ហ៊ូទីយេម៉ែន៖ តើអាមេរិកនិងសម្ព័ន្ធមិត្តអាចសម្រេចគោលដៅនៅយេម៉ែនដែរឬទេ?
កងទ័ពអាមេរិកកាន់តែមមាញឹកនៅដើមបូព៌ា។ បន្ទាប់ពីចេញទៅទម្លាក់គ្រាប់លើទីតាំងរបស់ឆ្មាំបដិវត្តន៍អ៊ីរ៉ង់ និងក្រុមប្រដាប់អាវុធដែលជាគ្នីគ្នារបស់អ៊ីរ៉ង់នៅ ក្នុងទឹកដីស៊ីរី និងអ៊ីរ៉ាក់ កងទ័ពអាមេរិកបានប្រកាសនៅថ្ងៃអាទិត្យទី៤កុម្ភៈនេះថា បានរួមដៃគ្នាជាមួយអង់គ្លេស បើកការវាយប្រហារទៅលើក្រុមហ៊ូទី ដែលជាគ្នីគ្នាមួយទៀតរបស់អ៊ីរ៉ង់នៅយេម៉ែន។ អ៊ីរ៉ង់វិញបានព្រមានថា ការវាយប្រហាររបស់អាមេរិកទាំងនៅអ៊ីរ៉ាក់ ស៊ីរី និងយេម៉ែនជាយុទ្ធសាស្រ្តគិតខុស និងកំពុងរំលោភដែនអធិបតេយ្យភាពរបស់ប្រទេសដទៃ។ ប៉ុន្តែ អ៊ីរ៉ង់មិនទាន់ប្រកាសចាត់វិធានការក្តៅតបតនឹងអាមេរិកនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៦
កងទ័ពអាមេរិកនៅក្នុងតំបន់ដើមបូព៌ារវល់មមាញឹកខ្លាំងនៅចុងសប្តាហ៍នេះ។ បន្ទាប់ពីទម្លាក់គ្រាប់បែកបំផ្លាញទីតាំងយោធាជាច្រើនកន្លែងរបស់ឆ្មាំបដិវត្តន៍អ៊ីរ៉ង់ និងក្រុមប្រដាប់អាវុធដែលគាំទ្រដោយអ៊ីរ៉ង់ នៅក្នុងទឹកដីស៊ីរី និងអ៊ីរ៉ាក់ កងទ័ពអាមេរិកបានត្រលប់មកចាប់ដៃជាមួយកងទ័ពអង់គ្លេសបើកការវាយប្រហាររួមគ្នាលើក្រុមហ៊ូទីវិញម្តងដែលជាគ្នីគ្នា មួយទៀត របស់អ៊ីរ៉ង់ក្នុងទឹកដីយេម៉ែន។
នៅក្នុងសេចក្តីថ្លែងការណ៍ថ្ងៃអាទិត្យទី៤កុម្ភៈ អគ្គបញ្ជាការដ្ឋានកងទ័ពអាមេរិកនៅតំបន់ដើមបូព៌ា Centcom បានប្រកាសថា កងទ័ពអាមេរិក និងអង់គ្លេសដែលមានការគាំទ្រពីសម្ព័ន្ធអន្តរជាតិដើម្បីការពារសមុទ្រក្រហម Prosperity Guardianបានបើកការវាយប្រហារនៅទឹកដីយេម៉ែន ដោយដៅតម្រង់ទីតាំងចំនួន៣៦របស់ក្រុមឧទ្ទាមហ៊ូទី នៅកន្លែងចំនួន១៣ផ្សេងគ្នានៅយេម៉ែន។ បើតាម Centcom ប្រតិបត្តិការយោធានៅយេម៉ែនជាការវាយបកទៅលើក្រុមហ៊ូទីយេម៉ែនដែលនៅតែបន្តធ្វើសកម្មភាពដ៏គ្រោះថ្នាក់ គំរាមកំហែងចរាចរណ៍កប៉ាល់ដឹកទំនិញអន្តរជាតិនៅសមុទ្រក្រហម។
ជាក់ស្តែង កងទ័ពអាមេរិកកម្ទេចបានមីស៊ីលប្រឆាំងកប៉ាល់ចំនួន៦ដើម មុននឹងបាញ់បំផ្លាញទាន់ពេលវេលា មីស៊ីលប្រឆាំងនាវាមួយដើមទៀត ដែលក្រុមឧទ្ទាមហ៊ូទីប្រុងប្រៀបនឹងបាញ់នៅថ្ងៃអាទិត្យនេះ។
ជារួម អគ្គបញ្ជាការកងទ័ពអាមេរិកនៅដើមបូព៌ាអះអាងថា ប្រតិបត្តិការយោធារួមគ្នាជាលើកទី៣របស់អាមេរិក និងអង់គ្លេសលើកនេះសំដៅទីតាំងយោធា១៣កន្លែងរបស់ក្រុមហ៊ូទីយេម៉ែន ដូចជាកន្លែងស្តុកទុកអាវុធក្រោមដីរបស់ពួកហ៊ូទី ដ្រូន ប្រព័ន្ធបាញ់មីស៊ីល និងជើងទ្របាញ់មីស៊ីល និងប្រព័ន្ធការពារដែនអាកាស និងរ៉ាដារបស់ក្រុមហ៊ូទី។
សម្រាប់រដ្ឋមន្រ្តីការពារជាតិអាមេរិក លោកLloyd Austin ការវាយប្រហារនៅក្នុងទឹកដីយេម៉ែនមានគោលដៅធំគឺ រំខាន បំបាក់កម្លាំង សមត្ថភាពយោធារបស់ក្រុមហ៊ូទី ដើម្បីកុំឲ្យក្រុមនេះមានសមត្ថភាពគំរាមកំហែងសន្តិសុខនៅសមុទ្រក្រហមតទៅទៀត។
ក្រុមហ៊ូទីដែលឈ្នះសង្រ្គាមចូលកាន់កាប់ទឹកដីមួយភាគធំនៅយេម៉ែនបានប្រតិកម្មថា ខ្លួននឹងមិននៅស្ងៀម ប៉ុន្តែ នឹងវាយបកវិញ នៅក្រោយការវាយប្រហាររបស់អាមេរិក។ អ្នកនាំពាក្យរបស់ក្រុមហ៊ូទីយេម៉ែនបានព្រមានដែរ គេមានជម្រើសពីរ ឬមួយសន្តិភាពសម្រាប់ក្រុមហ៊ូទីនៅយេម៉ែន សម្រាប់ប្រជាជនប៉ាឡេស្ទីននៅហ្កាហ្សា ឬគ្មានសន្តិភាពទាល់តែសោះ គ្មានសន្តិសុខសម្រាប់អាមេរិកនៅក្នុងតំបន់ដើមបូព៌ា។ អ៊ីរ៉ង់វិញ តាមរយៈអ្នកនាំពាក្យរបស់ក្រសួងការបរទេសបានថ្កោលទោសចាត់ទុកការវាយប្រហាររបស់អាមេរិកនិងអង់គ្លេសថា ជាការរំលោភម្តងហើយ ម្តងទៀត ដែនអធិបតេយ្យភាព និងបូរណភាពទឹកដីយេម៉ែន ព្រមទាំងច្បាប់អន្តរជាតិ។ សម្រាប់អ៊ីរ៉ង់ ដោយវាយប្រហារនៅក្នុងទឹកដីអ៊ីរ៉ាក់ ស៊ីរី និងយេម៉ែន អាមេរិកកំពុងធ្វើផ្ទុយនឹងការអះអាងរបស់ខ្លួនដែលថា គ្មានគោលបំណងចង់បង្កជម្លោះ បញ្ឆេះភ្លើងសង្រ្គាមនៅក្នុងតំបន់។ តាមភាគីអ៊ីរ៉ង់អាមេរិកបានរំលោភច្បាប់អន្តរជាតិដើម្បីសម្រេចគោលដៅរបស់ខ្លួន។ ប៉ុន្តែ អ៊ីរ៉ង់បានព្រមានហើយថា អាមេរិកមិនអាចសម្រេចគោលដៅរបស់ខ្លួនបានទេ។ ជាក់ស្តែង ការវាយប្រហារពីអាមេរិក និងអង់គ្លេស មិនបានធ្វើឲ្យក្រុមឧទ្ទាមហ៊ូទីចុះញ៉ម។ ផ្ទុយទៅវិញក្រុមនេះរឹតតែប្តេជ្ញាចិត្ត មិនបន្ថយដៃវាយប្រហារនៅសមុទ្រក្រហម។
នៅក្រោយអង់គ្លេសចូលរួមជាមួយអាមេរិកវាយប្រហារលើក្រុមហ៊ូទី នៅយេម៉ែន រដ្ឋមន្រ្តីការបរទេសអង់គ្លេសវិញ បានទាមទារឲ្យអ៊ីរ៉ង់ទទួលខុសព្រោះថា អស្ថិរភាពនៅសមុទ្រក្រហមបង្កឡើងដោយក្រុមប្រដាប់អាវុធដែលអ៊ីរ៉ង់បានបង្កើត ជួយឧបត្ថម្ភទាំងថវិកា និងសព្វាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ