីក្រសួងការបរទេសបារាំង បានលើកឡើងថា គេមិនអាចឈរឱបដៃមើលការវាយប្រហារទាំងនេះ ដោយមិនឆ្លើយតបទៅវិញនោះឡើយ។
ក្រុមហ៊ុនដឹកជញ្ជូនផ្លូវសមុទ្រធំៗជាច្រើន ជាក់ស្តែង ក្រុមហ៊ុនដាណឺម៉ាក Maersk ក្រុមហ៊ុនបារាំង CMA CGM ក្រុមហ៊ុនអ៊ីតាលីស្វ៊ីស MSC និងក្រុមហ៊ុនអាល្លឺម៉ង់ Hapag Lloyd បាននាំគ្នាប្រកាសជាបន្តបន្ទាប់ ផ្អាកការធ្វើចរាចរណ៍នាវា នៅក្នុងសមុទ្រក្រហម ល្គឹកណាស្ថានការណ៍សន្តិសុខមិនទាន់ត្រលប់មករកភាពប្រក្រតីវិញ។ នៅថ្ងៃអង្គារទី១៩ធ្នូនេះដែរ ក្រុមហ៊ុងប្រេង BP និងក្រុមហ៊ុនដឹកជញ្ជូនផ្លូវសមុទ្រតៃវ៉ាន់ Evergreen ក៏បានប្រកាសផ្អាកការធ្វើចរាចរណ៍មួយរយៈដែរ។
គួរបញ្ជាក់ដែរថា ប្រសិនបើនាវាដឹកទំនិញ ឈប់បើកតាមព្រែកជីកស៊ុយអេ និងសមុទ្រក្រហម នោះមានន័យថាវានាត្រូវបើកវៀងទ្វីបអាហ្វ្រិកទាំងមូលតែម្តង។ ប្រការនេះនឹងធ្វើឲ្យរយៈពេលធ្វើដំណើរ កើនឡើង។ ជាឧទាហរណ៍ យោងតាមការិយាល័យ S&P Global រវាងពីកំពង់ផែរ៉ូតែដាំនៅហូឡង់ ទៅដល់កំពង់ផែសិង្ហបុរី បើបើកវៀងតាមទ្វីបអាហ្វ្រិក គឺនាវាដឹកទំនិញ ត្រូវការពេលវេលាបន្ថែមចំនួនដល់ទៅ៤០% ឯណោះ ព្រោះចម្ងាយផ្លូវនឹងកើនពី ១៥៥០០គីឡូម៉ែត្រ ដល់ទៅ២១៧០០គីឡូម៉ែត្រ។ ចំណុចនេះដែរ អាចនឹងធ្វើឲ្យអេហ្ស៊ីប ខាតបង់ប្រាក់ជាច្រើន ដោយសារតែចំនួននាវាដឹកទំនិញ ឆ្លងកាត់ព្រែកជីកស៊ុយអេ នឹងថយចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ