ជាប់គុក៦ឆ្នាំកន្លះពីបទប្រឆាំងអំពើពុករលួយនៅចិន
យ៉ាងហោចណាស់ មានសកម្មជនប្រឆាំងអំពើពុករលួយ នៅចិន២នាក់ ត្រូវបានតុលាការកាត់ទោសឲ្យជាប់ពន្ធនាគារ៦ឆ្នាំកន្លះ និងម្នាក់ទៀត៣ឆ្នាំ។ បើតាមការបញ្ជាក់របស់មេធាវីការពារក្តីសកម្មជនទាំង៣នាក់នេះ រដ្ឋាភិបាលចិនកំពុងធ្វើការរឹតបន្តឹង កៀបសង្កត់ទៅលើសកម្មជននានា ដែលហ៊ានរិះគន់ការដឹកនាំរបស់បក្សកុម្មុយនីស្តចិន។
ចុះផ្សាយនៅថ្ងៃ៖
ស្តាប់ - ០២:៣៦
នៅថ្ងៃព្រហស្បតិ៍ ទី១៩មិថុនានេះ តុលាការខេត្តជាំងស៊ី ភាគកណ្តាលប្រទេសចិន បានធ្វើការកាត់ទោសសកម្មជនប្រឆាំងអំពើពុករលួយ៣នាក់ ដោយពីរនាក់ជាប់ទោស៦ឆ្នាំកន្លះ និងម្នាក់ទៀត៣ឆ្នាំ។ សកម្មជនទាំងបីនាក់ ត្រូវបានតុលាកាផ្តន្ទាទោសពីបទ ប៉ះពាល់ដល់សណ្តាប់ធ្នាប់សាធារណៈ បញ្ឆេះកំហឹង និងបង្កចលាចលសង្គម។ សកម្មជនទាំងបីនាក់នេះ បានធ្វើសកម្មភាពទាមទារឲ្យមានការកាត់បន្ថយអំពើពុករលួយនៅចិន ដោយបានថតរូបខ្លួនឯង។ ក្នុងរូបនោះ ពួកគេបានលើកគ្រវីបដា ដោយមានសរសេរថា “អ្នកដឹកនាំនយោបាយត្រូវតែប្រកាសទ្រព្យសម្បត្តិរបស់ខ្លួន ដើម្បីធានាឲ្យមានតម្លាភាពក្នុងការប្រយុទ្ធប្រឆាំងអំពើពុករលួយ” ។
យោងតាមសម្តីរបស់លោកមេធាវីការពារសកម្មជនទាំងបី កូនក្តីលោកនឹងមិនធ្វើបណ្តឹងឧទ្ធរណ៍ទេ ព្រោះថាវាគ្មានប្រយោជន៍។ នរណាៗក៏ដឹងដែរថា តុលាកាឧទ្ធរណ៍នឹងសម្រេចសេចក្តីយ៉ាងណា ព្រោះអ្វីៗត្រូវបានសម្រេចដោយនយោបាយថ្នាក់លើរួចជាស្រេចទៅហើយ។
គួរបញ្ជាក់ផងដែរថា លោកប្រធានាធិបតីចិន ស៊ី ជីនពីង បានសន្យាថានឹងលុបបំបាត់អំពើពុករលួយគ្រប់រូបភាព នឹងមិនអត់ឱនចំពោះមន្ត្រីណាទាំងអស់ ដែលប្រព្រឹត្តអំពើពុករលួយ។ ការឃោសនានេះត្រូវបានប្រព័ន្ធផ្សព្វផ្សាយព៌តមានចិនប្រកាសយ៉ាងទូលំទូលាយ ប៉ុន្តែទោះជាយ៉ាងណា ក៏ការអនុវត្តន៍ត្រូវបានគេមើលឃើញថានៅមានភាពមិនប្រាកដប្រជា មិនទូលំទូលាយ ពោលគឺធ្វើឡើងតែទៅលើមន្ត្រីតូចតាចមួយចំនួនប៉ុណ្ណោះ។ ទន្ទឹមនឹងនេះ ការកាត់ទោសអ្នកសកម្មជន ដែលទាមទារឲ្យមានការលុបបំបាត់អំពើពុករលួយទាំងបីនាក់នេះ សបង្ហាញយ៉ាងច្បាស់ក្រឡែត អំពីនយោបាយប្រជាភិថុតិរបស់បក្សកុម្មុយនីស្តចិន ផ្ទុយស្រឡះអំពីអ្វីដែលខ្លួនបានសន្យា។
គួររំលឹកថា កាលពីខែមករាដើមឆ្នាំនេះ តុលាការចិនបានផ្តន្ទាទោសសាស្ត្រាចារ្យសកលវិទ្យាល័យ និងជាសកម្មជនប្រឆាំងអំពើពុករលួយដ៏សំខាន់មួយរូប ឲ្យជាប់គុក៤ឆ្នាំ។ កាលពីអំឡុងឆ្នាំ២០១៣ លោកសាស្ត្រាចារ្យរូបនេះ បានបង្កើតក្រុមមួយដែលមានឈ្មោះថា “ចលនាប្រជាពលរដ្ឋថ្មី”។ ចលនានេះត្រូវបានគេស្គាល់ថាជាការប្រមូលផ្តុំសកម្មជននានាដែលទាមទារឲ្យមានការគោរពសិទ្ធិមនុស្សជាមូលដ្ឋាន និងការកាត់បន្ថយអំពើពុករលួយក្នុងសង្គមចិន។ ក្រៅពីការចាប់ខ្លួនគាត់ អាជ្ញាធរចិនបានបន្តចាប់ខ្លួនសកម្មជនជាង១០នាក់ផ្សេងទៀត ចាប់តាំងពីដើមឆ្នាំ២០១៤។ ទាំងនេះ មិនមែនមានន័យថារដ្ឋាភិបាលចិនមិនអត់ឱនចំពោះមន្ត្រីណាដែលប្រព្រឹត្តអំពើពុលរលួយទេ តែមានន័យថារដ្ឋាភិបាលចិន នឹងមិនអត់ឱនចំពោះបុគ្គលណា ដែលហ៊ានធ្វើការបរិហារអំពើពុករលួយ រឺរិះគន់រដ្ឋាភិបាលទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ