ព្រះសង្ឃការពារសិទ្ធិមនុស្ស អំពាវនាវសហគមន៍អន្តរជាតិ តាមដានសវនាការកាត់ទោសលើព្រះអង្គ
ព្រះតេជគុណ លួន សុវ៉ាត ជាព្រះសង្ឃ ការពារសិទ្ធិមនុស្សដ៏លេចធ្លោ បានអំពាវនាវដល់សហគមន៍អន្តរជាតិ ចូលរួមតាមដានសវនាការ ដែលតុលាការ សាលាដំបូងរាជធានីភ្នំពេញ នឹងកាត់ទោសព្រះតេជគុណ នៅព្រឹកថ្ងៃទី២៥ ខែវិច្ឆិកា។ ព្រះតេជគុណ លួន សុវ៉ាត ត្រូវបានចៅក្រម ចោទប្រកាន់ជាច្រើនករណី ដូចជា បទញុះញង់ឲ្យប្រព្រឹត្តបទឧក្រិដ្ឋ ព្រមទាំងបទក្បត់ជាតិ ជាដើម។
ចុះផ្សាយនៅថ្ងៃ៖
ស្តាប់ - ០២:៣៤
នៅព្រឹកថ្ងៃទី១៨វិច្ឆិកាស្អែកនេះ ព្រះតេជគុណ លួន សុវ៉ាត សកម្មជនព្រះសង្ឃ ការពារសិទ្ធិមនុស្ស នឹងយកញត្តិ ទៅដាក់នៅស្ថានទូតនានា ប្រចាំកម្ពុជា រួមមានស្ថានទូតអាមេរិក សហគមន៍អឺរ៉ុប និងអង្គការសហប្រជជាតិ។ ញត្តិរបស់ព្រះតេជគុណ លួន សុវ៉ាត ដែលដាក់មុនគេ នៅស្ថានទូតអាមេរិក ដើម្បីជូនដំណឹង និងអំពាវនាវដល់សហគមន៍អន្តរជាតិ ឲ្យចូលរួមស្តាប់អង្គសវនាការ ដែលតុលាការសាលាដំបូងរាជធានីភ្នំពេញ ចោទប្រកាន់ និងកាត់ទោសលើព្រះសង្ឃ នៅម៉ោង ៨ ព្រឹក ថ្ងៃទី២៥វិច្ឆិកា។
គម្រោងបើកសវនាការរបស់តុលាការរាជធានីភ្នំពេញ នាសប្តាហ៍ក្រោយ ត្រូវបានព្រះតេជគុណ លួន សុវ៉ាត ចាត់ទុកថា ចៅក្រមបានប្រើដាវអាជ្ញាសឹក ចោទប្រកាន់ និងកាត់ទោសព្រះអង្គ ដោយរំលោភលើច្បាប់ព្រះពុទ្ធសាសនា និងច្បាប់រដ្ឋធម្មនុញ្ញកម្ពុជា។
ព្រះតេជគុណ លួន សុវ៉ាត បានឲ្យដឹងថា ក្នុងដីការបស់ចៅក្រម ដែលព្រះអង្គ ទទួលបាន គឺចៅក្រមបានចោទប្រកាន់ច្រើនករណី ក្នុងនោះ មានបទក្បត់ជាតិ និងបទញុះញង់ឲ្យប្រព្រឹត្តបទឧក្រិដ្ឋ ទាំងនៅក្នុងប្រទេស និងទាំងនៅក្រៅប្រទេស។
ព្រះតេជគុណ លួន សុវ៉ាត មានសង្ឃដិកា ច្រានចោលការចោទប្រកាន់របស់តុលាការ ហើយថា តុលាការ មិនគួរដំណើរការសំណុំរឿងក្តីចោទព្រះសង្ឃនោះទេ ពោលគឺបើព្រះសង្ឃធ្វើខុសច្បាប់ ត្រូវមានស្ថាប័នព្រះសង្ឃ ដើម្បីកាត់ទោស។
ព្រះតេជគុណ លួន សុវ៉ាត បានបញ្ជាក់ថា ចាប់តាំងពីបួសជាព្រះសង្ឃ ព្រះតេជគុណ បានទេសនាឲ្យពុទ្ធបរិស័ទធ្វើអំពើល្អ មិនមែនធ្វើឡើងដោយការញុះញង់ដូចការចោទប្រកាន់នោះទេ។ មួយវិញទៀត ព្រះអង្គ នឹងនិមន្តចូលរួមសវនាការ នៅព្រឹកថ្ងៃទី២៥វិច្ឆិកា តែមិនមែនទៅ ដើម្បីឲ្យតុលាការកាត់ទោសព្រះអង្គទេ ផ្ទុយទៅវិញ ព្រះតេជគុណ នឹងនិមន្តទៅតុលាការ ក្នុងនាមជាព្រះសង្ឃ ដើម្បីទេសនាក្នុងបន្ទប់សវនាការតុលាការ ឲ្យចៅក្រម និងព្រះរាជអាជ្ញា កាន់ធម៌សុច្ចរិត ទៀងត្រង់ ត្រូវកាត់ដោយអព្យាក្រឹត្យ តម្លាភាព យុត្តិធម៌ ដោយមិនលុះនូវអគិតធម៌ទាំង ៤ គឺឆន្ទាគតិ ទោសាគតិ មោហាគតិ និងភយាគតិ។
ក្នុងរយៈពេលចុងក្រោយ ចៅក្រមតុលាការរាជធានីភ្នំពេញ បានចោទប្រកាន់ និងកាត់ទោស បញ្ជូនទៅពន្ធនាគារ នូវព្រះសង្ឃ ៣ អង្គមកហើយ បន្ទាប់ពីប៉ូលិសចាប់ផ្សឹក។ ព្រះសង្ឃខ្មែរកម្ពុជាក្រោមទាំងនោះ ត្រូវបានចោទប្រកាន់ និងកាត់ទោស ក្នុងពេលព្រះអង្គ ចូលរួមការតវ៉ាជាមួយនឹងប្រជាពលរដ្ឋមានបញ្ហាដីធ្លី។
ប៉ុន្តែមន្ត្រីអាជ្ញាធររដ្ឋាភិបាល បានប្រកាសថា ការចាប់ខ្លួន ចោទប្រកាន់ និងកាត់ទោសអតីតព្រះសង្ឃទាំងនោះ មិនមែនជាប្រតិបត្តិការប្រឆាំងនឹងព្រះសង្ឃទេ តែជាការចោទប្រកាន់ និងកាត់ទោសលើបុគ្គល ដែលប្រព្រឹត្តបទល្មើស ផ្ទុយពីច្បាប់រដ្ឋ និងបង្កអសន្តិសុខសង្គមប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ