ព្យុះហ្គាអេមីបន្ថយឥទ្ធិពលរបស់វានៅពេលមកដល់កម្ពុជានាថ្ងៃអាទិត្យនេះ
ព្យុះហ្គាអេមីបន្ថយឥទ្ធិពលរបស់វានៅពេលមកដល់ប្រទេសកម្ពុជានៅព្រឹកថ្ងៃអាទិត្យនេះ។ លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយមបានបញ្ជាក់ប្រាប់នៅថ្ងៃអាទិត្យនេះថា ប្រទេសកម្ពុជាមានសំណាងល្អដោយសារព្យុះកំណាចហ្គាអេមីបានបន្ថយឥទ្ធិពលរបស់វានៅពេលវាមកដល់ប្រទេសកម្ពុជា។ ព្យុះនៅតែបង្កអោយមានភ្លៀងធ្លាក់ដដែល ប៉ុន្តែវាមិនបណ្តាលអោយមានខ្យល់បោកបក់ខ្លាំងនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយមបានបញ្ជាក់ប្រាប់តាមទូរស័ព្ទនៅថ្ងៃអាទិត្យនេះថា ព្យុះហ្គាអេមីបានធ្វើដំណើរមកដល់ខេត្តរតនគីរីប្រទេសកម្ពុជាហើយនាព្រឹកថ្ងៃអាទិត្យនេះ ហើយបន្ទាប់មកវាធ្វើដំណើរឆ្លងកាត់ខេត្តមួយចំនួន មុននឹងមកដល់ខេត្តសៀមរាបនៅវេលាម៉ោង៦ ឬ៧យប់នេះ។ នៅថ្ងៃអាទិត្យនេះ គេសង្កេតឃើញថា ខេត្តមួយភាគធំនៃប្រទេសកម្ពុជាមានភ្លៀងធ្លាក់ច្រើន ឬតិចអាស្រ័យលើតំបន់ផ្សេងៗគ្នា។
បើយោងតាមការព្យាករណ៍កាលពីប៉ុន្មានថ្ងៃមុននេះ ព្យុះហ្គាអេមីអាចនឹងវាយលុកប្រទេសកម្ពុជាក្នុងកម្រិតធ្ងន់ធ្ងរគួរសម ប៉ុន្តែជាសំណាងល្អ ព្យុះហ្គាអេមីបានបន្ថយឥទ្ធិពលរបស់វានៅពេលដែលវាធ្វើដំណើរមកដល់ប្រទេសកម្ពុជា។
លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយមបានថ្លែងប្រាប់ទាំងអារម្មណ៍សប្បាយចិត្តបន្តិចថា៖ «នេះជាសំណាងមួយ លើមួយពាន់របស់កម្ពុជាដែលមិនទទួលរងឥទ្ធិពលខ្យល់ព្យុះហ្គាអេមីធំដុំ»។ លោករដ្ឋមន្រ្តីបានបន្តទៀតថា ព្យុះហ្គាអេមីនៅតែបង្កអោយមានភ្លៀងធ្លាក់ច្រើនដដែល ប៉ុន្តែវាមិនបង្កអោយមានខ្យល់បោកបក់ខ្លាំងទេ។ កាលណាមិនមានខ្យល់បក់ខ្លាំង គឺជាសំណាងមួយដ៏ធំរួចស្រេចទៅហើយ ពីព្រោះវាមិនមានការបំផ្លិចបំផ្លាញផ្ទះសម្បែងដោយសារខ្យល់បោកបក់។
បើយោងតាមទោះទាយចុងក្រោយ ព្យុះហ្គាអេមីស្ថិតនៅក្នុងប្រទេសកម្ពុជារហូតដល់ថ្ងៃអង្គារសប្តាហ៍ក្រោយ មុនពេលដែលចំហាយព្យុះតិចតួចធ្វើដំណើរឆ្ពោះទៅកាន់ប្រទេសថៃ។
ទាក់ទងទៅនឹងសំណួរដែលសួរថា តើទឹកភ្លៀងអាចបង្កអោយមានទឹកជំនន់ទឹកភ្លៀងដែរ ឬអត់នោះ? លោករដ្ឋមន្រ្តីអល់អែកនៅមិនទាន់ហ៊ានឆ្លើយអោយចំនៅឡើយទេ។ ប៉ុន្តែលោករដ្ឋមន្រ្តីនៅតែសម្តែងក្តីព្រួយបារម្ភចំពោះបញ្ហានេះ។ ទឹកជំនន់ទឹកភ្លៀងកាលពីប៉ុន្មានសប្តាហ៍មុននៅក្នុងប្រទេសកម្ពុជាបានសម្លាប់ប្រជាជនខ្មែរអស់៥នាក់ និងបំផ្លាញដំណាំកសិកម្មអស់ជាច្រើនហិកតា។
សូមបញ្ជាក់ថា ប្រទេសកម្ពុជាជារៀងរាល់ឆ្នាំតែងតែប្រឈមនឹងខ្យល់ព្យុះជាមធ្យមពី២៥ ទៅ២៧។ ខ្យល់ព្យុះហ្គាអេមីនៅពេលនេះ គឺជាខ្យល់ព្យុះទី២០ហើយដែលបាន និងកំពុងបោកបក់មកលើព្រះរាជាណាចក្រកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ