តុលាការឧទ្ធរណ៍ចិនរក្សាការផ្តន្ទាទោសសកម្មជនដែលធ្វើការប្រឆាំងអំពើពុករលួយ
សកម្មជនប្រឆាំងអំពើពុករលួយចិនម្នាក់ត្រូវបានតុលាការឧទ្ធរណ៍ទាត់ចោលពាក្យបណ្តឹង ដោយរក្សាការថ្កោលទោសរបស់តុលាការដំបូង។ នៅថ្ងៃសុក្រទី ១១មេសា លោកស៊ុយ ហ្សីយុង ដែលគេស្គាល់ច្រើន តាមរយៈការនិយាយបើកកកាយអំពើពុករលួយ របស់ថ្នាក់ដឹកនាំចិន ត្រូវតុលាការដំបូងក្រុងប៉េកាំងផ្តន្ទាទោសពីបទជួបប្រជុំដោយខុសច្បាប់ សំដៅបង្កអសណ្តាប់ធ្នាប់សង្គម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
លោកស៊ុយ ហ្សីយុង (Chuy ហ្សីយុង) ជាគ្រូសកលវិទ្យាល័យ និងជាស្ថាបនិកចលនាប្រជាជនថ្មី។ លោកត្រូវបានអាជ្ញាធរចាប់ខ្លួន បន្ទាប់ពី លោកបានចូលរួមធ្វើបាតុកម្មទាមទារឲ្យថ្នាក់ដឹកនាំចិនមានតម្លាភាព បង្ហាញទ្រព្យសម្បត្តិផ្ទាល់ខ្លួន ជាសាធារណៈ។ កាលពីខែមករា តុលាការដំបូងបានផ្តន្ទាទោសលោកស៊ុយ ហ្សីយុង ឲ្យជាប់ពន្ធនាគារបួនឆ្នាំ ក្នុងបទល្មើសបង្កអសណ្តាប់ធ្នាប់សង្គម។ លោកស៊ុយ ហ្សីយុងបានធ្វើបណ្តឹងឧទ្ធរណ៍ដោយសារមិនពេញចិត្តនឹងសាលក្រមតុលាការដំបូងក្រុងប៉េកាំង។
ប៉ុន្តែ មេធាវី របស់លោកស៊ុយ បាននិយាយប្រាប់អ្នកកាសែត នៅក្រៅបន្ទប់តុលាការថា តុលាការឧទ្ធរណ៍នៅបន្តរក្សាសាលក្រមរបស់តុលាការដំបូង ដោយរក្សាការចោទប្រកាន់លើកូនក្តីរបស់លោកដដែល។ តាមមេធាវីរបស់លោកស៊ុយ នៅក្នុងបន្ទប់សវនាការ លោកស៊ុយបានស្រែកក្តែងៗ នៅមុខចៅក្រមថា ការសម្រេចរបស់តុលាការឧទ្ធរណ៍ ជារឿងដែលមិនត្រឹមត្រូវ និងមិនអាចទប់ស្កាត់រលករីកចម្រើនបញ្ញារបស់ប្រជាជនចិនបានទេ។ អំពើផ្តាច់ការកុម្មុយនិស្តនឹងរលំរលាយ នៅពេលដែលពន្លឺនៃសេរីភាព និងយុត្តិធម៌នឹងរះឡើង នៅ ភាគខាងលិចប្រទេសចិន។
ក្នុងរយៈពេលប៉ុន្មានឆ្នាំមកនេះ លោកស៊ុយ ហ្សីយុងបានបង្កើតបណ្តាញសង្គមមិនផ្លូវការមួយ និងរៀបចំការជួបប្រជុំគ្នា ដើម្បីនិយាយ ពិភាក្សាគ្នាពីបញ្ហាសង្គម ការទទួលបានការអប់រំ និងអំពើពុករលួយរបស់ថ្នាក់ដឹកនាំចិន។ ប៉ុន្តែ សកម្មភាពជួបប្រជុំរបស់ចលនាលោកស៊ុយ មិនអាចរំលងភ្នែកពីអាជ្ញាធរចិនបានទេ។ លោកស៊ុយ និងសកម្មជនជាង១០នាក់ត្រូវអាជ្ញាធរចាប់ខ្លួន នៅដើមឆ្នាំនេះ។ នៅក្នុងសប្តាហ៍នេះ សកម្មជនបីនាក់របស់ក្រុមលោកស៊ុយកំពុងត្រូវតុលាការក្រុងប៉េកាំងបើកសវនាការជំនុំជម្រះ និងអាចប្រឈមនឹងការដាក់ទោសជាប់ពន្ធនាគារ៥ឆ្នាំ។
អង្គការការពារសិទ្ធិមនុស្ស ដូចជាAmnesty International បានបរិហារសាលក្រមរបស់តុលាការឧទ្ធរណ៍ចិន ដោយថា វាបានធ្វើឡើង ផ្ទុយទៅនឹងឆន្ទះប្រយុទ្ធប្រឆាំងនឹងអំពើពុករលួយរបស់រដ្ឋាភិបាលចិន។ ជាងមួយឆ្នាំមកហើយ លោកប្រធានាធិបតីចិន ស៊ី ជីនពីង បានប្តេជ្ញាធ្វើយុទ្ធនាការបោសសម្អាតអំពើពុករលួយ នៅគ្រប់ជួរថ្នាក់ដឹកនាំរបស់បក្ស។ ប៉ុន្តែ យុទ្ធនាការរបស់លោកស៊ី មាននិយាយច្រើនតែនៅក្នុងការផ្សព្វផ្សាយ ប៉ុន្តែ ការអនុវត្តជាក់ស្តែង នៅមានតិចតួចណាស់។ នេះបើតាមអ្នកជំនាញការ។ សូមបញ្ជាក់ថា នៅក្នុងប្រទេសចិន រឿងទ្រព្យសម្បត្តិ របស់មេដឹកនាំចិន និងក្រុមគ្រួសារ មិនត្រូវបានគេលើកមកនិយាយច្រើន។ កាសែតក្នុងស្រុកត្រូវបានហាមឃាត់មិនឲ្យលើកនិយាយ ឬចោទសួរពីទ្រព្យសម្បត្តិរបស់ថ្នាក់ដឹកនាំ។ អ្នកកាសែតអាមេរិកដូចជារបស់New York times និងBloomberg ត្រូវបានហាមមិនឲ្យជាន់ទឹកដីចិន បន្ទាប់ពីប្រព័ន្ធផ្សព្វផ្សាយទាំងពីបានចុះផ្សាយពីទ្រព្យសម្បត្តិ និងជំនួញរកស៊ីរបស់ក្រុមគ្រួសាររបស់អតីតនាយករដ្ឋមន្រ្តីចិន វេន ជាប៉ាវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ