ព័ត៌មានជាកត្តាស្លាប់រស់របស់អ្នកដឹកនាំ!
ចុះផ្សាយនៅថ្ងៃ៖
ស្តាប់ - ០៥:០៧
នៅគ្រប់សម័យកាលទាំងអស់ ជាពិសេសក្នុងយុគសម័យបច្ចេកវិជ្ជាព័ត៌មានដូចជាបច្ចុប្បន្ន ព័ត៌មានត្រូវបានគេចាត់ទុកថាមានសារសំខាន់ណាស់សម្រាប់មនុស្សគ្រប់គ្នាជាពិសេសសម្រាប់អ្នកនយោបាយនិងអ្នកដឹកនាំតែម្តង។ ប៉ុន្តែ រហូតមកដល់ពេលនេះ គេនៅតែសង្កេតឃើញអ្នកនយោបាយនិងមន្ត្រីមួយចំនួននៅតែមិនសូវចាប់អារម្មណ៍តាមដានព័ត៌មាននោះឡើយ។ រីឯការផ្តល់តម្លៃដល់ព័ត៌មានក៏នៅមិនទាន់ត្រឹមត្រូវដែរ។ ជាទូទៅពួកគេច្រើនតែចូលចិត្តព័ត៌មានបែបលើកសរសើរ តែមិនចូលចិត្តស្តាប់ព័ត៌មានពិតឬព័ត៌មានដែលមានលក្ខណៈរិះគន់ឡើយ។ ទីបំផុត កង្វះព័ត៌មានគ្រប់ជ្រុងជ្រោយបានធ្វើឲ្យពួកគេសម្រេចចិត្តខុស។
ទាំងក្នុងជីវភាពជាក់ស្តែង ក៏ដូចជាក្នុងរឿងព្រេងឬខ្សែភាពយន្តដែរ មានរឿងរ៉ាវច្រើនណាស់ដែលនិយាយអំពីមេដឹកនាំដែលរងគ្រោះព្រោះមន្ត្រីថ្នាក់ក្រោមដែលផ្តល់ព័ត៌មានខុសឬមិនគ្រប់ជ្រុងជ្រោយ។ ដោយសារកង្វះព័ត៌មាន មេដឹកនាំមិនអាចឆ្លើយតបទៅនឹងដំណោះស្រាយបញ្ហាពិតប្រាកដបានឡើយ។ ទីបំផុត បញ្ហាបានផ្ទុះឡើងហើយទម្រាំបានដឹងការពិត អង្ករបានក្លាយជាបាយរួចទៅហើយ។
ហេតុដូច្នេះហើយបានជាមានមេដឹកនាំខ្លះត្រូវបន្លំខ្លួនធ្វើជាពលរដ្ឋសាមញ្ញហើយដើរចូលទៅក្នុងកន្លែងដែលមានបញ្ហាដើម្បីស្វែងយល់ការពិត។ នេះជាគតិមួយដែលឆ្លុះបញ្ចាំងឲ្យឃើញថា មេដឹកនាំដែលកាន់តួនាទីកំពូលៗមានការលំបាកក្នុងការទទួលបានព័ត៌មានពិតពីព្រោះពួកគេមិនបានស្ថិតក្នុងហេតុការណ៍ផ្ទាល់នោះឡើយ។ ព័ត៌មានដែលទទួលបានត្រូវឆ្លងកាត់តាមរយៈមន្ត្រីអ្នកមុខអ្នកការឬទីប្រឹក្សាដែលនៅជុំវិញខ្លួន។ ប្រសិនបើមន្ត្រីទាំងនោះស្មោះត្រង់មិនជាបញ្ហាចោទប៉ុន្មានទេ ប៉ុន្តែ ប្រសិនបើពួកគេព្យាយាមបិទបាំងព័ត៌មានដើម្បីផលប្រយោជន៍អ្វីមួយនោះ វាពិតជាគ្រោះថ្នាក់ធំធេងមួយ។
យ៉ាងណាក៏ដោយចុះ នៅក្នុងសម័យព័ត៌មានវិទ្យាទំនើបដូចជាបច្ចុប្បន្ន ការទទួលបានព័ត៌មានហាក់មិនពិបាកឡើយ។ មិនពិបាកពីព្រោះថា ប្រព័ន្ធផ្សាយព័ត៌មានមានច្រើនគគោកនិងបានផ្សាយព័ត៌មានយ៉ាងសម្បូរបែបនិងគ្រប់ទិដ្ឋភាពដែលបានកើតឡើង។ ប៉ុន្តែ អ្វីដែលសំខាន់នៅត្រង់ថា តើអ្នកនយោបាយឬមេដឹកនាំម្នាក់ៗបើកចិត្តគំនិតឲ្យទូលំទូលាយដើម្បីតាមដានព័ត៌មានទាំងនោះដែរឬទេ?
ជាការពិតណាស់ នៅក្នុងសម័យទំនើបនេះ ព័ត៌មានគឺជាអាវុធដ៏មានប្រសិទ្ធិភាពសម្រាប់កំណត់ពីជោគជ័យឬបរាជ័យរបស់អ្នកដឹកនាំ (មិនថាអ្នកដឹកនាំប្រទេស អ្នកដឹកនាំបក្សនយោបាយឬក៏អ្នកដឹកនាំក្នុងពិភពជំនួញនោះទេ)។ ប៉ុន្តែ ទោះជាយ៉ាងនេះក៏ដោយ ក៏ការទទួលបានព័ត៌មានមិនគ្រប់ជ្រុងជ្រោយនៅតែជាចំណោទដ៏សំខាន់មួយសម្រាប់អ្នកដឹកនាំដែលធ្វើឲ្យពួកគេសម្រេចចិត្តខុសឬក៏មិនសូវមានប្រសិទ្ធភាព។
មានមូលហេតុច្រើនយ៉ាងដែលអាចពន្យល់បញ្ហានេះបាន៖
មូលហេតុទី១ គឺមកពីមានរបាំងនៃរំហូរព័ត៌មាននៅជុំវិញខ្លួនមេដឹកនាំពោលគឺព័ត៌មានជាច្រើនត្រូវបានបិទបាំងឬរាយការណ៍មិនអស់ពីសំណាក់ថ្នាក់ក្រោម។
មូលហេតុទី២ គឺមេដឹកនាំភាគច្រើនតែងចូលចិត្តស្តាប់តែព័ត៌មានដែលលើកសរសើរខ្លួនឯង តែមិនចូលចិត្តស្តាប់ព័ត៌មានដែលនិយាយពីចំណុចអវិជ្ជមានរបស់ខ្លួនឡើយ។ នៅពេលដែលពួកគេលង់តែនឹងព័ត៌មានបញ្ចើចបញ្ចើ ពួកគេតែងព្យាយាមបំភ្លេចព័ត៌មានអាក្រក់ដែលជាព័ត៌មានពិត។
មូលហេតុទី៣ គឺដោយសារតែថ្នាក់ក្រោមមិនសូវហ៊ាននិយាយរឿងមិនល្អប្រាប់មេកើយរបស់ខ្លួនឡើយ។ ដូចពាក្យចាស់បុរាណបានពោលថា«ពាក្យពិតរែងស្លែង» ពោលគឺពាក្យពិតច្រើនតែជាពាក្យល្វីងជូចត់ដែលកម្រមានមេដឹកនាំណាប្រាថ្នាចង់ស្តាប់។
ទាំងអស់នេះគឺជាគុណវិបត្តិរបស់មេដឹកនាំនៅគ្រប់ជ្រុងជ្រោយនៃពិភពលោក។ ប៉ុន្តែ មេដឹកនាំខ្លះបានយល់ច្បាស់ពីបញ្ហានេះហើយក៏ព្យាយាមបញ្ចៀសពីស្ថានភាពដ៏អាក្រក់នេះ។ យ៉ាងណាក៏ដោយក៏នៅមានមន្ត្រីជាច្រើននៅតែរស់នៅក្នុងស្ថានភាព«កង្កែបក្នុងអណ្តូង»ដដែល។
ដូច្នេះ មន្ត្រីនយោបាយគួរតែរំដោះខ្លួនចេញពីស្ថានភាពនេះហើយរិះរកវិធីយ៉ាងណាដើម្បីឲ្យខ្លួនអាចទទួលបានរំហូរព័ត៌មានគ្រប់គ្រាន់ជាពិសេសព័ត៌មានដែលនិយាយមិនល្អពីការដឹកនាំរបស់ខ្លួនពីព្រោះការទទួលបានព័ត៌មានតែមួយជ្រុងគឺជាគ្រោះថ្នាក់ដល់ការធ្វើសេចក្តីសម្រេចចិត្ត។ ក្នុងន័យនេះ គេជឿជាក់ថា ការសម្រេចចិត្តទាក់ទងនឹងដីសម្បទានសេដ្ឋកិច្ច ឬគម្រោងអភិវឌ្ឍន៍ផ្សេងៗទៀត ទំនងជាមានផលអាក្រក់តិចជាងនេះប្រសិនបើមេដឹកនាំថ្នាក់លើបានទទួលព័ត៌មានគ្រប់ជ្រុងជ្រោយជាមុនអំពីផលអវិជ្ជមានដែលកើតចេញពីគម្រោងទាំងនោះ។
សរុបមកវិញ ការស្វែងរកប្រភពព័ត៌មានឲ្យបានគ្រប់ជ្រុងជ្រោយគឺជាអាវុធដ៏មានប្រសិទ្ធភាពក្នុងការធ្វើសេចក្តីសម្រេចចិត្ត។ ជាពិសេស ព័ត៌មានអាក្រក់គឺជាជំនួយស្មារតីយ៉ាងល្អសម្រាប់ការដឹកនាំ។ ផ្ទុយទៅវិញ ការទទួលបានតែព័ត៌មានល្អៗច្រើនពេកអាចធ្វើឲ្យមនុស្សភ្លេចគិតពីវិធានការបង្កាហានីភ័យ។ ដូច្នេះ អំណឹះតទៅ មន្ត្រីនិងអ្នកនយោបាយគ្រប់ជាន់ថ្នាក់គួរផ្លាស់ប្តូរឥរិយាបថចំពោះព័ត៌មានជាចាំបាច់។ ប្រសិនបើមិនដូច្នោះទេ ពួកគេច្បាស់ជាដើរទាន់សភាពការណ៍ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ