សាលក្រមរឿងក្តីប្រឆាំងសមាជិកបក្សប្រឆាំង នៅខេត្តកណ្តាល នឹងប្រកាសនៅថ្ងៃទី៥សីហា
ក្រុមមេធាវីការពារក្តីរួមទាំងជនជាប់ចោទជាបេក្ខជនជាប់ឆ្នោតតំណាងរាស្ត្រ លោកចាន់ ចេងមេធាវីបក្សប្រឆាំង លោកជូងជូងី និងសកម្មជនគណបក្សប្រឆាំងលោកមាស ប៉េង បានស្នើសុំពន្យារពេលសវនាការដោយលើកហេតុផលថា ជាប់រវល់ក៏ដោយ ក៏ប៉ុន្តែចៅក្រមតុលាការខេត្តកណ្តាលតែនៅបើកសវនាការជំនុំជម្រះលើសំណុំរឿងកាលពីឆ្នាំ២០១១។បន្ទាប់ពីសវនាការអស់ពេលប្រហែលមួយម៉ោងរួចមកចៅក្រមបានសម្រេចថាសាលក្រមលើរឿងក្តីប្រឆាំងសមាជិកគណបក្សប្រឆាំងនោះនឹងប្រកាសនៅថ្ងៃទី៥សីហា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ទោះបីការចរចាថ្នាក់ដឹកនាំកំពូលរវាងគណបក្សប្រជាជនកម្ពុជានិងគណបក្សសង្គ្រោះជាតិបានបើកធ្វើនៅព្រឹកថ្ងៃទី២២កក្កដានេះក៏ប៉ុន្តែតុលាការខេត្តកណ្តាលក៏មិនបានបង្អង់នីតិវិធីដែរ។ចៅក្រមនៅព្រឹកថ្ងៃ២២កក្កដានេះបានបើកសវនាការជំនុំជម្រះក្តីលើបេក្ខជនជាប់ឆ្នោតតំណាងរាស្ត្រលោកចាន់ចេងមេធាវីគណបក្សប្រឆាំងលោកជូងជូងីនិងលោកមាសប៉េងសកម្មជនគណបក្សសង្គ្រោះជាតិនៅស្រុកកៀនស្វាយ។
ក្រុមមេធាវី៧រូបការពារលោកជូងជូងីរួមទាំងមេធាវីការពារលោកចាន់ចេងបានស្នើសុំចៅក្រមលើកពេលសវនាការព្រោះមេធាវីទាំងនោះជាប់រវល់។ប៉ុន្តែចៅក្រមនៅតែបើកសវនាការតាមការគ្រោងទុក។សវនាការនៅព្រឹកថ្ងៃអង្គារនេះនៅតុលាការខេត្តកណ្តាលមានវត្តមានតែលោកមាសប៉េងសព្វថ្ងៃជាសមាជិកក្រុមប្រឹក្សាស្រុកកៀនស្វាយរបស់គណបក្សសង្គ្រោះជាតិ។សកម្មជនសិទ្ធិមនុស្សបានចូលរួមសង្កេតការណ៍។បន្ទាប់ពីបើកសវនាការអស់ពេលប្រហែល១ម៉ោងរួចមកចៅក្រមបានសម្រេចថាសាលក្រមលើរឿងក្តីនោះនឹងប្រកាសនៅថ្ងៃទី៥សីហា។
លោកចាន់សុវ៉េតសកម្មជនសិទ្ធិមនុស្សអាដហុកដែលបានតាមដានសវនាការអះអាងថាជនជាប់ចោទលោកមាសប៉េងបានប្រាប់តុលាការថានៅថ្ងៃកើតហេតុលោកចង់ចូលទៅកាន់ពន្ធនាគារវិញតែមេធាវីជូងជូងីនិងលោកចាន់ចេងបានប្រាប់ឲ្យលោកចាកចេញពីពន្ធនាគារទៅជាមួយពួកគាត់។
តាមលោកចាន់សុវ៉េតនីតិវិធីរបស់តុលាការខេត្តកណ្តាលពេលនេះជាសញ្ញាមិនល្អនិងជាការដាក់សម្ពាធមួយថែមទៀតដល់គណបក្សប្រឆាំង។គណបក្សប្រឆាំងដែលកំពុងចូលតុចរចាខណៈដែលបេក្ខជនជាប់ឆ្នោតតំណាងរាស្ត្រ៧រូបនិងសកម្មជនម្នាក់ត្រូវបានចាប់ឃុំខ្លួនចាប់តាំងពីថ្ងៃទី១៥កក្កដា។
បេក្ខជនជាប់ឆ្នោតតំណាងរាស្ត្ររបស់គណបក្សសង្គ្រោះជាតិលោកចាន់ចេងនិងលោកមេធាវីជូងជូងីជាប់ចោទក្នុងរឿងផ្តល់មធ្យោបាយឲ្យអតីតសមាជិកក្រុមប្រឹក្សាឃុំបន្ទាយដែកលោកមាសប៉េងមកពីគណបក្សសមរង្ស៊ីរត់ចេញពីពន្ធនាគារកាលពីថ្ងៃទី២៣ខែកញ្ញាឆ្នាំ២០១។
ប៉ុន្តែកាលណោះលោកមេធាវីជូងជូងីបានអះអាងថាការបញ្ជូនលោកមាសប៉េងទៅកាន់ពន្ធនាគារពាក់ព័ន្ធនឹងជម្លោះដីធ្លីនោះគឺមិនមានដីកាឃុំខ្លួនពីចៅក្រមឡើយ។
ក្នុងរឿងក្តីនោះចៅក្រមអនុញ្ញាតឲ្យលោកមេធាវីជូងជូងីនិងលោកចាន់ចេងស្ថិតនៅក្រៅឃុំ និងបានដាក់ឲ្យស្ថិតនៅក្រោមការត្រួតពិនិត្យរបស់តុលាការ។ប៉ុន្តែបើសិនជាចៅក្រមរកឃើញថាអ្នកទាំងពីរពិតជាមានកំហុសដូចការចោទប្រកាន់នឹងត្រូវជាប់ពន្ធនាគារពី១ឆ្នាំទៅ៣ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ