កងទ័ពអ៊ីស្រាអែលរំដោះបានចំណាប់ខ្មាំង២នាក់ ប៉ុន្តែ សម្លាប់ប្រជាជនប៉ាឡេស្ទីនយ៉ាងតិច ៦០នាក់
កងទ័ពអ៊ីស្រាអែលបានប្រកាសនៅព្រឹកព្រលឹមថ្ងៃចន្ទទី ១២កុម្ភៈនេះថា ខ្លួនបានចូលទៅរំដោះយកបានចំណាប់ខ្មាំងពីរនាក់ នៅក្នុងប្រតិបត្តិការយោធា នៅយប់ថ្ងៃអាទិត្យម្សិលមិញ នៅទីក្រុងរ៉ាហ្វា ភាគខាងត្បូងហ្កាហ្សា ជាប់ព្រំដែនអេហ្ស៊ីប។ ប្រតិបត្តិការរំដោះចំណាប់ខ្មាំង ដែលមានអមដោយការទម្លាក់គ្រាប់របស់កងទ័ពអ៊ីស្រាអែល បានសម្លាប់ប្រជាជនស៊ីវិលប៉ាឡេស្ទីន យ៉ាងតិច ៦០នាក់ ហើយភាគច្រើនជាស្រ្តីនិងកុមារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៣
នៅយប់ថ្ងៃអាទិត្យទី ១១កុម្ភៈ កងកុម្ម៉ង់ដូរពិសេសរបស់អ៊ីស្រាអែលបើកប្រតិបត្តិការចូលទៅរំដោះចំណាប់ខ្មាំងអ៊ីស្រាអែល នៅទីក្រុងរ៉ាហ្វា ភាគខាងត្បូងរបស់ហ្កាហ្សា ជាប់ព្រំដែនអេហ្ស៊ីប។ បើតាមអ្នកនាំពាក្យរបស់កងទ័ពអ៊ីស្រាអែល គេបានគិតទុកគម្រោងការនេះជាយូរមកហើយ ដោយរង់ចាំតែឱកាសតែប៉ុណ្ណោះ។ ប្រតិបត្តិការរំដោះចំណាប់ខ្មាំងជាប្រតិបត្តិការដ៏ស្មុគស្មាញបំផុត។
ចំណាប់ខ្មាំងត្រូវចាប់ឃុំនៅជាន់ទី២ក្នុងអគារមួយក្នុងទីក្រុងរ៉ាហ្វា ប៉ុន្តែ កងកុម្ម៉ង់ដូរអាចសម្រូតខ្លួន ចូលទៅក្នុងអគារ និងប៉ះទង្គិចអាវុធជាមួយក្រុមប្រដាប់អាវុធ ដែលស្ថិតនៅអគារជិតខាង។ កងទ័ពអ៊ីស្រាអែលអះអាងថា គេបានសម្លាប់ភេរវជនជាច្រើននាក់ ប៉ុន្តែ មានទាហានអ៊ីស្រាអែលម្នាក់ស្លាប់។
ចំណែក ចំណាប់ខ្មាំងពីរនាក់ ដែលមានអាយុ ៦០ និង៧០ឆ្នាំ ត្រូវកងកុម្ម៉ង់ដូររំដោះយកចេញ និងបញ្ជូនតាមឧទ្ធម្ភាគចក្រសំដៅមន្ទីរពេទ្យ ក្នុងទឹកដីអ៊ីស្រាអែល នៅយប់ថ្ងៃអាទិត្យ។ តាមប្រធានមន្ទីរពេទ្យ ចំណាប់ខ្មាំងទាំងពីរនាក់ស្ថិតក្នុងស្ថានភាពនឹងន ផុតពីគ្រោះថ្នាក់។
ប្រធានាធិបតីអាហ្សង់ទីនបានផ្ញើសារថ្លែងអំណរគុណកងទ័ពអ៊ីស្រាអែល ព្រោះថា ចំណាប់ខ្មាំង១នាក់ ដែលអ៊ីស្រាអែលរំដោះម្សិលមិញ ជាជនជាតិអាហ្សង់ទីន ដែលត្រូវពួកហាម៉ាសចូលមកចាប់អូសយកទៅទុកនៅហ្កាហ្សា តាំងពីថ្ងៃទី៧តុលា ឆ្នាំមុន។
នាយករដ្ឋមន្រ្តីអ៊ីស្រាអែល លោកបេនចាមីន នេតាន់យ៉ាហ៊ូដែលតាមដានប្រតិបត្តិការរំដោះចំណាប់ខ្មាំង កាលពីយប់ថ្ងៃអាទិត្យ ក៏ថ្លែងកោតសរសើរកងទ័ពអ៊ីស្រាអែលដែរ។
ក្រុមហាម៉ាសវិញ បានព្រមានថា បើសិនអ៊ីស្រាអែលវាយប្រហារជើងគោក ចូលទីក្រុងរ៉ាហ្វា នោះកិច្ចព្រមព្រៀងស្តីពីការដោះលែងចំណាប់ខ្មាំងនឹងត្រូវរលាយសាបសូន្យ។ ក្រុមគ្រួសាររបស់ចំណាប់ខ្មាំង ដែលត្រូវពួកហាម៉ាសចាប់យកទៅឃុំនៅ ហ្កាហ្សាបានអំពាវនាវឲ្យរដ្ឋាភិបាលអ៊ីស្រាអែលបន្តចរចាព្រោះថា នៅមានមនុស្សជាង១០០នាក់ ដែលកំពុងស្ថិតនៅជាចំណាប់ខ្មាំងក្នុងដៃរបស់ពួកហាម៉ាស។
ប៉ុន្តែ នាយករដ្ឋមន្រ្តីអ៊ីស្រាអែលដែលធ្លាប់បិទផ្លូវចរចាជាមួយក្រុមហាម៉ាស និងបញ្ជាឲ្យកងទ័ពអ៊ីស្រាអែលត្រៀមវាយចូលទីក្រុងរ៉ាហ្វា ភាគខាងត្បូងហ្កាហ្សា ដើម្បីគាស់រំលើង បំផ្លាញក្រុមហាម៉ាសនៅហ្កាហ្សា បានបញ្ជាក់កាលពីថ្ងៃអាទិត្យថា មានតែការដាក់សម្ពាធយោធារហូតដល់ជ័យជំនះទាំងស្រុងទេ ដែលអាចឈានទៅរំដោះចំណាប់ខ្មាំង។ អ៊ីស្រាអែលចូលទៅរំដោះចំណាប់ខ្មាំងបាន ២នាក់ មែន ប៉ុន្តែ ការទម្លាក់គ្រាប់របស់កងទ័ពជើងអាកាសអ៊ីស្រាអែលសម្រាប់បើកផ្លូវចូលទៅរំដោះចំណាប់ខ្មាំង បានសម្លាប់ប្រជាជនស៊ីវិលប៉ាឡេស្ទីនយ៉ាងហោច ៦៧នាក់ ជាពិសេសមនុស្សស្រីនិងកុមារ ដែលកំពុងលង់លក់ នៅក្នុងបរិវេណវាយប្រហាររបស់អ៊ីស្រាអែល។
សូមបញ្ជាក់ថា បន្ទាប់ពីកម្ទេចស្ទើរទាំងស្រុងភាគខាងជើងហ្កាហ្សា កងទ័ពអ៊ីស្រាអែលកំពុងបែរតម្រង់មកទិសខាងត្បូង ជាពិសេស ទីក្រុងរ៉ាហ្វា ជាប់ព្រំដែនអេហ្ស៊ីប។ ការណ៍នេះធ្វើឲ្យអង្គការសហប្រជាជាតិ និងសូម្បីតែអាមេរិក ដែលជាសម្ព័ន្ធមិត្តរបស់អ៊ីស្រាអែល ទាញសញ្ញាអាសន្នពីគ្រោះមហន្តរាយសម្លាប់ជីវិតមនុស្ស ព្រោះថា រ៉ាហ្វា ជាកន្លែងជ្រកកោនចុងក្រោយរបស់ប្រជាជនប៉ាឡេស្ទីន ដែលកំពុងរស់នៅកកកុញ នៅទីនោះ ក្នុងស្ថានភាពដ៏អត្តខាត់បំផុត។
មានការអំពាវនាវកាន់តែច្រើន ទាមទារឲ្យរដ្ឋាភិបាលអ៊ីស្រាអែលគិតគូរពីអាយុជីវិតរបស់ប្រជាជនប៉ាឡេស្ទីន ដែលកំពុងជាប់គាំងនៅទីក្រុងរ៉ាហ្វា។ នាយករដ្ឋមន្រ្តីអ៊ីស្រាអែលនៅសប្តាហ៍មុន ធ្លាប់បានបញ្ជាឲ្យកងទ័ពអ៊ីស្រាអែលរៀបចំជម្លៀសប្រជាជនប៉ាឡេស្ទីនចេញពីរ៉ាហ្វា ប៉ុន្តែមិនបានបញ្ជាក់ទីកន្លែងថ្មីសម្រាប់ប្រជាជនប៉ាឡេស្ទីននោះទេ។
សង្រ្គាមសងសឹករបស់អ៊ីស្រាអែលទៅលើក្រុមហាម៉ាសនៅទឹកដីហ្កាហ្សា ជាង ៥ខែមកនេះ បានសម្លាប់ប្រជាជនប៉ាឡេស្ទីន ជាង ២៨ ០០០នាក់ ចំណែកសាលារៀន មន្ទីរពេទ្យ ផ្ទះសម្បែងនៅភាគខាងជើងហ្កាហ្សាត្រូវបំផ្លាញខ្ទេចខ្ទីរគ្មានសល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ