លោកនេតាន់យ៉ាហ៊ូ បដិសេធការប្រកាសទទួលស្គាល់រដ្ឋប៉ាឡេស្ទីន ក្រៅក្របខណ្ឌចរចាសន្តិភាព
លោកនាយករដ្ឋមន្ត្រីអ៊ីស្រាអែល បេនចាមិន នេតាន់យ៉ាហ៊ូ បានបដិសេធច្រានចោល នូវការប្រកាសណាមួយពីសហគមន៍អន្តរជាតិ ដែលទទួលស្គាល់រដ្ឋប៉ាឡេស្ទីន ដោយមិនឆ្លងកាត់ការចរចាសន្តិភាពជាមួយអ៊ីស្រាអែល។ ការលើកឡើងដូច្នេះរបស់លោកនេតាន់យ៉ាហ៊ូ គឺត្រូវបានធ្វើឡើង ក្រោយការចុះផ្សាយរបស់បណ្តាញព័ត៌មានអាមេរិក ដែលថាអាមេរិកនិងក្រុមប្រទេសអារ៉ាប់ កំពុងរៀបចំផែនការសន្តិភាពមួយ ដែលក្នុងនោះ គឺមានការប្រកាសទទួលស្គាល់រដ្ឋប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:៤៤
ល្ងាចថ្ងៃព្រហស្បតិ៍ ទី១៥កុម្ភៈ លោកបេនចាមិន នេតាន់យ៉ាហ៊ូ បានប្រកាសច្រានចោលយ៉ាងម៉ឺងម៉ាត់ ថាអ៊ីស្រាអែលមិនទទួលយកជាដាច់ខាត នូវការប្រកាសទទួលស្គាល់រដ្ឋប៉ាឡេស្ទីនដោយអត្តនោម័ត ពីសំណាក់សហគមន៍អន្តរជាតិ ប្រសិនបើការប្រកាសនោះ ធ្វើឡើងក្រៅក្របខណ្ឌនៃការចរចាសន្តិភាពរវាងអ៊ីស្រាអែល និងប៉ាឡេស្ទីន។
នៅក្នុងសារបង្ហោះលើបណ្តាញសង្គម X លោកនេតាន់យ៉ាហ៊ូ បានលើកឡើងថា ប្រសិនបើសហគមន៍អន្តរជាតិប្រកាសទទួលស្គាល់ដោយអត្តនោម័ត នូវរដ្ឋប៉ាឡេស្ទីន ដោយគ្មានឆ្លងកាត់ក្នុងដំណើរការចរចាសន្តិភាពជាមួយអ៊ីស្រាអែល នោះគឺមានន័យថា វាជាការផ្តល់រង្វាន់លើកទឹកចិត្តដ៏ធំមហិមា ដល់ក្រុមភេរវកម្មហាម៉ាស ដែលបានចូលមកសម្លាប់មនុស្សនៅក្នុងទឹកដីអ៊ីស្រាអែល កាលពីថ្ងៃទី៧តុលា។
លោកបានសរសេរបន្តថា ការប្រកាសទទួលស្គាល់រដ្ឋប៉ាឡេស្ទីន គឺអាចធ្វើទៅបាន ល្គិកណាទាល់តែឆ្លងកាត់ ការចរចាដោយផ្ទាល់និងដោយគ្មានលក្ខខណ្ឌបឋម រវាងភាគីប៉ាឡេស្ទីននិងអ៊ីស្រាអែល។ លោកអះអាងថា អ៊ីស្រាអែល និងបន្តបដិសេធច្រានចោល មិនទទួលយកជាដាច់ខាត ចំពោះការដាក់កំហិតដោយអត្តនោម័តណាមួយ ពីសំណាក់សហគមន៍អន្តរជាតិ ទាក់ទិននឹងដំណោះស្រាយសន្តិភាពរវាងអ៊ីស្រាអែលប៉ាឡេស្ទីន។
សូមបញ្ជាក់ថា ប្រតិកម្មរបស់លោកនាយករដ្ឋមន្ត្រីអ៊ីស្រាអែលនេះ គឺត្រូវបានធ្វើឡើង ក្រោយការចុះផ្សាយរបស់កាសែត Washington Post ដែលបានសរសេរថា សហរដ្ឋអាមេរិក រួមជាមួយក្រុមប្រទេសអារ៉ាប់សម្ព័ន្ធមិត្ត កំពុងតែធ្វើការងារ រៀបចំផែនការពេញលេញមួយ ឈានទៅកសាងសន្តិភាពជានិរន្ត ក្រោយចប់សង្គ្រាមនៅហ្កាហ្សា។
ផ្អែកតាមការចុះផ្សាយនេះ ផែនការសន្តិភាពនេះ គឺមានដំណាក់កាលផ្អាកការប្រយុទ្ធរយៈពេល៦សប្តាហ៍ និងមានការដោះលែងចំណាប់ខ្មាំង ដែលក្រុមហាម៉ាសបានចាប់យកទៅនៅថ្ងៃទី៧តុលា។ ដំណាក់កាលបន្ទាប់ គឺកំណត់ប្រក្រតីទិន ឈានទៅប្រកាសរដ្ឋប៉ាឡេស្ទីនជាផ្លូវការ។ កាសែត Washington Post ដែលផ្អែកតាមប្រភពពីមន្ត្រីការទូតអាមេរិក និងក្រុមប្រទេសអារ៉ាប់ បានអះអាងថា គេសង្ឃឹមថាផែនការនេះ នឹងចេញជាលាយលក្ខណ៍អក្សរ មុនបុណ្យបួសរ៉ាម៉ាដន់ ពោលគឺ មុនថ្ងៃទី១០មីនា។
គួរកត់សំគាល់ដែរថា ក្រៅពីប្រតិកម្មរបស់លោកនេតាន់យ៉ាហ៊ូ រដ្ឋមន្ត្រីអ៊ីស្រាអែលដ៏មានឥទ្ធិពល២នាក់ទៀត Itamar Ben Gvir និងលោក Bezalel Smotrich ក៏បានបដិសេធច្រានចោលផែនការសន្តិភាព ដែលកាសែត Washington Post បានចុះផ្សាយដែរ។ ដោយចាត់ទុក រដ្ឋប៉ាឡេស្ទីនគឺជាការគំរាមដោយផ្ទាល់និងជារៀងដរាបមកលើសន្តិសុខអ៊ីស្រាអែល លោក Bezalel Smotrich រដ្ឋមន្ត្រីហិរញ្ញវត្ថុអ៊ីស្រាអែល បានសរសេរលើបណ្តាញសង្គមX ថាការប្រកាសបង្កើតរដ្ឋប៉ាឡេស្ទីននៅពេលនេះ គឺមិនខុសពីការជូនរង្វាន់លើកទឹកចិត្តដល់ពួកប៉ាឡេស្ទីនដែលបានវាយប្រហារ មកលើអ៊ីស្រាអែលនៅថ្ងៃទី៧តុលាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ