មេប៉ូលិសចិនក្រុងTianjin ស្ថិតក្រោមការស៊ើបអង្កេតពីបទពុករលួយ
ថ្ងៃអាទិត្យម្សិលមិញ គណបក្សកុម្មុយនិស្តចិនបានប្រកាសតាមវេបសៃត៍ អ៊ីនថឺនេត ដាក់មេប៉ូលិសដ៏ធំមួយរូប នៅក្រុងជានជីង Tianjin ភាគឥសានប្រទេស អោយស្ថិតក្រោមការស៊ើបអង្កេតពីបទពុករលួយ។ បក្សកុម្មុយនិស្តចិនក៏គ្រោងពង្រឹងការអប់រំមន្ត្រីជាន់ខ្ពស់ ពីមនោគមន៍វិជ្ជាកុម្មុយនិស្តផងដែរ ដើម្បីចៀសវាងកុំអោយពួកគេផ្អៀងទៅរកមនោគមន៍វិជ្ជាប្រទេសលោកខាងលិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
Wu Changshun វូ ចាំងស្ហ៊ុន អាយុ ៦០ឆ្នាំ ជាប្រធានការិយាល័យសន្តិសុខសាធារណៈ នៅក្រុងកំពង់ផែ Tianjin ភាគឥសានប្រទេសចិន និងធ្លាប់ជាអនុប្រធានទទួលបន្ទុកសន្និសីទបក្សកុម្មុយនិស្តក្រុង Tianjin ផងដែរ។ លោក Wu កំពុងស្ថិតក្រោមការស៊ើបអង្កេតពីបទពុករលួយ។ បក្សកុម្មុយនិស្តចោទគាត់ពីបទរំលោភបំពានធ្ងន់ធ្ងរលើវិន័យបក្ស។
មុនលោក Wu ក៏ធ្លាប់មានមេប៉ូលិសជាន់ខ្ពស់ផ្សេងទៀត នៅក្រុងកំពង់ផែ Tianjin ដែលជាប់ទោសផ្លូវច្បាប់ ពីបទពុករលួយផងដែរ។ គឺមាន លោក Song Pingshun ស៊ុង ភីងស្ហ៊ុន ជាមេប៉ូលិស ក្រុង Tianjin ដែលបានធ្វើអត្តឃាតសម្លាប់ខ្លួន កាលពីឆ្នាំ២០០៧ ក្រោយតុលាការដាក់ទោស។ លោក Song ធ្លាប់ប្រើតួនាទីលោក ជួយអោយស្រីកំណាន់ចិត្តលោកច្រើនរូប បានទទួលប្រយោជន៍លុយកាក់។ ហើយម្នាក់ទៀត គឺលោក Li Baojin លី ប៉ៅជីន ជាមេប៉ូលិសរងក្រុង ជាប់ទោសប្រហារជីវិត និងបន្ថយមកនៅត្រឹមទោសជាប់គុកមួយជីវិតវិញ ដោយសារស៊ីសំណូក និងបន្លំថវិកាជាតិ។ សប្តាហ៍មុននេះ បក្សកុម្មុយនិស្តទើបតែបានដាក់ទោសមេដឹកនាំខ្លួនម្នាក់ នៅម៉ុងហ្គោលី អោយជាប់គុកមួយជីវិត ជាប់ចោទពីបទស៊ីសំណូក។
តាំងពីលោកស៊ី ជីនពីង ឡើងកាន់រដ្ឋាភិបាល នៅចុងឆ្នាំ២០១២មក មានអ្នកទទួល ខុសត្រូវជាន់ខ្ពស់យ៉ាងហោច៤០នាក់ មានឋានៈស្មើរឺលើសពីមុខងារជាអនុរដ្ឋមន្ត្រី ត្រូវបានធ្លាក់ខ្លួនក្នុងការស៊ើបអង្កេតពីបទពុករលួយ រឺធ្លាក់ពីតំណែង ដោយសារអំពើពុករលួយ។ គួររំលឹកដែរថា ប៉ូលិសផ្ទៃក្នុងបក្សកុម្មុយនិស្តចិន មានអំណាចស្ទើរតែគ្មានព្រំដែនកំណត់ មានសិទ្ធិសាកសួរជនសង្ស័យ នៅទីកន្លែងសំងាត់ ដោយមិនចាំបាច់ឆ្លងកាត់ការសម្រេចពីតុលាការទេ។
ក្រៅពីពុះពារប្រឆាំងអំពើពុករលួយ បក្សកុម្មុយនិស្តចិន ក៏គ្រោងពង្រឹងការអប់រំមន្ត្រីជាន់ខ្ពស់ខ្លួន អោយពួកគេប្រកាន់ខ្ជាប់បន្ថែមទៀត នូវមនោគមន៍វិជ្ជាកុម្មុយនិស្ត ចៀសវាងលំអៀងទៅរកប្រទេសលោកខាងលិច ពិសេសប្រធានបទទាក់ទងសិទ្ធិមនុស្ស និងលទ្ធិប្រជាធិបតេយ្យ។
ចិនយល់ថា ការផ្លាស់ប្តូរនៃសង្គម និងសេដ្ឋកិច្ច បានធ្វើអោយការប្តេជ្ញាចិត្ត និងសីលធម៌ធ្លាក់ចុះខ្លាំង។ សម្រាប់បក្សកុម្មុយនិស្តចិន ចិនមានសិទ្ធិបកស្រាយទស្សនៈយល់ឃើញរបស់ខ្លួន សម្របតាមភាពជាក់ស្តែងក្នុងសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ