ប្រមុខរាជរដ្ឋាភិបាលកម្ពុជាចូលរួមរំលែកទុក្ខ ចំពោះគ្រោះរញ្ជួយដីសម្លាប់មនុស្ស នៅប្រទេសចិន
លោកនាយករដ្ឋមន្ត្រី ហ៊ុន សែន បានផ្ញើលិខិតសម្តែងការរំលែកទុក្ខយ៉ាងក្រៀមក្រំ ចំពោះមហាមិត្តចិន ដែលរងគ្រោះរញ្ជួយដី នៅក្នុងខេត្តស៊ីឈាន់ ដែលបានសម្លាប់មនុស្សជិត ២០០នាក់ បាត់ខ្លួន ២៥នាក់ និងជាង ១២០០នាក់ទៀតរងរបួស។ លិខិតរបស់លោក ជូនលោក លី ខឺឈាង នាយករដ្ឋមន្ត្រីចិន កាលពីថ្ងៃទី២២មេសា។
ចុះផ្សាយនៅថ្ងៃ៖
ស្តាប់ - ០២:២២
ផ្តើមដំបូង លោកនាយករដ្ឋមន្ត្រី ហ៊ុន សែន បានជម្រាបជូននាយករដ្ឋមន្ត្រីចិន លោក លី ខឺឈាង ថា លោកមានសេចក្តីក្រៀមក្រំយ៉ាងខ្លាំង ដោយបានទទួលព័ត៌មានពីការបាត់បង់ជីវិតមនុស្សជាច្រើននាក់ និងរងរបួសរាប់សែននាក់ផ្សេងទៀត ព្រមទាំងខូចខាតទ្រព្យសម្បត្តិយ៉ាងធំធេង ដែលបណ្តាលមកពីការរញ្ជួយដីដ៏ធ្ងន់ធ្ងរ នៅខេត្តស៊ីឈួន នៅភាគនិរតីនៃប្រទេសចិន កាលពីថ្ងៃទី២០ ខែមេសា។
តាងនាមឲ្យរាជរដ្ឋាភិបាល ប្រជាជនកម្ពុជា និងក្នុងនាមលោកផ្ទាល់ លោកនាយករដ្ឋមន្ត្រី បានចូលរួមរំលែកទុក្ខយ៉ាងក្រៀមក្រំបំផុត ជូនចំពោះលោកនាយករដ្ឋមន្ត្រីចិន ព្រមទាំងរដ្ឋាភិបាលនិងប្រជាជននៃសាធារណរដ្ឋប្រជាមានិតចិន ជាពិសេសជនរងគ្រោះ និងក្រុមគ្រួសារជនរងគ្រោះដល់ជីវិត ចំពោះការបាត់បង់ជីវិតដ៏អាណោចអាធម និងការខូចខាតដ៏ធំធេង ដែលបង្កឡើងដោយសារគ្រោះមហន្តរាយធម្មជាតិនេះ។
លោកនាយករដ្ឋមន្ត្រី ជឿជាក់យ៉ាងមុតមាំថា ក្រោមការដឹកនាំដ៏ឈ្លាសវៃរបស់រដ្ឋាភិបាលចិន ក្រោមអាណត្តិលោក លី ខឺឈាង ប្រជាជនចិននឹងខិតខំបន្ធូរបន្ថយនូវការខូចខាតឲ្យមានកំរិតទាបបំផុត និងជំនះបានលើគ្រោះមហន្តរាយនេះ។
តាមរបាយការណ៍របស់អាជ្ញាធរចិន និងអង្គការសហប្រជាជាតិ គ្រោះមហន្តរាយរញ្ជួយដី នៅស៊ីឈួន យ៉ាងហោចណាស់ សម្លាប់មនុស្ស ១៩៣ នាក់ ២៥ នាក់ បាត់ខ្លួន និងជាង ១២.០០០នាក់រងរបួស។ ក្នុងនោះក៏មានប្រជាជនប្រមាណ ២៤៥.០០០ នាក់ ត្រូវជម្លៀសចេញពីខេត្តស៊ីឈួន។ គ្រោះរញ្ជួយដីនៅចិន ក៏ត្រូវបានលោក ហោ ណាំហុង រដ្ឋមន្ត្រីការបរទេស បានចូលរួមរំលែកទុក្ខ តាមរយៈលិខិតជូនលោករដ្ឋមន្ត្រីការបរទេសចិន វ៉ាង យី ផងដែរ។
ក្រៅពីផ្ញើលិខិតចូលរួមរំលែកទុក្ខចំពោះគ្រោះរញ្ជួយដីនៅចិន លោកនាយករដ្ឋមន្ត្រី ហ៊ុន សែន ក៏បានផ្ញើលិខិតមួយច្បាប់ទៀត អបអរសាទរចំពោះនាយករដ្ឋមន្ត្រីថ្មីរបស់កូរ៉េខាងជើង លោក ប៉ាក ពុងជូ ដែលទើបត្រូវបានតែងតាំង។
ក្នុងលិខិត លោកនាយករដ្ឋមន្ត្រី បានគូសបញ្ជាក់ថា លោកមានជំនឿយ៉ាងមុតមាំថា ចំណងមិត្ដភាពនិងកិច្ចសហប្រតិបត្ដិការដ៏ល្អប្រសើរ រវាងកម្ពុជា និងសាធារណរដ្ឋប្រជាមានិតប្រជាធិបតេយ្យកូរ៉េ ដែលគេស្គាល់ថា កូរ៉េខាងជើង ពិតជានឹងត្រូវពង្រឹងនិងពង្រីកបន្ថែមទៀត ដើម្បីជាផលប្រយោជន៍នៃប្រជាជនទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ