អាមេរិកចាប់ខ្លួនជនសង្ស័យពីររូប ដែលជាប់ពាក់ព័ន្ធនឹងការបង្កើតប៉ុស្តិ៍ប៉ូលិសចិនខុសច្បាប់ នៅញូវយ៉ក
ចុះផ្សាយនៅថ្ងៃ៖
អាមេរិកដំឡើងសំឡេងប្រឆាំងបេសកកម្មលួចលាក់របស់ចិន នៅទឹកដីបរទេស។ នៅទីក្រុងញូវយ៉ក រដ្ឋអាជ្ញាអាមេរិកកាលពីថ្ងៃចន្ទម្សិលមិញ បានសម្រេចចោទប្រកាន់មន្រ្តីសន្តិសុខចិន ដែលនៅក្នុងនោះ មានជនជាតិចិនពីរនាក់ទើបត្រូវប៉ូលិសFBI ចាប់ខ្លួន និងចោទប្រកាន់ពីបទជាប់ពាក់ព័ន្ធនឹងសំណុំរឿង ចិនបើកប៉ុស្តិ៍ប៉ូលិសលួចលាក់ នៅទីក្រុងញូវយ៉ក។ នៅក្នុងសន្និសីទកាសែត កាលពីថ្ងៃចន្ទ រដ្ឋអាជ្ញាក្រុងញូវយ៉កនៅបានប្រកាសចោទប្រកាន់មន្រ្តីក្រសួងសន្តិសុខចិនចំនួន៣៤រូប ពីបទធ្វើសកម្មភាពនៅលើបណ្តាញអ៊ីនធ័រនែត ដើម្បីគំរាមកំហែងអ្នកប្រឆាំងចិន ដែលរស់នៅទឹកដីបរទេស។ ចិនបង្កើតស្ថានីយ៍ប៉ូលិសសម្ងាត់នៅទឹកដីបរទេស។
នៅក្នុងសន្និសីទកាសែតកាលពីថ្ងៃចន្ទទី១៧ មេសា រដ្ឋអាជ្ញាក្រុងញូវយ៉កបានប្រកាសចាប់ខ្លួនជនជាតិចិន ២រូប ដែលជាប់ពាក់ព័ន្ធនឹងការបង្កើតស្ថានីយ៍ប៉ូលិសសម្ងាត់របស់ចិន នៅទឹកដីអាមេរិក។ ជនសង្ស័យចិន សញ្ជាតិអាមេរិក ទាំងពីររូបដែលប៉ូលិសFBI បានចូលចាប់ខ្លួន ដល់ក្នុងផ្ទះ នៅទីក្រុងញូវយ៉ក កាលពីថ្ងៃចន្ទម្សិលមិញ មានឈ្មោះថា Lu Jianwang និងChen Jinping។ តាមរដ្ឋអាជ្ញាក្រុងញូវយ៉ក ពួកគេទាំងពីរនាក់បានរួមគ្នាបង្កើតដោយលួចលាក់ ប៉ុស្តិ៍ប៉ូលិសចិនដំបូងគេ នៅទឹកដីអាមេរិក ដើម្បីបម្រើប្រយោជន៍ឲ្យក្រសួងសន្តិសុខសាធារណៈចិន។ មុនការចាប់ខ្លួន ប៉ូលិស FBIធ្លាប់បានដាក់ឈ្មោះជនសង្ស័យ ទៅក្នុងបញ្ជីតាមដាន នៅក្រោយ FBIចុះ ទៅបិទប៉ុស្តិ៍ប៉ូលិសលួចលាក់របស់ចិន នៅញូវយ៉ក កាលពីខែ តុលាឆ្នាំមុន។ ប៉ុស្តិ៍ប៉ូលិសលួចលាក់របស់ចិន ស្ថិតនៅក្នុងអគារពាណិជ្ជកម្មមួយ ក្នុងសង្កាត់Chinatown នៅManhatan។ ជាទូទៅ គេស្គាល់វាថា ជាកន្លែងសម្រាប់ផ្តល់សេវារដ្ឋបាល ដល់សហគមន៍ជនជាតិចិន រស់នៅទឹកដីអាមេរិក ដូចជាការពន្យារប័ណ្ណបើកបរជាដើម។ ប៉ុន្តែ តាមរដ្ឋអាជ្ញាក្រុងញូវយ៉ក ជនសង្ស័យទាំងពីររូបខាងលើដែលបានទទួលបទបញ្ជាពីអាជ្ញាធរចិន បានប្រើទីតាំងសម្រាប់តាមដានលួចយកការណ៍សម្ងាត់ ពីប្រជាជនចិន ដែលរស់នៅទឹកដីអាមេរិក និងដាក់សម្ពាធ គំរាមកំហែង អ្នកប្រឆាំងរដ្ឋអំណាចចិន។ រដ្ឋអាជ្ញាញូវយ៉ក លោកBreon Peace បានលើកយកករណីមួយមកបង្ហាញ ដែលនៅក្នុងនោះ ប៉ូលិសចិនបាននិយាយប្រាប់ជនសង្ស័យម្នាក់ ដែលជាជនជាតិអាមេរិកាំង ឲ្យតាមដាន កំណត់ទីតាំងរបស់អ្នកប្រឆាំងចិន ដែលជាសកម្មជនដើម្បីលទ្ធិប្រជាធិបតេយ្យម្នាក់រស់នៅរដ្ឋកាលីហ្វ័នីញ៉ា។
តាមការប្រកាសរបស់រដ្ឋអាជ្ញាញូវយ៉ក ជនសង្ស័យទាំងពីរត្រូវចាប់ខ្លួន និងរងបទចោទប្រកាន់ថា បានធ្វើសកម្មភាព ក្នុងនាមជាភ្នាក់ងារស៊ើបការណ៍សម្ងាត់របស់ចិន និងប៉ុនប៉ងរារាំងការងាររបស់តុលាការអាមេរិក តាមរយៈការបំផ្លាញភស្តុតាង។
ចិនមានប៉ុស្តិ៍ប៉ូលិសខុសច្បាប់ចំនួន ៥៤កន្លែង នៅប្រទេសចំនួន ៣០ក្នុងពិភពលោក
របាយការណ៍របស់អង្គការអេស្ប៉ាញ ឈ្មោះ Safeguard Defenders ចុះផ្សាយ កាលពីខែកញ្ញាឆ្នាំមុន ចិនបានបង្កើតប៉ុស្តប៉ូលិសលួចលាក់ ជាច្រើនកន្លែង នៅទឹកដីបរទេស នៅក្នុងពិភពលោក។
ប្រតិបត្តិការចាប់ខ្លួនជនជាតិចិន ដែលជាប់ពាក់ព័ន្ធនឹងការបង្កើតប៉ុស្តិ៍ប៉ូលិសលួចលាក់នៅញូវយ៉ក ជាលទ្ធផលនៃការស៊ើបអង្កេតរបស់ប៉ូលិស FBI នៅក្រោយការចុះផ្សាយរបាយការណ៍របស់អង្គការក្រៅរដ្ឋាភិបាលSafeguard Defender។
តាមរបាយការណ៍ ចិនមានបង្កើតស្ថានីយ៍ប៉ូលិស លួចលាក់ ប្រមាណ ៥៤កន្លែង នៅក្នុងប្រទេស៣០ នៅក្នុងទ្វីបទាំង ៥ ក្នុងពិភពលោក។ ជាទូទៅ ចិនបានប្រើប្រាស់ជនជាតិរបស់ខ្លួន ដែលមានសញ្ជាតិ បរទេស រស់នៅធ្វើការបរទេស ដើម្បីបង្កើតស្ថានីយ៍ប៉ូលិសសម្ងាត់របស់ខ្លួន នៅទឹកដីបរទេស។ តាមរបាយការណ៍ដែរ នៅទឹកដីអឺរ៉ុប ចិនមានប៉ុស្តិ៍ប៉ូលិសលួចលាក់ច្រើនជាងគេដូចជា នៅអេស្ប៉ាញ មាន៩កន្លែង ៣កន្លែងនៅទីក្រុងប៉ារីស ប្រទេសបារាំង។ សូម្បីទីក្រុងតូចមួយ របស់អ៊ីតាលី ឈ្មោះ Prato en Toscane ក៏មានប៉ុស្តិ៍ប៉ូលិសលួចលាក់ នេះដែរ ព្រោះវាមានប្រជាជនចិនរស់នៅធ្វើការច្រើនជាងគេនៅក្នុងវិស័យវាយនភណ្ឌ។ នៅហូឡង់ អាជ្ញាធរបានបញ្ជាឲ្យគេបិទទីតាំងពីរកន្លែង ដែលគេជឿថា ជាប៉ុស្តិ៍ប៉ូលិស ដែលចិនបង្កើតដោយលួចលាក់សម្រាប់តាមដានសហគមន៍ជនជាតិចិននៅហូឡង់។
ជាទូទៅ ប៉ុស្តិ៍ប៉ូលិសដែលចិនបង្កើតដោយលួចលាក់ នៅទឹកដីបរទេស ភាគច្រើន មានរូបរាង ជាភោជនីយដ្ឋាន ហាងទំនិញ ឬអគារស្នាក់នៅសាមញ្ញធម្មតាដែលគ្មានអ្នកណាចាប់អារម្មណ៍ថា ជាទីតាំងផ្កាយរណបលួចយកការណ៍សម្ងាត់ឲ្យប៉ូលិសចិន នោះទេ។
ប៉េកាំងថា ខ្លួនបង្កើតមជ្ឈមណ្ឌលផ្តល់សេវាសម្រាប់ប្រជាជនចិន រស់នៅទឹកដីបរទេស
នៅក្រោយការចុះផ្សាយរបាយការណ៍របស់អង្គការអេស្ប៉ាញ ចិនផ្ទាល់ បានទាត់ចោលការចោទប្រកាន់ ដែលថា ចិនបង្កើតប៉ុស្តប៉ូលិសខុសច្បាប់ នៅទឹកដីបរទេស។ ផ្ទុយទៅវិញ ចិនបដិសេធថា គ្មានបង្កើតប៉ុស្តិ៍ប៉ូលិសសម្ងាត់ ដើម្បីតាមដានពលរដ្ឋរបស់ខ្លួននៅទឹកដីបរទេស។ ប៉ុន្តែ ជាផ្លូវការ ប៉េកាំងទទួលស្គាល់ថា ខ្លួនមានបង្កើតមជ្ឈមណ្ឌលសម្រាប់ផ្តល់សេវារដ្ឋបាលដល់ប្រជាជនចិន ដែលរស់នៅបរទេស។ តាមអ្នកនាំពាក្យរបស់ក្រសួងការបរទេសចិន មជ្ឈមណ្ឌលផ្តល់សេវាខាងលើ ត្រូវបានបង្កើតឡើងក្នុងអំឡុងសម័យកូវីដ ក្នុងគោលដៅ ផ្តល់ព័ត៌មាន ដល់ប្រជាជនចិន រស់នៅបរទេស ដែលជួបការលំបាកក្នុងទទួលឯកសារសម្រាប់ធ្វើដំណើរចូលប្រទេស ឬរឿងរដ្ឋបាលផ្សេងទៀត ទាក់ទងនឹងការពន្យាប័ណ្ណបើកបរជាដើម។
តាមរបាយការណ៍របស់អង្គការ Safeguard Defenders គំនិតបង្កើតប៉ុស្តិ៍ប៉ូលិសនៅទឹកដីបរទេស កើតចេញមកពីអាជ្ញាធររបស់ខេត្តពីរនៅប្រទេសចិន ដែលមានគោលដៅ តាមចាប់ ជនជាតិចិន ដែលបានប្រព្រឹត្តបទល្មើស បទឧក្រិដ្ឋ ដូចជារឿងគេចពន្ធ ប្រព្រឹត្តអំពើពុករលួយ ប៉ុន្តែបានគេចខ្លួនទៅរស់នៅបរទេស។ តាមរបាយការណ៍ ចន្លោះឆ្នាំ ២០២១ ដល់ឆ្នាំ ២០២២ ប៉ុស្តិប៉ូលិសសម្ងាត់របស់ចិន បានជួយឲ្យគេបញ្ចុះបញ្ចូលជនជាតិចិនជាង ២សែននាក់ ឲ្យត្រលប់ទៅទទួលកំហុសនៅប្រទេសចិន។ ប៉ុន្តែ សម្រាប់សកម្មជនប្រឆាំងចិន ចិនបង្កើតប៉ុស្តិ៍ប៉ូលិសលួចលាក់ ដើម្បីតាមដាន កំណត់អត្តសញ្ញាណរបស់អ្នកប្រឆាំងនៅទឹកដីបរទេស ហើយគោលដៅចុងបញ្ចប់ ធ្វើយ៉ាងណាដាក់សម្ពាធឲ្យពួកគេត្រលប់ទៅប្រទេសចិន។ អង្គការ Safeguard Defenders យល់ឃើញដូចសកម្មជនប្រឆាំងរបស់ចិនដោយថា ប៉េកាំងពិតជាបានប្រើប្រាស់ប៉ុស្តិ៍ប៉ូលិសលួចលាក់នេះ សម្រាប់តាមដានឃ្លាំមើល និងដាក់សម្ពាធលើពលរដ្ឋចិនរស់នៅ ទឹកដីបរទេសផង និងដើម្បីសំឡុតក្រុមប្រឆាំងចិនរស់នៅបរទេស។ ជាក់ស្តែង នៅបារាំង ចិនមានបង្កើតប៉ុស្តិ៍ប៉ូលិសខុសច្បាប់ និងដោយកំបាំងមុខ បីកន្លែង ក្នុងគោលដៅ ចាប់បង្ខំ ឲ្យជនជាតិចិនវិលត្រលប់ទៅស្រុកវិញ តាមបញ្ជារបស់ភ្នាក់ងារដែលធ្វើការនៅទីស្នាក់ការមួយនៅជាយក្រុងប៉ារីស។
ហេតុអ្វីអាមេរិកទើបមកចាត់វិធានការប្រឆាំងប៉ុស្តិ៍ប៉ូលិសចិននៅទឹកដីបរទេស នៅពេលនេះ?
រដ្ឋាភិបាលរបស់ប្រទេសពាក់ព័ន្ធដូចជាសហរដ្ឋអាមេរិក បានដឹងពីររឿងចិនបង្កើតប៉ុស្តិ៍ប៉ូលិសលួចលាក់នៅទឹកដីបរទេស ជាពិសេស នៅក្រោយចេញរបាយការណ៍Safeguard Defender។ ប៉ុន្តែគេឆ្ងល់ថា ហេតុអ្វីទើបមានវិធានការប្រឆាំងចិននៅពេលនេះ។ សម្រាប់អ្នកជំនាញ គេមិនបានចាត់វិធានការអ្វីខ្លាំង ព្រោះដើម្បីកុំឲ្យខាតបង់ប្រយោជន៍ទំនាក់ទំនងជាមួយចិន។ ប៉ុស្តិប៉ូលិសចិននៅទឹកដីបរទេស សំដៅ ដល់ជនជាតិចិននៅបរទេស ប៉ុន្តែវាសំដៅ ប៉ះពាល់សន្តិសុខ របស់ប្រទេសម្ចាស់ផ្ទះ ដូចជាករណីហូឡង់ ឬបារាំងនោះទេ។ អីចឹង បានជាគេនៅបន្តបិទភ្នែក មិនរករឿង ចិន បើទោះបីជាការបង្កើតប៉ុស្តិ៍ចិន នៅទឹកដីបរទេស ជារឿងខុសច្បាប់ក៏ដោយ។ ក្នុងករណីអាមេរិកផ្ទាល់ អាមេរិកទើបតែ ចាត់វិធានការ ចោទប្រកាន់ពេលនេះ គឺអាចទាក់ទងនឹងរឿងនយោបាយភាគច្រើន។ រឿងនេះវាកើតឡើងនៅក្នុងពេលអាមេរិក និងចិនកំពុងតានតឹងនឹងគ្នាកាន់តែខ្លាំង ជាពិសេសក្នុងសំណុំរឿងកោះតៃវ៉ាន់។ ថ្មីៗនេះទៀត អាមេរិកបានបាញ់ទម្លាក់ប៉ាឡុងចារកម្មរបស់ចិន ដែលអាមេរិកចោទថា ត្រូវចិនបង្ហោះឲ្យព័ត៌មានសម្ងាត់ស្តីពីទីតាំងយោធាយុទ្ធសាស្រ្តនៅក្នុងទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ