កម្ពុជា

ចំនួនអ្នករងគ្រោះដោយរន្ទះបាញ់នៅពេលដូររដូវកាលមានការថយចុះច្រើន

ចំនួនអ្នកស្លាប់និងរបួសដោយគ្រោះធម្មជាតិ រន្ទះបាញ់ មានការថយចុះជិតពាក់កណ្តាលនៅឆ្នាំ២០១៤នេះ បើប្រៀបធៀបទៅនឹងរយៈពេលដូចគ្នា កាលពីដើមឆ្នាំទៅ។ ការកត់សម្គាល់នេះត្រូវបានធ្វើឡើងដោយស្ថាប័នគ្រប់គ្រងគ្រោះមហន្តរាយកម្ពុជា។អាជ្ញាធរ មិនមានវិធានការអ្វីផ្សេងក្រៅពី ការណែនាំដល់ប្រជាពលរដ្ឋ ឲ្យប្រតិបត្តិទៅតាមការផ្សព្វផ្សាយនិងមានការប្រុងប្រយ័ត្ននៅពេលដែលមានភ្លៀងផ្គរ អំឡុងពេលផ្លាស់ប្តូរអាកាសធាតុពីរដូវប្រាំងចូលរដូវវស្សានេះ។

ចុះផ្សាយនៅថ្ងៃ៖ 11/05/2014 - 09:24

ដោយ៖ ញឹម សុផល

ផ្សាយពាណិជ្ជកម្ម

គ្រោះមហន្តរាយធម្មជាតិរន្ទះបាញ់ដែលបានសម្លាប់មនុស្ស និងបំផ្លាញទ្រព្យសម្បត្តិជារៀងរាល់ឆ្នាំត្រូវបានអង្គភាពគ្រោះមហន្តរាយនៅក្នុងប្រទេសកម្ពុជាកត់សម្គាល់ថា មានការថយចុះច្រើនអំឡុងពេលដើមឆ្នាំ ២០១៤នេះ។

លោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបានថ្លែងប្រាប់វិទ្យុបារាំងអន្តរជាតិ នៅថ្ងៃអាទិត្យនេះថា ចំនួនអ្នកស្លាប់បណ្តាលមកពីរន្ទះបាញ់មានការថយចុះច្រើននៅឆ្នាំនេះ។ លោក កែវ វី ឲ្យដឹងថាសម្រាប់រយៈពេលជាង៤ខែដើមឆ្នាំ ២០១៤នេះ មានអ្នកស្លាប់ដោយសាររន្ទះបាញ់ចំនួន២៨នាក់និងរបួស១៩នាក់។ក៏ប៉ុន្តែសម្រាប់រយៈពេលដូចគ្នានេះ កាលពីឆ្នាំទៅចំនួនអ្នកស្លាប់មានរហូត៣៥នាក់និងរបួស២៤នាក់។

ជាទូទៅរន្ទះច្រើនកើតឡើងនៅពេលមានភ្លៀងកក់ខែនៅក្នុងរដូវប្រាំង ក៏ប៉ុន្តែ ជាការកត់សម្គាល់ ចំនួនអ្នកស្លាប់និងរបួសដោយរន្ទះមានការកើនឡើងបន្តិចចាប់ពីដើមខែឧសភានេះ
ដោយសារតែអាកាសធាតុមានសភាពក្តៅខ្លាំងនិងត្រៀមផ្លាស់ប្តូររដូវពីរដូវប្រាំងនិងរដូវវស្សា។

តាមការព្យាករណ៍របស់ក្រសួងធនធានទឹក និងឧត្តុនិយម, នៅឆ្នាំនេះកម្ពុជារងនូវឥទ្ធិពលព្យុះច្រើន ក៏ប៉ុន្តែមានភ្លៀងមិនសូវច្រើនប៉ុន្មានទេ ស្ថានភាពនេះធ្វើឲ្យមានកើតរន្ទះតិច។ជាវិធានការ លោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ បានណែនាំផ្សព្វផ្សាយកុំឲ្យប្រជាជន ស្ថិតនៅកណ្តាលវាលនៅពេលដែលមេឃរកកលភ្លៀង ត្រូវប្រញ៉ាប់ប្រញាល់ទៅកាន់ផ្ទះសម្បែង។លើសពីនេះមិនគួរនិយាយទូរស័ព្ទឬមើលទូរទស្សន៍ ឬក៏ប៉ះពាល់វត្ថុដែលអាចចំលងចរន្តអគ្គីសនីនៅពេលមានភ្លៀង ខ្យល់ ផ្គរ រន្ទះ។

សូមបញ្ជាក់ថាពេញមួយឆ្នាំ ២០១៣ កន្លងទៅ មានមនុស្សជាង១០០នាក់ស្លាប់ និងរបួសជាច្រើននាក់ផ្សេងទៀតដោយសាររន្ទះ ព្រមទាំងធ្វើឲ្យងាប់គោ ក្របី បំផ្លាញទ្រព្យសម្បត្តិប្រជាជនជាច្រើនទៀតផង៕