អតីតមេដឹកនាំយោធាចិនលំដាប់ទីពីរ ត្រូវបណ្តេញចេញពីបក្ស ក្រោមផ្លាកពុករលួយ
យុទ្ធនាការប្រយុទ្ធប្រឆាំងនឹងអំពើពុករលួយ បញ្ជាដោយប្រធានាធិបតីចិន លោក ស៊ី ជីនពីង បានរកឃើញមុខជនរងគ្រោះថ្មីបន្ថែមទៀតហើយ ! មន្ត្រីជាន់ខ្ពស់ក្នុងជួរយោធាបួននាក់ ក្នុងនោះម្នាក់ជាឧត្តមសេនីយ៍ចូលនិវត្តន៍ទៅហើយ ឈ្មោះ ស៊ូ កៃហ៊ូ (Xu Caihou) ដែលជាប់ចោទប្រើអំណាច និងប្រព្រឹត្តអំពើពុករលួយ ត្រូវបានបណ្តេញពីជួរបក្សកម្មុយនិស្ត បក្សតែមួយគត់នៅក្នុងប្រទេសចិន។ ក្នុងរយៈពេល៦ខែចុងក្រោយនេះ មន្ត្រីជាន់ខ្ពស់ចិន១៦នាក់បានខ្ទាតចេញពីតំណែង និងកំពុងរង់ចាំការកាត់ទោស។ សារព័ត៌មានផ្លូវការចិន ចេញផ្សាយថ្ងៃទី ១កក្កដានេះ បានសម្តែងមោទនភាពយ៉ាងខ្លាំង ចំពោះភាពដាច់ខាតរបស់បក្សកុម្មុយនិស្ត ដែលចង់លុបបំបាត់ឱ្យអំពើពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
យុទ្ធនាការប្រយុទ្ធប្រឆាំងនឹងអំពើពុករលួយ មានទម្រង់ដូចជាការបោសសម្អាតនយោបាយ។ ជនរងគ្រោះបួននាក់ចុងក្រោយនេះ ជាភស្តុតាងបញ្ជាក់អំពីមហិទ្ធិរិទ្ធិរបស់លោក ស៊ីជីនពីង ក្នុងការគាស់រំលើង ទាត់បណ្តេញចោល ទាំងមន្ត្រីតូច មន្ត្រីធំ បោសសម្អាតឱ្យខ្ទេច អំពើពុករលួយ ដែល ស៊ីរូងក្នុងជួរបក្សកុម្មុយនិស្ត។ បក្សនយោបាយដ៏ធំជាងគេបំផុត នៅលើពិភពលោក និងដែលមានអាយុ៩៣ឆ្នាំគត់ នៅថ្ងៃទី ១កក្កដា២០១៤នេះ។
បណ្តេញឧត្តមសេនីយ៍ចូលនិវត្តិន៍ ស៊ូ កៃហ៊ូ ចេញពីបក្ស គឺដូចជាបានច្រានខ្លាមួយចេញពីមុខពីមាត់ ព្រោះរហូតមកទល់នឹងឆ្នាំ ២០១៣ លោកស៊ូ គឺជាអនុប្រធានគណៈកម្មការយោធាមជ្ឈិមបក្សកុម្មុយនិស្តនិងជាសមាជិកជាន់ខ្ពស់នៃការិយាល័យនយោបាយបក្ស ស្ថាប័នកំពូលរបស់អំណាចចិនដែលមានគ្នាតែ២៥នាក់។ គិតចាប់តាំងការកកើតសាធារណរដ្ឋប្រជាមានិតចិននៅឆ្នាំ១៩៤៩ មក លោកស៊ូ គឺជាមន្ត្រីយោធា មានឋាន្តរសក្តិខ្ពស់ជាងបំផុតដែលជាប់អង្កេតក្នុងសំណុំរឿងអំពើពុករលួយ។
បើតាមប្រព័ន្ធឃោសនាព័ត៌មានរដ្ឋ លោក ស៊ូ ដែលជាប់ចោទពីបទប្រើអំណាច ដើម្បីប្រយោជន៍ក្រុមគ្រួសារសាច់ញាតិ និងបានទទួលប្រាក់សំណូក ជាថ្នូរនឹងការតំឡើងយសសក្តិ ត្រូវបណ្តេញចេញពីបក្ស (ទោសដ៏ធ្ងន់បំផុតនៅចិន) ហើយសំណុំរឿងចោទប្រកាន់នេះបានបញ្ជូនរួចជាស្រេចទៅតុលាការយោធា ដើម្បីកាត់ទោស។
មានអាយុ៧១ឆ្នាំ អតីតបុរសខ្លាំងទីពីរនៃយោធាចិន ត្រូវបានចាប់ខ្លួននៅថ្ងៃទី ១៥មីនា២០១៤ ពីមន្ទីរពេទ្យ ទីដែលលោកកំពុងសម្រាកព្យាបាលជំងឺមហារីកផ្លោកនោម។ នៅក្នុងសេចក្តីប្រកាសព័ត៌មាន ថ្នាក់ដឹកនាំចិន បានអះអាងថានឹងគ្មានការយោគយល់ ឬ ការបន្ធូរបន្ថយទោស ចំពោះបុគ្គលដែលរំលោភគោលការណ៍បក្ស។
សម្រាប់អ្នកវិភាគ ការដាក់ទោសមន្ត្រីមានជំងឺមហារីកកំរិតធ្ងន់ធ្ងរដូច្នេះ គឺជា សារព្រមាន ដ៏សំខាន់មួយសម្រាប់មន្ត្រីជាន់ខ្ពស់ផ្សេងទៀត ជាពិសេសចំពោះអ្នកទទួលខុសត្រូវយោធា ដែលល្បីខាងពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ