ការបាក់ច្រាំងទន្លេបានស្រូបយកជីវិតមនុស្សបីនាក់ទៅក្នុងទឹក
កុមារពីរនាក់និងស្រី្តវ័យចំណាស់ម្នាក់បានស្លាប់នៅក្នុងការបាក់ច្រាំងមួយនៅស្រុកខ្សាច់កណ្តាល ខេត្តកណ្តាលកាលពីយប់មិញ។ អាជ្ញាធរនៅតំបន់នោះថ្លែងថា ពួកគេមិនមានសមត្ថភាពគ្រប់គ្រាន់ដើម្បីសង្គ្រោះជនរងគ្រោះឡើយ។ មន្ត្រីសង្គមស៊ីវិលបានមើលឃើញថាឧប្បត្តិវហេតុនេះ គឺជាការទទួលខុសត្រូវរបស់រដ្ឋាភិបាលនិងក្រុមហ៊ុនបូមខ្សាច់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
មនុស្សបីនាក់ ក្នុងនោះមានជីដូន និងចៅ ២នាក់ ត្រូវអាជ្ញាធរស្រុកខ្សាច់កណ្តាលខេត្តកណ្តាលបានអះអាងថា ស្លាប់ដោយសារការបាក់ច្រាំងទន្លេមួយកាលពីយប់ថ្ងៃទី១៨កុម្ភៈ។ជនរងគ្រោះទាំងបីនាក់បានស្នាក់នៅក្នុងផ្ទះរបស់ពួកគេ នៅក្នុងដំណេកពេលយប់ ហើយផ្ទះដែលពួកគេស្នាក់នៅលើច្រាំងបានបាក់ស្រុតចូលទឹក និង កប់បាត់ទៅក្នុងល្បាក់ដី នៃទន្លេមេគង្គជាច្រើនម៉ោង។
លោក ម៉ែន សុឃឿន អធិការប៉ូលីសស្រុកខ្សាច់កណ្តាលខេត្តកណ្តាល បានប្រាប់វិទ្យុបារាំង អន្តរជាតិ RFI ថាសមត្ថកិច្ចកំពុងតែរិះរកមធ្យោបាយសង្គ្រោះ ក៏ប៉ុន្តែមិនមានលទ្ធភាព ដោយសារសណ្ឋានដីនៅមាត់ច្រាំងនោះ មានសភាពរកកលបាក់បន្ថែមទៀត។ មេប៉ូលីស ស្រុកខ្សាច់កណ្តាលបន្តថា អាជ្ញាធរនិងសមត្ថកិច្ចអត់មានសម្ភារៈគ្រប់គ្រាន់ដើម្បីប្រតិបត្តិការជួយសង្គ្រោះគ្រោះថ្នាក់បែបនេះទេ មានតែជួលជនជាតិខ្មែរឥស្លាមដែលជំនាញខាងមុជទឹកជួយរាវរក ដោយអ្នកមុជទឹកទារតម្លៃ ៣០០ដុល្លារក្នុងការរកឃើញសពម្នាក់។
ទាក់ទងទៅនឹងបញ្ហាបាក់ច្រាំងដែលធ្វើឲ្យផ្ទះសម្បែង ទ្រព្យសម្បត្តិ និងមានការបាត់បង់អាយុជីវិតមនុស្សផងនោះ ប្រជាពលរដ្ឋក៏ដូចជាអង្គការសង្គមស៊ីវិលតែងធ្វើការស្តីបន្ទោសទៅលើការអនុញ្ញាតឲ្យមានការបូមខ្សាច់នៅក្នុងទន្លេ។ ក៏ប៉ុន្តអាជ្ញាធរតែងធ្វើការបដិសេធចំពោះការលើកឡើងដូច្នេះ។
លោក សៀ ភិរម្យ នាយកក្រុមលេខាធិការដ្ឋាននៃអង្គការក្រុមការងារពិសេសសិទ្ធិលំនៅដ្ឋានបានហៅវិធានការរបស់រដ្ឋាភិបាលថា មិនទាន់មានការយកចិត្តទុកដាក់ទាក់ទងទៅនឹងការបំរើសេវាកម្មរក្សាសុវត្ថិភាពដល់ប្រជាពលរដ្ឋ ដែលប្រឈមនឹងការបាក់ច្រាំង។លោកថាការបាក់ច្រាំងទន្លេនោះ គឺបណ្តាលមកពីការបូមខ្សាច់ ដែលនៅមានសកម្មភាពនៅតាមដងទន្លេបើទោះណាជារដ្ឋាភិបាលបានប្រកាសហាមប្រាមមិនឲ្យបូមកាលពីពេលថ្មីៗនេះក៏ដោយ។ជាមួយគ្នានេះសង្គមស៊ីវិលជម្រុញឲ្យអាជ្ញាធរមានការស្រាវជ្រាវផងដែរប្រសិនបើគ្រោះថ្នាក់នោះជាបច្ច័យអាក្រក់ដោយសារការបូមខ្សាច់នៅទីនោះមែននោះ អាជ្ញាធរត្រូវតែក្លាហាន យកយុត្តិធម៌ជូនប្រជាជនរងគ្រោះ ពីសំណាក់ក្រុមហ៊ុនបូមខ្សាច់។
ទោះជាយ៉ាងណាក៏ដោយ អាជ្ញាធរស្រុកខ្សាច់កណ្តាល ក៏ដូចជាតំបន់ផ្សេងៗទៀតនៅតាមដងទន្លេ បានអះអាងថា កន្លងមកតែងមានការអប់រំ ណែនាំដល់ប្រជាជនផងដែរឲ្យមានការប្រុងប្រយ័ត្នក្នុងការរស់នៅបែបប្រឈមនឹងគ្រោះថ្នាក់បែបនេះ ។ក៏ប៉ុន្តែប្រជាជនត្អូញត្អែរថា ភាពក្រីក្របានជម្រុញឲ្យពួកគេមិនមានជម្រើសលំនៅដ្ឋានផ្សេងពីនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ