មន្រ្តីយោធារបស់សម្ព័ន្ធអន្តរជាតិ ប្រយុទ្ធប្រឆាំងនឹងក្រុមជីហាត ជួបប្រជុំគ្នា នៅវ៉ាស៊ីនតោន
ចុះផ្សាយនៅថ្ងៃ៖
ស្តាប់ - ០៧:៣៧
ការវាយប្រហារទ័ពអាកាសរបស់សម្ព័ន្ធអន្តរជាតិ ទៅលើក្រុមជីហាត នៅស៊ីរី និងអ៊ីរ៉ាក់ហាក់គ្មានប្រសិទ្ធិភាព ដើម្បីកាត់បន្ថយកម្លាំងរបស់ក្រុមជីហាតដែលចេះតែរុលទៅមុខឥតឈប់។ នៅអ៊ីរ៉ាក់ ក្រុមជីហាតកំពុងខិតទៅជិតក្រុងបាកដាដ ចំណែក កាលពីថ្ងៃចន្ទ ទី ១៣តុលា គឺ នៅមួយសប្តាហ៍ក្រោយបើកសមរភូមិប្រយុទ្ធលើទីក្រុងកូបាណេ ក្នុងទឹកដីស៊ីរី ក្រុមជីហាតនៃអង្គការរដ្ឋអ៊ីស្លាមបានវាយចូលដល់បេះដូងរបស់ទីក្រុងនេះ។ នៅចំពោះមុខនៃការរុលទៅមុខរបស់ក្រុមជីហាត នៅក្រុងកូបាណេ នៅថ្ងៃអង្គារទី ១៤ តុលា នៅទីក្រុងវ៉ាស៊ីនតោន មន្រ្តីយោធារបស់ប្រទេសសម្ព័ន្ធមិត្តទាំង២២ត្រូវជួបប្រជុំគ្នា ក្រោមអធិបតីភាពរបស់លោកប្រធានាធិបតីអាមេរិក បារ៉ាក់ អូបាម៉ា ដើម្បីរិះរកយុទ្ធសាស្រ្ត ប្រយុទ្ធប្រឆាំងនឹងក្រុមជីហាត។
មន្រ្តីយោធារបស់ប្រទេសទាំង២២ ដែលនៅក្នុងនោះមានអាមេរិក បារាំង អង់គ្លេស អូស្ត្រាលី កាណាដា និងបណ្តាប្រទេសអារ៉ាប់ រួមទាំងតួកគីផងត្រូវដឹកនាំប្រជុំដោយនាយសេនាធិការអាមេរិក លោកMartin Dempsey។ តាមវិមានប្រធានាធិបតី លោកបារ៉ាក់ អូបាម៉ានឹងចូលរួមធ្វើជាគណៈអធិបតីនៃកិច្ចប្រជុំនៅថ្ងៃនេះដែរ។ នៅមួយថ្ងៃមុនបើកការប្រជុំ អ្នកនាំពាក្យរបស់លោកសេនាធិការអាមេរិកបានបញ្ជាក់ហើយថា គេមិនត្រូវរង់ចាំលទ្ធផលអ្វីធំដុំ ចេញពីជំនួបប្រជុំរបស់មន្រ្តីយោធារបស់ប្រទេសសម្ព័ន្ធអន្តរជាតិទេ។
តាមវីរសេនីយឯក Ed Thomas ដែលជាអ្នកនាំពាក្យរបស់លោកនាយសេនាធិការអាមេរិក Martin Dempsey នៅក្នុងកិច្ចប្រជុំនៅថ្ងៃនេះ គេគ្រាន់តែលើក ពិភាក្សា ពីគម្រោងដែលគេបានធ្វើកន្លងមក ពីការលំបាក និងវិធានការដែលគេត្រូវធ្វើទៅថ្ងៃមុខតែប៉ុណ្ណោះ គឺគ្មានការប្រកាសអ្វីថ្មីប្លែកពីយុទ្ធសាស្រ្តកន្លងមកទេ។ ភាគីអាមេរិកអាចនិយាយទុកមុន ឲ្យហើយ គឺបិទផ្លូវកុំឲ្យគេសង្ឃឹមថា អាមេរិកនឹងប្តូរជំហរ ត្រលប់មកបញ្ជូនទ័ពជើងគោកទៅទឹកដីអ៊ីរ៉ាក់ជាថ្មីនោះ។ ត្រូវដឹងថា នៅប៉ុន្មានថ្ងៃមកនេះ ដោយសារចាញ់ដៃប្រយុទ្ធក្រុមជីហាតកាន់តែខ្លាំង ទាហានអ៊ីរ៉ាក់ និងក្រុមជាតិពិន្ធុរអ៊ីរ៉ាក់បានព្រមានបោះចោលអាវុធ បើសិនអាមេរិកមិនបញ្ជូនទ័ពជើងគោកទៅប្រយុទ្ធនឹងក្រុមជីហាតនៅអ៊ីរ៉ាក់។
អ្នកនាំពាក្យរបស់ក្រុមប្រឹក្សាសន្តិសុខជាតិវិញបានបញ្ជាក់ផងដែរថា កិច្ចប្រជុំនៅថ្ងៃនេះ គឺធ្វើឡើងនៅក្នុងក្របខ័ណ្ឌនៃកិច្ចប្រឹងប្រែងកន្លងមក របស់អាមេរិកដែលចង់កសាងកម្លំាងសម្ព័ន្ធមិត្តឲ្យរឹងមាំមួយ។ នៅក្នុងកិច្ចប្រជុំនៅថ្ងៃនេះ គេត្រូវពិភាក្សារកយុទ្ធសាស្រ្តថ្មី ពោលគឺការបើកទូលាយ ឲ្យមានការចូលរួមរបស់ប្រទេសនីមួយៗ ដើម្បីប្រយុទ្ធប្រឆាំងនឹងក្រុមជីហាត។ តួកគីដែលចូលរួមនៅក្នុងកិច្ចប្រជុំនៅថ្ងៃនេះ ត្រូវបានគេផ្តោតសំឡឹង និងចាត់ទុកជាអ្នកដើរតួយ៉ាងសំខាន់ ដើម្បីទប់ស្កាត់កុំឲ្យក្រុមជីហាតពង្រីកដែនឥទ្ធិពល នៅស៊ីរី និងនៅអ៊ីរ៉ាក់។
តាំងពីថ្ងៃ ម្សិលមិញ តួកគី និងអាមេរិកបាននិយាយមិនដូចគ្នា ពីការចូលរួមរបស់តួកគី នៅក្នុងសម្ព័ន្ធអន្តរជាតិ។ ទីក្រុងអង់ការ៉ាបានទាត់ចោលព័ត៌មាន ដែលផ្តល់ដោយ ទីប្រឹក្សា សន្តិសុខជាតិអាមេរិកដែលថា តួកគីបានយល់ព្រមឲ្យអាមេរិកប្រើប្រាស់មូលដ្ឋានទ័ពនៅភាគខាងត្បូងតួកគី។រដ្ឋាភិបាលទីក្រុងអង់ការ៉ាបានបញ្ជាក់ថា ខ្លួនមិនទាន់បានព្រមព្រៀងអ្វីជាផ្លូវការលើគម្រោងនេះជាមួយអាមេរិកទេ។ អង់ការ៉ានៅតែបញ្ជាក់ជំហរពីមុនរបស់ខ្លួនថា ខ្លួនយល់ព្រមចូលក្នុងសម្ព័ន្ធអន្តរជាតិ ប្រយុទ្ធប្រឆាំងនឹងក្រុមជីហាតដោយស្ម័គ្រចិត្តជួយបង្វឹកហាត់ក្រុមប្រឆាំងស៊ីរីសេរីក្នុងទឹកដីតួកគី។ លើសពីនោះ តួកគីអាចផ្តល់មូលដ្ឋានទ័ពIncirlik ឲ្យអាមេរិកប្រើប្រាស់ ប៉ុន្តែ ត្រូវមានលក្ខខ័ណ្ឌ។ នោះគឺសម្ព័ន្ធអន្តរជាតិត្រូវយល់ព្រមបង្កើតតំបន់ពិសេស នៅជាប់ព្រំដែនតួកគី និងស៊ីរី និងតំបន់ហាមឃាត់ការហោះហើរពីលើតំបន់ពិសេស ទៅតាមការទាមទាររបស់តួកគី។
ការបង្កើតតំបន់ពិសេសនៅជាប់ព្រំដែនតួកគី និងស៊ីរី គឺជាទិសដៅចំបង ដែលតួកគីទាមទារចង់បាន តាំងពីពេលដែលសង្រ្គាមស៊ីវិលបានផ្ទុះនៅប្រទេសស៊ីរី នៅដើមឆ្នាំ ២០១២។ គេមើលឃើញ មានមូលហេតុ សំខាន់ធំ បី ដែលធ្វើឲ្យតួកគីនៅតែក្រាញចង់ឲ្យគេបង្កើតតំបន់ពិសេស។ ទីមួយ តាមរយៈការបង្កើតតំបន់ពិសេស តួកគីចង់បញ្ជូនជនភៀសខ្លួនស៊ីរី ឲ្យត្រលប់ទៅទឹកដីស៊ីរីវិញ គឺតួកគី ចង់បោសដៃ លែងទទួលយកជនភៀសខ្លួនស៊ីរី ឬគួដស៊ីរី ឲ្យមកចូលក្នុងទឹកដីរបស់ខ្លួន។ ត្រូវដឹងថា ជនភៀសខ្លួនស៊ីរីបានក្លាយជាបន្ទុកចំណាយ និងកង្វល់សន្តិសុខយ៉ាងសម្បើមសម្រាប់រដ្ឋាភិបាលតួកគី។
មូលហេតុទីពីរ ដែលធ្វើឲ្យតួកគីទាមទារឲ្យគេបង្កើតតំបន់ពិសេសសម្រាប់ការបណ្តុះបណ្តាលក្រុមប្រឆាំងស៊ីរី នោះ គឺព្រោះ តួកគីយល់ថា បើតួកគីចូលរួមបណ្តុះបណ្តាល និងផ្តល់អាវុធឲ្យក្រុមប្រឆាំងស៊ីរី គឺក្រុមនេះនឹងក្លាយជាមិត្តម្នាក់ដែលដឹងគុណតួកគី និងជាអ្នកប្រយុទ្ធជំនួសតួកគី ដើម្បីផ្តួលរំលំរបបស៊ីរី របស់លោកបាស្ហា អាល់អាសាដ។
មូលហេតុទីបីដែលសំខាន់ចំបងរបស់តួកគី គឺរដ្ឋាភិបាលតួកគីចង់លើកតម្កើង ផ្តល់សារៈសំខាន់ផ្តាច់មុខដល់ក្រុមប្រឆាំងស៊ីរី។ ពោលគឺធ្វើយ៉ាងម៉េច ឲ្យសម្ព័ន្ធអន្តរជាតិ បំភ្លេច មិនឲ្យតម្លៃ ឬ មិនផ្តល់តួនាទីណាមួយ ដល់ក្រុមជនជាតិគួកស៊ីរី ដែលពេលនេះកំពុងប្រយុទ្ធទប់ទល់នឹងក្រុមជីហាតនៅទីក្រុងកូបាណេ។ បើសិនជាសម្ព័ន្ធអន្តរជាតិមិនបង្កើតតំបន់ពិសេស សម្រាប់តែក្រុមប្រឆាំងស៊ីរីទេ នោះកម្លាំងប្រយុទ្ធប្រឆាំងនឹងជីហាត ឬរដ្ឋាភិបាលស៊ីរី នឹងអាចមានច្រើនក្រុម ដែលក្នុងនោះ ក៏មានក្រុមគួក ដែលតួកគីខ្លាចថា នឹងអាចឡើងដៃខ្លាំង ដោយសារក្រុមនេះដែលកំពុងដើរតួ ចូលរួមប្រយុទ្ធប្រឆាំងនឹងក្រុមជីហាត នឹងអាចទទួលជំនួយពីសម្ព័ន្ធអន្តរជាតិ។ ទីក្រុងអង់ការ៉ាមិនចង់ឲ្យក្រុមគួកជាពិសេសចលនាគួកតួកគីឡើងដៃខ្លាំងទេ ក្រុមនេះអង់ការ៉ានៅតែចាត់ទុកក្រុមនេះជាភេរវជន គំរាមកំហែងសន្តិសុខរបស់ខ្លួន។
អាមេរិកវិញ បានបដិសេធមិនទទួលសំណើបង្កើតតំបន់ពិសេសរបស់តួកគី ដោយមូលហេតុការចំណាយថវិកាដ៏ច្រើន និងភាពស្មុគស្មាញ ដើម្បីបង្កើតតំបន់ពិសេសទៅតាមការទាមទាររបស់តួកគី។ សម្រាប់អាមេរិក តំបន់ពិសេសដែលស្នើដោយតួកគី មិនមែនជាទិសដៅអាទិភាព។ អ្វីដែលអាមេរិក និងសម្ព័ន្ធអន្តរជាតិ ចង់បានបំផុតពេលនេះ គឺការចូលរួមរបស់អង់ការ៉ា ដើម្បីប្រយុទ្ធបំផ្លាញក្រុមជីហាតនៃអង្គការរដ្ឋអ៊ីស្លាម។
បើនិយាយពីភាពស្មុគស្មាញ ដែលអាមេរិកទំនងចង់និយាយដល់ គឺជំហរប្រឆាំងរបស់រុស្ស៊ី។ តាមរុស្ស៊ី ការបង្កើតឲ្យមានតំបន់ពិសេសអ្វីមួយ ឬតំបន់ហាមឃាត់ការហោះហើរទាំងឡាយ ត្រូវតែឆ្លងកាត់ ការបោះឆ្នោតពីក្រុមប្រឹក្សាសន្តិសុខ អង្គការសហប្រជាជាតិ។ តំបន់ពិសេស ដែលតួកគីចង់បាន គឺជា ដ៏គ្រោះថ្នាក់ គំរាមកំហែងមួយដល់រដ្ឋាភិបាលស៊ីរី ដែលជាសម្ព័ន្ធមិត្តរបស់រុស្ស៊ី។ ដូច្នេះ គំនិតបង្កើតតំបន់ពិសេសរបស់តួកគី នៅតាមព្រំដែនជាមួយស៊ីរី នឹងមិនអាចធ្វើទៅបានទេ ព្រោះថា រុស្ស៊ី ប្រាកដជាលើកដៃធ្វើវេតូ ប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ