នាវាចម្បាំងអាមេរិក និងអង់គ្លេសវាយប្រហារបន្តបន្ទាប់គ្នាដ្រូនរបស់ពួកហ៊ូទីយេម៉ែន នៅសមុទ្រក្រហម
សន្តិសុខ នៅសមុទ្រក្រហមកាន់តែធ្លាក់ដុនដាប ដោយសារការវាយប្រហាររបស់ក្រុមឧទ្ទាមហ៊ូទីនៅយេម៉ែនទៅលើកប៉ាល់ដឹកទំនិញអន្តរជាតិ ដែលឆ្លងកាត់ច្រកសមុទ្រ កៀកនឹងឆ្នេរយេម៉ែន។ នៅថ្ងៃចន្ទទី១៨ ធ្នូ ក្រុមហ៊ូទីយេម៉ែនអះអាងខ្លួនជាអ្នកវាយប្រហារលើកប៉ាល់ដឹកទំនិញរបស់ក្រុមហ៊ុនន័រវែស នៅសមុទ្រក្រហម។ ការវាយប្រហារដោយដ្រូន និងមីស៊ីលរបស់ពួកឧទ្ទាមហ៊ូទីយេម៉ែនបានធ្វើឲ្យក្រុមហ៊ុនដឹកជញ្ជូនផ្លូវសមុទ្រធំៗបំផុតក្នុងពិភពលោកប្រកាសផ្អាកការធ្វើចរាចរណ៍ នៅច្រកសមុទ្រ Bab al-Mandab ដែលជាច្រកផ្លូវកាត់រវាងអាស៊ី និងអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៣
ក្រុមឧទ្ទាមហ៊ូទីយេម៉ែននៅតែបន្តធ្វើព្យុះធ្វើភ្លៀង នៅសមុទ្រក្រហម ដោយបើកការវាយប្រហារទៅលើកប៉ាល់ដឹកទំនិញពីរគ្រឿងទៀត នៅថ្ងៃចន្ទទី ១៨ធ្នូ។ នៅក្នុងសេចក្តីប្រកាស ក្រុមហ៊ូទីយេម៉ែនអះអាងថា ខ្លួនជាអ្នកវាយប្រហារទៅលើកប៉ាល់ដឹកទំនិញ ដែលមានទំនាក់ទំនងជាមួយប្រទេសអ៊ីស្រាអែល។
ក្រុមហ៊ូទីយេម៉ែនចេញមុខទទួលខុសត្រូវ បន្ទាប់ពីក្រុមហ៊ុនដឹកជញ្ជូនន័រវែសអះអាងថា កប៉ាល់របស់ខ្លួន ឈ្មោះ Swan Atlantic បានរងការវាយប្រហារដោយវត្ថុមួយប្រភេទ ដែលបានបណ្តាលឲ្យកប៉ាល់ត្រូវខូចខាតបន្តិចបន្តួច ប៉ុន្តែ គ្មានអ្នករបួស។ កប៉ាល់ចម្បាំងរបស់អាមេរិក USS Carney និយាយថា នៅព្រឹកថ្ងៃចន្ទ គេបានទទួលសញ្ញាសុំជំនួយពីកប៉ាល់ដឹកទំនិញ នៅភាគខាងត្បូងសមុទ្រក្រហម។
ពួកឧទ្ទាមហ៊ូទីផ្គើនវាយប្រហារទៅលើកប៉ាល់ដឹកទំនិញ នៅសមុទ្រក្រហម ដោយគ្មានរអែងចិត្តរដ្ឋមន្រ្តីការពារជាតិអាមេរិក ដែលកំពុងធ្វើដំណើរទៅតំបន់ដើមបូព៌ា ដើម្បីនិយាយពីបញ្ហាសន្តិសុខផ្លូវទឹក នៅសមុទ្រក្រហម។
តាមសេចក្តីប្រកាស ដែលក្រសួងការពារជាតិអាមេរិក ចេញផ្សាយនៅចុងសប្តាហ៍មុន ពេលទៅដល់ប្រទេសបារ៉ែន នៅថ្ងៃចន្ទ ប្រមុខការពារជាតិអាមេរិកគ្រោងពិភាក្សាជាមួយប្រទេសដៃគូនៅក្នុងតំបន់ដើម្បីបង្កើតកងកម្លាំងអន្តរជាតិ ដែលមានតួនាទីជាអ្នកធានាសុវត្ថិភាព ការពារសន្តិសុខឲ្យរាល់កប៉ាល់ដឹកទំនិញអន្តរជាតិ នៅចំពោះមុខការវាយប្រហារដ្រូន និងមីស៊ីលរបស់ក្រុមហ៊ូទីយេម៉ែន នៅសមុទ្រក្រហម។
តាមការចុះផ្សាយរបស់កាសែតអង់គ្លេស The Guardian អាមេរិកគ្រោងកៀងគរសម្ព័ន្ធមិត្ត និងក្រុមប្រទេសអារ៉ាប់ ក្នុងតំបន់ឲ្យចូលរួមក្នុងសម្ព័ន្ធយោធាដឹកនាំដោយអាមេរិក ដើម្បីធានាសុវត្ថិភាពដល់ការធ្វើចរាចរណ៍ នៅសមុទ្រក្រហម ជាពិសេសនៅច្រកសមុទ្រ Bab al-Mandab ចន្លោះយេម៉ែន និងតំបន់ស្នែងអាហ្វ្រិក ជាទីដែលកប៉ាល់ដឹកទំនិញអន្តរជាតិ ប្រមាណ៤០% ត្រូវការឆ្លងកាត់រវាងអាស៊ី និងអឺរ៉ុប។ នៅថ្ងៃចន្ទ នៅមុនកប៉ាល់ដឹកជញ្ជូនន័រវែសរងការវាយប្រហារ ក្រុមហ៊ុនប្រេងអង់គ្លេសបានប្រកាសថា ខ្លួនផ្អាកការដឹកជញ្ជូនប្រេងតាមច្រកសមុទ្រក្រហម រហូតដល់មានស្ថិរភាពឡើងវិញ។
នៅថ្ងៃសៅរ៍ កន្លងទៅ កប៉ាល់ចម្បាំងអាមេរិក បានបាញ់ទម្លាក់យន្តហោះដ្រូន៩គ្រឿងដែលបាញ់ចេញពីតំបន់កាន់កាប់របស់ពួកហ៊ូទីនៅយេម៉ែន។ រដ្ឋាភិបាលអង់គ្លេសវិញ បានអះអាងថា នៅថ្ងៃដដែលនោះ កប៉ាល់ចម្បាំងអង់គ្លេសក៏បានបាញ់ទម្លាក់ដ្រូននៅក្នុងតំបន់ដដែល ដើម្បីការពារកប៉ាល់ដឹកទំនិញរបស់អង់គ្លេសនៅសមុទ្រក្រហម។
គាំទ្រទាំងអាវុធ និងហិរញ្ញវត្ថុពីអ៊ីរ៉ង់ ក្រុមឧទ្ទាមហ៊ូទី ដែលធ្វើសង្រ្គាមចូលគ្រប់គ្រងពាក់កណ្តាលនៃទឹកដីយេម៉ែន អះអាងថា គេវាយប្រហារតែទៅលើកប៉ាល់ដឹកទំនិញដែលសំដៅចូលទឹកដីអ៊ីស្រាអែល ឬកប៉ាល់ទំនិញដែលមានជាប់ទាក់ទងផលប្រយោជន៍របស់អ៊ីស្រាអែល ដើម្បីជាសាមគ្គីភាពជាមួយប្រជាជនប៉ាឡេស្ទីន។ នៅថ្ងៃចន្ទ អ្នកនាំពាក្យរបស់ក្រុមហ៊ូទី និយាយថា នៅក្នុងការចរចា ដែលមានប្រទេសអូម៉ង់ជាអន្តរការី ក្រុមហ៊ូទីសុខចិត្តឈប់វាយប្រហារទៅលើកប៉ាល់ដឹកទំនិញអន្តរជាតិ នៅសមុទ្រក្រហម បើសិន អ៊ីស្រាអែលឈប់វាយប្រហារទៅលើហ្កាហ្សា និងបើកច្រកមនុស្សធម៌ ដើម្បីឲ្យដឹកជញ្ជូន នាំចូលស្បៀងអាហារ ថ្នាំពេទ្យ ទៅជួយប្រជាជនប៉ាឡេស្ទីន ក្នុងទឹកដីហ្កាហ្សា។
នៅក្នុងសង្រ្គាមវាយប្រហារលើក្រុមហាម៉ាស ជាង២ខែមកនេះ អ៊ីស្រាអែលកំពុងរងការរិះគន់សូម្បីពីសម្ព័ន្ធមិត្តថា កំពុងបិទខ្ទប់ ធ្វើឲ្យប្រជាជនប៉ាឡេស្ទីនត្រូវជួបគ្រោះអត់ឃ្លាន និងជំងឺរាតត្បាត មួយជាន់ទៀតបន្ថែមពីលើទុក្ខវេទនាដោយសារការទម្លាក់គ្រាប់បែករបស់កងទ័ពអ៊ីស្រាអែល
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ